Biez Paźniaka i Sachaščyka, ź niervovymi dyskusijami pamiž Łatuškam i Jahoravym. Jak prachodziła kanfierencyja «Novaja Biełaruś»
Padčas sioletniaj kanfierencyi «Novaja Biełaruś» u Vilni hučała šmat roznych prapanoŭ: častkova pryznać lehitymnaść Łukašenki ŭ abmien na vychad palitviaźniaŭ, dać 10 tysiač dalaraŭ tamu, chto prydumaje, jak mabilizavać hramadstva… «Naša Niva» pabyvała tam i raskazvaje, što trapiła ŭ kadr, a što zastałosia za im.
Ci byli Paźniak i Sachaščyk?
Pierad pačatkam sioletniaj kanferencyi padavałasia, što moža vybuchnuć. Razmova nie ab pravakacyjach, kaniečnie, pra jakija papiaredžvaŭ Alaksandr Azaraŭ (choć achova dziažuryła), a pra atmaśfieru paśla abmienu viaźniami pamiž Zachadam i Rasijaj, u jaki nie było ŭklučana ŭ śpisy nivodnaha biełarusa. Pra heta spračalisia i na scenie, i ŭ kułuarach.
«Paru dzion tamu, kali adbyŭsia abmien zakładnikami pamiž Rasijaj i ZŠA, mnohija spadziavalisia, što my ŭbačym siarod imionaŭ Maryju Kaleśnikavu, Andžeja Pačobuta abo Ihara Łosika, — skazała Śviatłana Cichanoŭskaja na pačatku kanfierencyi. —
Apiaredžvajučy ŭsie pytańni, ja skažu: my nie viedali i nie ŭdzielničali ŭ pracesie hetych pieramoŭ, kab paŭpłyvać na ich vyniki. Ale sam fakt takoha abmienu źjaŭlajecca važnym precedentam, jaki my sprabujem vykarystoŭvać u pieramovach ab vyzvaleńni biełarusaŭ u budučyni».
Na kanfierencyju sioleta zarehistravałasia kala 600 čałaviek. Zała ŭ pieršy dzień była poŭnaja, choć, vidavočna, dajšli nie ŭsie — z ulikam žurnalistaŭ čałaviek z 300. Byli pradstaŭniki roznych palityčnych struktur, błohiery i byłyja palitviaźni, pravaabaroncy, «Bajpoł» i «Biełpoł», były pasoł Ukrainy ŭ Biełarusi Ihar Kizim i były pasoł Polščy Artur Michalski. Błohier Alaksandr Kabanaŭ raśsiakaŭ na fonie haściej u harniturach u čornym spartyŭnym kaściumie «Adydas». Biełaruski student z Amieryki vyłučaŭsia jarka-sałatavym manikiuram z nadpisam «Kamała 2024». Daradca Cichanoŭskaj Dzianis Kučynski — elehantnym halštukam ź vitražami Šahała.
Kiraŭnik vilenskaha biuro Fondu Adenaŭera Jakab Valenštajn, jaki zapisvaje rep pra Biełaruś, pryjechaŭ u cišotcy z žartaŭlivym nadpisam «I'm Here For the Selfie With Sveta». Fota zrabiŭ.
Zianon Paźniak — nie pryjechaŭ. Choć jaho, kažuć, zaprašali paŭdzielničać u adnoj z dyskusij. Zrešty, mnohich publičnych pierson nie nazirałasia ŭ zale.
Nie było i raniejšaha «ministra abarony» ŭ Abjadnanym pierachodnym kabiniecie Valera Sachaščyka. Hienadź Mańko, kiraŭnik Misii demakratyčnaj Biełarusi ŭ Kijevie, u razmovie z «Našaj Nivaj» raskazaŭ, što jon byŭ adnym z tych, chto prasoŭvaŭ Sachaščyka ŭ Kabiniet. Ale paśla ŭ ich zdaryŭsia kanflikt:
«Jon vykazvaŭ pretenziju, što ŭsia niehatyŭnaja infarmacyja z Ukrainy pra jaho idzie ad mianie, sprabavaŭ atrymać ad mianie vybačeńni. Ja jamu kažu: druža, my ž nie na scenie, ja jak pradstaŭnik Cichanoŭskaj va Ukrainie pišu spravazdačy. I paznačaju, što Pałka «Pahonia» faktyčna nie isnuje, padraździaleńnie nie ŭdałosia raźvić na bazie Druhoha lehijona», — dzielicca Mańko.
Pa jaho słovach, ludzi z Pałka «Pahonia» ŭvajšli ŭ inšyja ŭkrainskija padraździaleńni. Zajavu Sachaščyka, što heta nie skłałasia praz palityčnyja hulni Ukrainy z Łukašenkam, Mańko nazyvaje pamyłkaj.
«Moža być, u jaho jość niejkaja infarmacyja, jakoj ja nie viedaju… Jon razumny čałaviek, daśviedčany prafiesijny vajskoviec… Ale toje, što jon sprabavaŭ zrabić, jamu nie ŭdałosia. (…) Pamyłka była ŭ tym, što zajavy rabilisia hučnyja, ale hetaha nie było. Jon zajaŭlaŭ, što šmat miesiacaŭ byŭ na froncie, ale heta niapraŭda».
Svaju ž dziejnaść va Ukrainie Mańko acaniŭ pazityŭna.
«Ja liču, što mnie ŭdałosia źmianić staŭleńnie dobraachvotnikaŭ da demakratyčnych struktur. Na starcie jano było nadzvyčaj radykalnaje. Paćviardžeńniem hetym źmienam moža być toje, što ruch «Kalinoŭcy» hatovy pracavać z Kabinietam Cichanoŭskaj. Ja byŭ adnym z padpisantaŭ zvarotu na imia Zialenskaha, kab byŭ pryznačany śpiecpradstaŭnik Ukrainy pa Biełarusi — były pasoł Ihar Kizim. Skłalisia dobryja adnosiny z hrupaj «Za demakratyčnuju Biełaruś» u Viarchoŭnaj Radzie Ukrainy», — pieraličyŭ jon ścipła.
Što rabić z palitviaźniami i chto vinavaty
Na pieršaj dyskusii abmiarkoŭvali hałoŭnyja vykliki. Daradca Cichanoŭskaj Franak Viačorka adznačyŭ, što biełaruskaje pytańnie šmat u čym zaležyć ad hieapalityčnaha raskładu i situacyi va Ukrainie.
«Naša zadača — pavialičyć prysutnaść Biełarusi ŭ mižnarodnym paradku dnia. Ale dla hetaha važna, kab dziejničali ludzi — i ŭnutry krainy, i za miažoj. (…) 2020 hod užo ŭ pryncypie zabyty, nichto nie pamiataje pra našy pratesty. Tamu nam patrebnyja novyja pośpiechi. (…) Nam treba zachoŭvać subjektnaść. Kab my byli nie na stale, a za stałom pieramoŭ».
Pavieł Łatuška panarakaŭ, što za miažoj mała biełarusaŭ na akcyjach i zaklikaŭ ich prychodzić, a kali bajacca za svaju biaśpieku — prychodzić u maskach i akularach. U 2025-m, kazaŭ palityk, treba dakazać, što 2020 hod nie byŭ vypadkovaściu.
Pazicyja Łatuški takaja: bajkot i cišynia na vybarach vyhadnyja režymu, tamu treba iści i hałasavać suprać usich. «Hałasavańnie suprać usich nie pryviadzie da administracyjnaj ci kryminalnaj adkaznaści», — pierakanany jon.
«Ci hatovy my skazać: usio skončana, my stanovimsia na kaleni pierad Łukašenkam, prosim prabačeńnia? Ja, Pavieł Łatuška, nikoli heta nie zrablu. Ja budu praciahvać zmahacca», — vykazaŭsia jon.
Novaja śpikierka Kaardynacyjnaj rady Anžalika Mielnikava paabiacała, što dla KR budzie pryjarytetam vyzvaleńnie palitviaźniaŭ, evakuacyja byłych źniavolenych, adkrytaść Jeŭropy da biełarusaŭ.
«Voś vy hladzicie na mianie i dumajecie: što hety małady palityk moža? Tak, u mianie mała dośviedu. Ale padymicie ruku ŭ hetaj zale, chto maje paśpiachovy dośvied pa źviaržeńni dyktatury?» — źviarnułasia Mielnikava.
Jana zhadała, što raniej zajmałasia kikboksinham i razumieje, što dla pieramohi treba nie tolki abaraniacca, ale i nanosić udary. Demsiłam važna raskazvać biełarusam, jakoj budučyni jany chočuć dla ich, ličyć śpikierka.
«Kažuć, u vas niama kankretnaha płanu. U sparynhu nie papiaredžvajuć supiernika ab udary. Nichto nie raskryvaje svaje dziejańni», — praviała paralel Mielnikava i paprasiła ŭsich nie nahniatać.
Alena Žyvahłod ź inicyjatyvy «Sumlennyja ludzi» havaryła pra toje, što apazicyi treba vychodzić sa svajoj burbałki i bolš pracavać, kab davodzić infarmacyju da ludziej unutry krainy. Mielnikava jaje padtrymała.
«My tut nie pradajem haziroŭku, ale pašyreńnie aŭdytoryi — vielmi važnaja reč», — skazała Mielnikava, jakaja raniej była adnym z topaŭ biełaruskaj «Koka-Koły». I prapanavała arhanizavać premiju — na samuju lepšuju dumku pa mabilizacyi hramadstva. «Pakładu sama 10 tysiač dalaraŭ!» — paabiacała jana skinucca ŭ pryzavy fond.
Były śpikier KR Andrej Jahoraŭ paśla vybaraŭ u Radu rašyŭ, što koła prychilnikaŭ pieramien zvuziłasia da dziasiatkaŭ tysiač čałaviek. Raskrytykavaŭ sankcyjny cisk, jaki nie pryvioŭ da čakanych vynikaŭ. «Kali my robim heta niekalki hadoŭ i heta pryvodzić da advarotnych vynikaŭ, značyć, treba mianiać stratehiju». A paśla ździviŭ prapanovaj:
«Ja b pryznaŭ lehitymnaść taho, što adbyvajecca ŭ Biełarusi. Ja b abmianiaŭ prysutnaść jeŭrapiejskich pasłoŭ u Biełarusi, kali heta dazvalaje vyzvalać palitviaźniaŭ u masavym paradku i ruchać situacyju ŭ Biełarusi da bolš spryjalnaj dla dziejnaści hramadzianskaj supolnaści».
Łatuška nie strymaŭsia i hnieŭna kinuŭ Jahoravu, što kali toj choča pryznać Łukašenku, to niachaj, a jon sam, Łatuška, nie hatovy.
«Ja b pryznaŭ kaho zaŭhodna, navat Jahorava z Łatuškam, kali b heta dapamahło vyjści palitviaźniam», — pakinuŭ chtości kamientar da tranślacyi.
Na pytańnie ahienctva «Pozirk», čamu ŭ abmienie viaźniaŭ nie było našych, Łatuška adkazaŭ:
«Heta była damoŭlenaść pamiž CRU, FSB i SVR — usio. Džo Bajden i Kamała Charys asabista pierakonvali Ołafa Šolca, kab jon zrabiŭ toje, što zrabiła Hiermanija. Tamu my nie byli ŭklučanyja ŭ hety praces».
Pretenzii, što demsiły zrabili niedastatkova dla hetaha, jon usprymaje ŭ štyki.
«Mnie vielmi balić, što ŭ hetym abmienie niama biełaruskich palitviaźniaŭ. Ale hetaksama balić i palakam. Čamu byŭ vydadzieny Pabła Hansales — Pavieł Rubcoŭ, ahient rasijskaj SVR, jaki dziejničaŭ pad prykryćciom ispanskaha žurnalista na terytoryi Polščy? Jon byŭ vydadzieny polskimi ŭładami, i polskija ŭłady nie zmahli dabicca vyzvaleńnia Andžeja Pačobuta. Takoje ž pytańnie možna adrasavać amierykanskamu ŭradu. Čamu hramadzianin ZŠA i Biełarusi Juraś Ziańkovič, jaki znachodzicca ŭ turmie, nie byŭ vydadzieny ŭ ramkach hetaha abmienu? Tamu što havorka išła pra abmien pamiž supracoŭnikami śpiecsłužb. U hety śpis byli dadatkova ŭklučanyja šerah palityčnych dziejačaŭ Rasii. Bolš nichto nie ŭklučaŭsia, heta byli absalutna sakretnyja zakrytyja pieramovy.
Mnie balić. Ale heta pavinna baleć usim tym, chto tak časta jeździć u Hiermaniju. Chto znachodzicca ŭ hetaj Hiermanii bolš, čym Pavieł Łatuška va ŭsich zamiežnych kamandziroŭkach. I toj čałaviek, jaki zaraz mianie čuje i razumieje, pra kaho ja kažu. Čamu hety čałaviek krytykuje zaraz nas, a nie spytaje ŭ siabie: kali ja jezdžu ŭ Hiermaniju i zabiraju ŭsie ŭznaharody, katoryja naležać nie mnie, čamu ja nie vyjšaŭ na hety kantakt? Čamu niemcy nie pastavili pytańnie biełaruskich palitviaźniaŭ?»
Paźniej «NN» spytała ŭ Łatuški: kaho ž jon mieŭ na ŭvazie? Palityk nie staŭ nazyvać imia.
Ale sčytvaŭsia namiok na Taćcianu Chomič, siastru Maryi Kaleśnikavaj. Taćciana za dzień da hetaha pisała ŭ fejsbuku, što, na jaje dumku, lidaram apazicyi nie ŭdałosia zrabić pytańnie vyzvaleńnia palitviaźniaŭ pryjarytetnym pierad zachodnimi palitykami.
Taćciana ŭ kamientary «NN» adznačyła, što kanfliktu z Łatuškam u jaje nie było i jana nie viedaje, ci ŭ jaje adras toj vypad. Ale zaŭvažyła:
«Nie treba šukać vinavatych ci adkaznych. Treba dumać, što my možam źmianić, kab u nastupny raz tam byli biełarusy». Jana ličyć, što ludziej zackavali naratyvam, pisać ci nie pisać prašeńnie ab pamiłavańni. A vybirać pavinien sam čałaviek. A voś dla zachodnich partnioraŭ byŭ nievidavočny mesedž pra vyzvaleńnie palitviaźniaŭ, jany nie razumieli, ci mohuć vieści pieramovy pra vyzvaleńnie.
«My časta čujem: nijakich pieramoŭ, pakul usie nie vyjduć na volu. Jakoha vyniku my čakajem paśla niekalkich hadoŭ takoha mesedžu dla zachodnich partnioraŭ? Ci mesedž «nijakaha handlu z režymam, nijakaha handlu palitviaźniami». Heta jany sami pavinny vyrašać: hatovy jany vychodzić na takich umovach ci nie», — kaža Chomič. Jana pahadziłasia z dumkaj Jahorava, što možna było b padtrymać pryjezd zachodnich dypłamataŭ u abmien na vyzvaleńnie niekatorych palitviaźniaŭ.
Chomič dadała, što bačyć zruchi ŭnutry krainy pa situacyi z palitviaźniami, bo z prapanovaj pisać na pamiłavańnie prychodziać ciapier nie tolki da tych, kamu zastałosia mała siadzieć.
Śviatłana Cichanoŭskaja emacyjna adkazvaje na paproki: heta niapraŭda, što palitviaźni — nie pryjarytet na mižnarodnych sustrečach.
«My nikoli nie byli kateharyčnyja: «nie, nikoha nie vyzvalajem, pakul nie ruchnie režym». My zaŭsiody hetyja čatyry hady šukali padychody, šukali ludziej, jakija mohuć być nabližanyja da režymu, kab razmaŭlać pa źniavolenych. U čym zahvazdka — što z boku režymu hetaha nie chočuć rabić. Kožny raz, kali dypłamaty, palityki jeduć u Biełaruś, jakija jašče mohuć jechać, pieršaje pytańnie jany zadajuć pra palitviaźniaŭ. Humanitarny trek prapracoŭvajecca», — tłumačyć Cichanoŭskaja ŭ pierapynku dyskusij.
«Viedajecie, kolki vysiłkaŭ treba prykłaści, kab tvoj dakumient pakłali navierch? Tut nie tolki ja pavinna pracavać, tut pavinny pracavać usie my».
«Kali my čahości nie čujem publična, heta nie značyć, što hetaha nie isnuje»
Na scenie paźniej abmiarkoŭvali adkrytaść Jeŭropy da biełarusaŭ.
Polski dypłamat Artur Michalski, zdajecca, bolš za ŭsich vieryŭ u biełarusaŭ i ich jeŭrapiejskuju budučyniu. Jon adznačyŭ, što ŭnutry siabie biełarusy ŭžo zrabili vybar u bok Jeŭropy.
«Ja krychu aptymist u paraŭnańni ź niekatorymi maimi kalehami ŭ Biełarusi. Ciapier u Biełarusi cišynia, i my razumiejem čamu. I nielha paprakać za heta biełarusaŭ», — vykazaŭsia jon pra cisk u krainie.
Michalski dadaŭ, što biełarusy płaciać ciapier «varvarskuju canu» za svaju sprobu zdabyć svabodu.
Zhadvajučy sankcyi, jon zaŭvažyŭ, što Polšča nie płanuje abmiažoŭvać ujezd aŭtamabilaŭ na biełaruskich numarach.
U dypłamata spytali, ci hatovaja Polšča stvaryć abmienny fond dla handlu z Łukašenkam. Michalski naŭprost adkazvać nie staŭ, adznačyŭ, što niadaŭni abmien viaźniami daje nadzieju, što padobnaje moža być i ź biełaruskimi palitźniavolenymi. Ale jość dalikatnyja temy, dzie treba nie naškodzić słovami.
«Kali my čahości nie bačym ci nie čujem u publičnym dyskursie, heta nie značyć, što hetaha nie isnuje», — niekalki razoŭ padkreśliŭ Michalski.
Anatol Labiedźka ličyć, što biełaruskim palitykam treba paznačyć dźvie važnyja daty — 2025 i 2027 hod, kali ŭ Jeŭrapiejskim sajuzie budzie staršyniavać Polšča i Litva. «Heta šaniec dla nas», — kaža Labiedźka. Jon prapanavaŭ taksama ŭžo ciapier padrychtavać i nakiravać u Brusel zajaŭku na ŭstupleńnie ŭ Jeŭrasajuz ad Biełarusi.
«Režymnyja dypłamaty — ja maju na ŭvazie dypłamataŭ Łukašenki, — pavinny zajzdrościć sa strašnaj siłaj tym vynikam, jakija demanstrujuć Śviatłana Cichanoŭskaja i instytut demakratyčnych siłaŭ u naładžvańni supracoŭnictva ź jeŭrapiejskimi partniorami», — vykazaŭsia pradstaŭnik Abjadnanaha pierachodnaha kabinieta i były dypłamat Uładzimir Astapienka.
I taksama ździviŭ prapanovaj.
«U mianie pravakacyjnaja prapanova: moža, varta prapanavać Łukašenku zakryć svaje ambasady ŭ jeŭrapiejskich krainach i vykarystać srodki na adukacyjnyja i mabilnyja prahramy ź Jeŭrapiejskim sajuzam? Ja dumaju, heta budzie bolš karysna dla biełaruskaha naroda».
Łyžku dziohciu dadała Roza Turarbiekava, byłaja vykładčyca BDU i palitołah. Jana pryviała nastupnyja ličby: «Rassupracoŭnictva» vydzieliła 1600 stypiendyj dla biełarusaŭ na poŭny bakałaŭryjat, a ŭvieś ES — 400. A na prapanovu Astapienki zaŭvažyła: Łukašenku i nie treba Jeŭropa, tak vy tolki jamu dapamožacie.
Roza zhadała zabaŭny vypadak ź minułaha, kali spračałasia z prapahandystam Vadzimam Jałfimavym:
«Jon śćviardžaŭ, što biełarusy — jeŭrazijcy. A ja sa svajoj źniešnaściu i proźviščam pierakonvała, što biełarusy — jeŭrapiejcy».
Na fonie novych abmiežavańniaŭ pa ŭjeździe na aŭto ŭ Jeŭropu, składanaściaŭ ź vizami ŭ častki biełarusaŭ sapraŭdy stvarajecca adčuvańnie, što Zachad zakryvajecca ad nas. Nas nie čujuć? Łatuška ŭ razmovie z žurnalistami kaža, što tłumačyć jeŭrapiejskim palitykam, što heta pryvodzić da izalacyi biełarusaŭ i daje kart-błanš rasijskaj prapahandzie.
«Kali ja ŭ Bruseli čuju, što my nie budziem uvodzić takija padychody, a jany ŭvodziacca, to, kaniečnie, my viartajemsia da Brusela z hetym pytańniem. Jany abhruntoŭvajuć heta tym, što heta pytańni nacyjanalnych uradaŭ i jany sychodziać z pryncypaŭ nacyjanalnaj biaśpieki».
Nastupnyja vybary, Azaraŭ i partyzany, sprečka Łatuški i Knyroviča
U pieršy dzień kanfierencyi abmiarkoŭvali taksama ekanomiku i biełaruskuju identyčnaść.
Dyskusija pa takim haračym pytańni, jak palitviaźni, zapłanavanaja na druhi dzień, da jakoha zvyčajna mienš uvahi. «Techničnaja pryčyna», — kažuć u Ofisie na zaŭvahu pra pryjarytet.
Pytańni Cichanoŭskaj i pradstaŭnikam Kabinieta zadavali roznyja. Alaksandr Azaraŭ, jaki zdavaŭsia krychu zhublenym na hetaj sustrečy, spytaŭ «ad biełaruskich partyzanaŭ» pra ŭznaharody rejkavym partyzanam: ci buduć jany, niaŭžo Cichanoŭskaja nie cenić ich achviaru?
Cichanoŭskaja paprasiła nie manipulavać. Jana adkazała, što jany vartyja ŭznaharody, ale ŭ takich spravach treba dbać pra biaśpieku ludziej i ich rodnych, nie ŭsio možna rabić publična.
Ludziej cikaviła stratehija na vybarach-2025. Viačorka adznačyŭ, što adzinaha rašeńnia pakul niama, dyj mnohaje moža pamianiacca. Cichanoŭskaja patłumačyła, što moža być niekalki scenaroŭ, ale jana b chacieła viedać mierkavańnie biełarusaŭ, jak tut dziejničać. Sacapytańnie prychilnikaŭ pieramien, na jakoje spasyłajecca Ofis, pakazała, što pakul 27% za bajkot, mienš za 20% — za hałasavańnie «suprać usich».
Pytalisia, ci nie źbirajucca Cichanoŭskaja i Kabiniet jeździć pa haradach zamiežža, dzie žyvuć biełarusy, kab adkazvać na ich pytańni, zdymać napružańnie i pavyšać davier. Cichanoŭskaja paprasiła sabrać zapyty na takija sustrečy i abiacała padumać nad maršrutam.
Byli i novyja pryznačeńni. Zamiest Sachaščyka «ministram abarony» pryjšoŭ kalinoviec Vadzim Kabančuk. Jon časova prypyniŭ kantrakt z USU.
Uładzimir Astapienka aficyjna zaniaŭ miesca Valera Kavaleŭskaha na pasadzie adkaznaha za mižnarodnaje supracoŭnictva. Za pracu z moładździu ŭ Kabiniecie budzie adkazvać Marharyta Vorychava.
Zamienu Azaravu nie znajšli, ale ŭ kułuarach kažuć, što praź miesiac-dva budzie pryznačeńnie, kandydat užo jość.
Nakont pasad na scenie spračalisia. Kali prahučała pytańnie, ci narmalna, što niekatoryja siabry KR zajmajuć adrazu niekalki pasad, Łatuška aburyŭsia: maŭlaŭ, heta nie pasada, a dadatkovaja kryminalnaja sprava, i naohuł heta dobra — mieć supolnuju prahramu. Prapanavaŭ pahladzieć na Polšču i Litvu, dzie členy ŭrada adnačasova majuć pasady ŭ parłamiencie. I dadaŭ, što tolki vitaje novyja tvary. «A ja kuplu sabie maleńki domik i budu pisać miemuary».
Pradprymalnik Alaksandr Knyrovič pakpiŭ: «Viedaju jašče adnaho čałavieka, jakoha niama kim zamianić».
I aburyŭsia, što kamanda Łatuški, pryjšoŭšy ŭ KR, źmianiła statut.
Łatuška ŭ adkaz prapanavaŭ apłacić Knyroviču kurs likbiezu pa parłamientaryźmie.
«Vy prapanoŭvali ŭžo rejtynhavaje hałasavańnie. Kali my krucili, nie krucili, a vychodzić śpikieram Rymašeŭski», — upiknuŭ Łatuška.
Što z pašpartam Novaj Biełarusi i statusam Cichanoŭskaj paśla 2025?
Prajekt pašparta Novaj Biełarusi pakul taksama nie zakinuty. Paśla skandała z papiaredniaj firmaj znojdzieny novy načalnik «pašpartnaha stała» — litoviec Maryjus Hudziełajcis. Jon budzie adkazvać za techničny bok prajekta. Terminy, kali ž buduć hatovyja pieršyja pašparty, nichto ŭžo nie nazyvaje.
U kancy dnia prezientavali «Płatformu-2025» i «Pratakoł uzajemadziejańnia» — kali prosta, heta damovy ab supracy i ahulnych pryjarytetach pamiž roznymi demakratyčnymi strukturami.
I prahučaŭ adkaz na pytańnie — što sa statusam Cichanoŭskaj paśla 2025 hoda. Padpisanty damovy pahadzilisia, što Cichanoŭskaja vykonvaje rolu nacyjanalnaha lidara da praviadzieńnia sumlennych i svabodnych vybaraŭ u Biełarusi albo pakul sama nie vyrašyć spynić svaju dziejnaść.
Krytyki ŭžo abviaścili heta aŭtakratyjaj u vyhnańni.
Biełarusaŭ unutry krainy ž bolš chvaluje realnaja aŭtakratyja, jakaja i praz čatyry hady praciahvaje pomścić za toje, što ludzi zachacieli svabody.
Što buduć abmiarkoŭvać u druhi dzień kanfierencyi «Novaja Biełaruś»
Biełarus pryjšoŭ na kanfierencyju Novaj Biełarusi ź jarkim manikiuram u padtrymku Kamały Charys FOTY
«Čamu nie spytaje ŭ siabie: kali ja jezdžu ŭ Hiermaniju i zabiraju ŭsie ŭznaharody, čamu nie vyjšaŭ na kantakt ź niemcami?» Da kaho źviarnuŭsia Łatuška?
Jahoraŭ prapanuje pryznać lehitymnaść Łukašenki, kali heta dazvolić vyzvalić palitviaźniaŭ
Zatrymali Ihara Iljaša, muža palitźniavolenaj Kaciaryny Andrejevaj3
Kamientary
Łukašenka smokča ŭ rasiei, a hetyja ŭ Zachada.
I jany aboje pracujuć na svaich haspadaroŭ, prykryvajaś biełaruskim narodam i naviešyvaja na siabie tytuły lidaraŭ.
Jany zastalisia ź biełaruskim narodam, jaki ihnaruje i łukašenku, i Cichanoŭskuju z kodłaj hrantacmokaŭ.
Jahoraŭ chłusić. Jahoraŭ skazaŭ, što pa kolkaści prahałasavaŭšych na vybarach u Kaardynacyjnuju Radu (kala 7 tysiač čałaviek) robić vysnovu, što "koła prychilnikaŭ pieramien zvuziłasia da dziasiatkaŭ tysiač čałaviek".
Heta chłuśnia i manipulacyja.
Kolkaść prahałasavaŭšych pakazvaje koła tych, chto daviaraje strukturam Cichanoŭskaj (ofisy-kabiniety-kr).
Hetaje koła sapraŭdy značna zvuziłasia. Što i pakazvajuć ličby hałasavaŭšych, a taksama ličby hłčdzieŭšych kanfierencyju Cichanoŭskaj onłajn: 300-400 čałaviek.
A voś koła prychilnikaŭ pieramien nie źmianiłasia. Ludzi jak chacieli, kab Łukašenka syšoŭ, i Biełaruś vyzvaliłasia ad dyktatury, tak i chočuć.
Akramia, kaniečnie, samoha Jahorava, jaki choča režym Łukašenki lehitymizavać, pra što adkryta sam skazaŭ na hetaj kanfierencyi.