Čatyry krainy NATA damovilisia sumiesna raspracoŭvać dalnabojnyja rakiety
Francyja, Hiermanija, Italija i Polšča zojmucca sumiesnaj raspracoŭkaj rakiet naziemnaha bazavańnia z radyusam dziejańnia bolš za 500 kiłamietraŭ — heta značyć zbroi, jakaja padpadaje pad vyznačeńnie «rakiety siaredniaj i mienšaj dalokaści». Ministry abarony čatyroch krain padpisali dekłaracyju ab namierach u hetaj śfiery ŭ Vašynhtonie, dzie prachodzić samit NATA, piša «Hołas Amieryki».
Niamieckaja hazieta Frankfurter Allgemeine Zeitung robić akcent na tym, što hetyja rakiety, kali b ich raźmiaścić na terytoryi Hiermanii, hipatetyčna mahli b dasiahnuć celaŭ na terytoryi Rasii. Pahadnieńnie dasiahnutaje na fonie vajny va Ukrainie i bojazi krain NATA, što Rasija ŭ budučyni moža rychtavać ahresiju suprać ich.
Paviedamleńnie źjaviłasia na nastupny dzień paśla taho, jak ZŠA i Hiermanija abviaścili pra płany raźmiaščeńnia, pačynajučy z 2026 hoda, na hiermanskaj terytoryi dalnabojnych udarnych sistem, uklučajučy hipierhukavuju zbroju.
Hetaje paviedamleńnie vyklikała rezkuju krytyku z boku Maskvy, jakaja nazvała namier zachodnich sajuźnikaŭ «źvianom u eskałacyjnym kursie». Kancler Hiermanii Ołaf Šolc, u svaju čarhu, zajaviŭ, što havorka idzie pra doŭhaterminovuju stratehiju harantavańnia biaśpieki, jakaja nie pavinna być siurpryzam dla Maskvy.
Jak piša FAZ, padčas dyskusij na samicie NATA byŭ vyznačany šerah «prabiełaŭ» abo niedachopaŭ u vajskovych mahčymaściach Aljansu, pierš za ŭsio ŭ Jeŭropie. U jakaści pryjarytetaŭ, adznačaje vydańnie, vyznačanyja piać kirunkaŭ, adzin ź ich — jakraz zabieśpiačeńnie mahčymaści nanosić udary ŭ hłybini terytoryi patencyjnaha praciŭnika (Deep Precision Strike).
Dekłaracyja ab namierach, padpisanaja čatyrma krainami, jakraz tyčycca raspracoŭki zbroi, zdolnaj nanosić takija ŭdary. Pry hetym sama jana nosić vielmi ahulny charaktar, niajasny navat charaktar zbroi, jakaja budzie raspracoŭvacca — idzie havorka pra kryłatyja ci balistyčnyja rakiety. Adznačajecca, što da prajekta moža dałučycca i Vialikabrytanija, ale ŭ lubym vypadku jaho realizacyja zojmie nie adzin hod.
ZŠA i Saviecki Sajuz źniščyli svaje rakiety naziemnaha bazavańnia z radyusam dziejańnia, jakija pieravyšajuć 500 kiłamietraŭ, u adpaviednaści z Damovaj ab rakietach siaredniaj i mienšaj dalokaści. Jon byŭ padpisany ŭ 1987 hodzie tahačasnym prezidentam ZŠA Ronaldam Rejhanam i apošnim savieckim lidaram Michaiłam Harbačovym. U 2019 hodzie ZŠA vyjšli z damovy, zajaviŭšy, što Maskva jaje parušaje. Pry hetym Vašynhton źviarnuŭ uvahu na raspracoŭku Rasijaj kryłataj rakiety naziemnaha bazavańnia 9M729, viadomaj u NATA jak SSC-8.
Rasija admaŭlała parušeńni. Dniami prezident Rasii Uładzimir Pucin, adnak, zajaviŭ, što ŭ krainie moža być adnoŭlenaja vytvorčaść rakiet siaredniaj i mienšaj dalokaści, i jany mohuć być raźmieščanyja ŭ tym liku za miežami Rasii, jak śćviardžajecca, dla strymlivańnia ZŠA.
Dekłaracyja samitu NATA: Ukrainie paabiacali «niezvarotny šlach» u aljans. Uzhadali i Biełaruś
Armienija pryniała ŭdzieł u samicie NATA. Rasija pahražaje nastupstvami
Novy ŭrad Vialikabrytanii dazvoliŭ vykarystoŭvać brytanskija rakiety Storm Shadow dla ŭdaraŭ pa Rasii
Krainy NATA: Nieba Ukrainy ŭ bližejšy čas budzie abaroniena
ZŠA vyrašyli raźmiaścić hipierhukavuju zbroju ŭ Hiermanii
«Čamu nie spytaje ŭ siabie: kali ja jezdžu ŭ Hiermaniju i zabiraju ŭsie ŭznaharody, čamu nie vyjšaŭ na kantakt ź niemcami?» Da kaho źviarnuŭsia Łatuška?22
Kamientary