U Kamianieckim rajonie stvaryli fiermu z hadavancami, miasa jakich spažyvajuć u darahich restaranach
Niezvyčajny biznes u vioscy Kamaroŭščyna Kamianieckaha rajona raspačała maładaja siamja Abłamskich, a hadavancy na ichniaj fiermie nie karovy, śvińni ci jakija ptuški, a maluski, piša partał Kamenec.by.
Pry zhadcy pra ślimakoŭ pierš za ŭsio ŭjaŭlajucca vinahradnyja — ich chapaje ŭ sadach i aharodach. Alaksandr Abłamski ŭdakładniaje, što ichniaja aficyjnaja nazva — pamacija, i jany taksama jadomyja, choć ich treba pravilna hatavać, padavać z pravilnym sousam, dy i ŭ dyjamietry jany pavinny być nie mienšyja za 2,6 sm.
Adnak ža kali hetyja «biesprytulniki» kormiacca kala sažałki z zastajałaj vadoj ci kala śmietnika i da t. p., to pazbavicca ad niepryjemnaha pachu miasa niemahčyma nijakimi prypravami. Na fiermie ž admysłova hadujucca inšyja ślimaki, rodam nie z našych miaścin, a mižziemnamorskija.
Alaksandr sa svajoj siamjoj pasialiŭsia na dziadoŭskaj siadzibie ŭ Kamaroŭščynie, dzie stajała jašče davajennaja chatka i dzie prajšło jaho dziacinstva. Siudy jon paśla pryjazdžaŭ z baćkami z Kamienca. Kali ž chata apuścieła, to siadziba nie pierastała być miescam pryciahnieńnia. I pastupova ŭmiełymi rukami maładoha haspadara mianiałasia.
Siońnia na miescy staroj chaty — sučasny asabniak, dahledžany dvor ź nievialikim staŭkom i łabiryntam ściežak, adna ź jakich viadzie da niezvyčajnaha haspadarčaha ŭčastka pamieram šeść sotak — ślimakovaj fiermy.
Hetaj fiermie na ŭskrainie vioski ŭžo try hady. Małady haspadar zacikaviŭsia hetymi maluskami, kali pradehustavaŭ chatniuju stravu ź ich miasa. Raspytaŭ zavodčykaŭ ślimakoŭ bolš padrabiazna, a na mnohija pytańni atrymaŭ adkazy ad Huhła. Tady vyrašyŭ pasprabavać siabie ŭ novaj spravie, a žonka padtrymała. Spačatku byli karotkija płatnyja kursy na ślimakovaj fiermie ŭ Bresckim rajonie, paśla — kupla 50 kh pieršych maluskaŭ.
Uvohule ž Alaksandr vyvučaŭ bijarytmy, zvyčki, husty bruchanohich pieradusim na praktycy.
Letnija «karpusy» fiermy — daščanyja ščyty na padporach, jakija stvarajuć cień. A voś vosieńniu ŭsie nasielniki fiermy buduć sabranyja, adkalibravanyja pa vazie (častka ich budzie adbrakavanaja jak niazdolnaja pieranieści zimoŭku) i źmieščanyja ŭ chaładzilnik, dzie pry tempieratury +5 maluski zapaduć u anabijoz.
Draŭlanyja ščyty na zimu buduć prybranyja z učastka, jaki pieraaruć. A viasnoj tut pasiejuć ulubionuju ślimakami travu pierka — hibryd rapsu i piekinskaj kapusty — i znoŭ rasstaviać ščyty. Ślimakoŭ abudziać, prykmietna padvysiŭšy im tempieraturu i vilhotnaść, paśla čaho znoŭ pasartujuć — na matačnaje pahałoŭje i na kulinarnyja mety.
Darečy, tavarnaja vaha hetych maluskaŭ ad 10 da 20 hramaŭ i, u adroźnieńnie ad našaha vinahradnaha ślimaka, jaki raście dva hady, mižziemnamorski nabiraje tavarnyja paramietry za hod.
Svaju travu jon źjadaje davoli chutka, i tady kormiać maluskaŭ maksimalna zdrobnienym śpiecyjalnym kambikormam, jaki haspadar robić sam z aharodninnych adkidaŭ.
U śpioku ślimaki śpiać, prymacavaŭšysia da ščytoŭ, a ŭviečary tut uklučajecca aŭtapaliŭ (palivać maluskaŭ treba abaviazkova), paśla čaho ślimaki špacyrujuć, pasucca i sparvajucca (jany — hiermafradyty).
Kab ślimaki nie raźbiehlisia pa ŭsioj siadzibie i za jaje miežy, fierma, na jakoj utrymlivajecca bolš za 120 tysiač maluskaŭ, abniesienaja śpiecyjalnaj sietkaj sa zvarotnymi kišeniami, jakija nie dazvalajuć pieraadoleć vyšyniu.
«Častka hetaha ŭčastka zaniataja malkami ciapierašniaha siezonu, što vyraščanyja z matačnaha statka — ź ikry, u inkubacyi, padobna kuraniatam. Jany padraśli, praź miesiac ich źbiarom, adkalibrujem, zakładziem na matačny statak, na dahadoŭvańnie, na kulinarnyja mety. Ślimačynaja naha pavinna dastatkova vyraści, pra što skaža jaje ćviordaja padešva. Samych maleńkich niedarostkaŭ nie źbirajem — jany nie zmohuć pieražyć zimoŭku.
A voś hety ślimak ciažarny, — niečakana kaža Alaksandr. — Mantyja ŭžo nie ŭłazić u pancyr, chutka adkładzie kładku jajek. Ale dla hetaha im patrebnaja kisłaja hleba, tamu źmiaščajem takija asobiny ŭ zbanki z tarfianoj ziamloj. Ikru jany mohuć zakładać dvojčy za siezon, ale kali heta bližej da vosieni, to takija malki nie paśpiavajuć adužać».
Na fiermie Abłamskich mižziemnamorskija ślimaki dvuch vidaŭ — chieliks aśpiersa maksima i miuler. Ich składana ŭsprymać jak ježu, modnuju zakusku z vysokim utrymańniem białku. Kultura ŭžyvańnia ŭ ježu ślimakoŭ u nas pakul u stadyi papularyzacyi, i mnohija ŭpieršyniu sprabujuć ich tolki ź cikaŭnaści, u tym liku i na hetaj siadzibie.
Stravy sa ślimakoŭ Alaksandr hatuje ŭžo virtuozna, asabliva eskarha pad roznym sousam. U płanach — zasvoić syrny desiertny i tamadža vostry. Pradehustavać ich tut mohuć usie achvotnyja, tym bolš što Alaksandr u statusie indyvidualnaha pradprymalnika niadaŭna staŭ ekskursavodam na svaim padvorku dla darosłych haściej i dla dziaciej.
«Pryhatavać stravu sa ślimakoŭ — sprava nie zusim prostaja, — raskazvaje haspadar. — Na eskarha idzie nie mienš za dźvie hadziny, i pieršy krok — termičnaja apracoŭka asobna pancyraŭ i ślimačynaha miasa, padrychtoŭka pravilnaj padliŭki z vykarystańniem desiertnaha vina, zalivańnie hetym sousam zdrobnienaha miasa ŭ samym pancyry. Hetyja stravy siońnia padajuć u darahich restaranach — usio jašče na naša ździŭleńnie».
Navukoviec raić sadžać na leciščy łavandu i razvodzić paŭlinaŭ. Navošta?
Historyja top-mieniedžara, jaki kinuŭ pasadu ŭ ES i źjechaŭ u biełaruskuju pravincyju vyroščvać ślimakoŭ
«Jon staić, a na šyi zamatanaja vializnaja źmiaja». Biełaruski piacikłaśnik raskazaŭ pra svaich niezvyčajnych chatnich hadavancaŭ
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj7
Kamientary