Palicyja zatrymała ŭ Varšavie biełarusa, jaki pryjšoŭ u ministerstva ź niebiaśpiečnymi pradmietami
Z budynka evakujavali 150 čałaviek.
![](http://d3kcf2pe5t7rrb.cloudfront.net/img/w840d4webp1/photos/z_2024_07/minibnsterstwa240716-fkhbo.jpg.webp)
Polskaja palicyja zatrymała ŭ Varšavie 40-hadovaha hramadzianina Biełarusi. Jon pryjšoŭ u Ministerstva siamji, pracy i sacyjalnaj palityki ź niebiaśpiečnymi pradmietami, piša Reform.news.
«U budynak ministerstva paśla 11 hadzin uvajšoŭ mužčyna, jaki ŭ sumcy mieŭ niebiaśpiečnyja pradmiety. Pavodziŭ siabie spakojna, nikomu nie pahražaŭ», — cytuje PAP siaržanta Jakuba Pacyniaka z kamiendatury palicyi Centralnaha rajona Varšavy.
Z budynka było evakujavana kala 150 čałaviek. Paśla 12:00 mužčynu vyvieli ź Ministerstva polskija słužby.
Pavodle infarmacyi PAP, u sumcy ŭ mužčyny byŭ haz, nož, teleskapičnaja dubinka, mahčyma, hazavaja zbroja.
U efiry polskich infarmacyjnych telekanałaŭ incydent prakamientavaŭ pres-sakratar ministerstva Michał Syska.
Pavodle jaho słoŭ, kala 11:30 rabotnikam ministerstva stała viadoma, što ŭ budynak zajšoŭ naviedvalnik, jon byŭ padvierhnuty nadhladu, a ŭ jaho rečach znajšli niebiaśpiečnyja pradmiety.
«Padčas hetaj pracedury achova ministerstva ŭstanaviła, što ŭ jaho rečach, vierahodna, jość niebiaśpiečnyja pradmiety. U adpaviednaści z pracedurami, byli prainfarmavanyja adpaviednyja słužby. Palicyja prybyła svoječasova. Dla biaśpieki ŭsie rabotniki, naviedvalniki byli evakujavanyja», — raspavioŭ jon.
Pavodle jaho, mužčyna znachodzicca ŭ rukach palicyi i viadziecca raźbiralnictva. U budynku pracavali piratechniki.
Michał Syska admoviŭsia nazvać, jakija mienavita pradmiety byli ŭ rečach mužčyny. Jon prapanavaŭ dačakacca pres-relizu palicyi. Pradstaŭnik ministerstva paćvierdziŭ, što, sa słoŭ rabotnikaŭ ustanovy, mužčyna nie byŭ ahresiŭny, pavodziŭ siabie spakojna.
«Jon chacieŭ sustrecca pa pytańniach farmalnaściej, źviazanych z pracaj, źviazanych z dazvołam na pracu. Ale hetych detalaŭ ja jašče nie viedaju, heta jašče pradmiet razboru palicyi», — dadaŭ jon.
Kamientary