Knyrovič: Palitviaźni admovilisia vychodzić na volu. Bo ŭmovaj moža być zdrada sabie

Pieršy — uhoda, prapanavanaja Łukašenkam, niavyhadnaja.

Tak, mienavita tak. I kab zrazumieć, u čym tut prablema, treba ŭspomnić pra standartnuju praktyku pradstaŭleńnia biełaruskich źniavolenych (nie tolki pa palityčnych artykułach) da ŭmoŭna-daterminovaha vyzvaleńnia (UDV). Niahledziačy na toje, što zakon dazvalaje źmiakčać pakarańnie pa ciažkich artykułach paśla adbyćcia pałovy terminu, pa asabliva ciažkich — paśla dvuch tracinaŭ, da UDV taksama možna pradstaŭlać za peŭnuju kolkaść hadoŭ da kanca terminu, na praktycy ž vy nie znojdziecie (za redkim vyklučeńniem) asudžanaha, jaki atrymaŭ taki padarunak raniej za apošni hod pryznačanaha terminu pakarańnia. Navat kali vy majecie spravu ź idealnym źniavolenym, jaki aktyŭna vypraŭlaŭsia ŭvieś termin. Usio adno heta adbudziecca za try-čatyry miesiacy da kanca terminu, radziej — za paŭhoda.

Tak sistema strachujecca ad niečakanaściaŭ. I hetuju praktyku možna zrazumieć. Kali adpuščany na volu hramadzianin zrobić u tyja apošnija miesiacy što-niebudź zahannaje, dyk adkazvać buduć tyja, chto jaho adpuściŭ. Tamu matyvacyi adpuskać źniavolenych na volu ŭ administracyi kałonii adnaznačna nijakaje i, kali b nie «pakaźniki vypraŭleńnia» (a jość u statystycy i takija, nie ździŭlajciesia), jany b usich trymali «da zvanka». Tak spakajniej. Im. Ale tak nielha — davać spravazdaču navierch treba, tamu UDV za paru miesiacaŭ — masavaja źjava.

Uličvajučy hetuju akaličnaść, ujavicie sabie palitviaźnia, jakomu prapanujuć vyjści pa pamiłavańni za paru tydniaŭ (ci miesiacaŭ) da kanca terminu.

Ale ŭmovaj hetaha vyjścia źjaŭlajecca zdrada sabie — treba pryznać vinu ŭ tym, čaho ty nie rabiŭ, i nakiravać hetuju papierku sa śviedčańniem svajoj zdrady na imia čałavieka, jakoha ty nie ličyš zakonnym kiraŭnikom krainy i vielmi nie chacieŭ by pra niešta prasić.

Na voli i ŭ źniavoleńni čas idzie z całkam roznaj chutkaściu. I kali nam tut zdajecca, što navat lišni dzień tam — nievynosny žach, i, kali možna vyjści chutčej, treba vychodzić, to znutry ŭsio ŭładkavana krychu inačaj.

Čałaviek pryvykaje da ŭsiaho, navat da źniavoleńnia. Paśla dvuch-troch hadoŭ adsiedki vypracoŭvajecca zvyčka, navyk. Para tydniaŭ ci miesiacaŭ pierastaje hrać istotnuju rolu, kali, viadoma, niama niejkich asablivych siamiejnych abstavinaŭ. Možna i paciarpieć.

Tamu takaja ŭhoda — niekalki dadatkovych tydniaŭ na voli za zdradu ŭłasnym pierakanańniam — całkam moža być adchilenaja. Dziakuj, ale nie.

Takaja łohika pracuje mienavita na adlehłaści ŭ niekalki tydniaŭ, miesiacaŭ. I pra častku palitviaźniaŭ, jakija vychodziać ciapier na volu mienavita na takim etapie adbyćcia pakarańnia, paviedamlajuć miedyja.

Jość i druhi varyjant. Heta vypadak, kali my majem spravu z čałaviečym podźviham, mužnaściu.

Ja, viadoma, maju na ŭvazie vypadki, kali palitviaźni admaŭlajucca pryznavać vinu, pisać prašeńni pra pamiłavańnie, niahledziačy na vielizarnyja terminy, jakija im treba budzie pravieści ŭ kałonii. Heta źjava zusim inšaha paradku.

Mnie nie daviałosia pisać takich prašeńniaŭ. Nie praź niejkuju asablivuju asabistuju mužnaść, prosta ja dakładna viedaŭ bieśpierśpiektyŭnaść u maim vypadku takich prośbaŭ, a tamu j nie bačyŭ sensu prynižacca.

Adnak, ja na svaje vočy naziraŭ, jak uletku 2021 hoda ŭ kałoniju pryjazdžali prakurorskija i prapanoŭvali palitviaźniam pisać prašeńni. Potym kožnamu z tych, chto adbyvaje pakarańnie pa palityčnych artykułach (jakich u nas niby niama) pryjšli jašče i «listy Vaskrasienskaha» z takoj ža prapanovaj.

Na toj momant palitviaźniaŭ było kala 600, pahadzilisia pisać prašeńni kala 300. Heta značyć pałova prosta admoviłasia ŭstupać u hety źnievažalny dyjałoh.

Pałova. Heta važna. Hetak ža, jak važnaja stojkaść Statkieviča pry papiaredniaj adsiedcy. Nahadaju, tady Łukašenku daviałosia jaho adpuskać praz vonkavy cisk za hod da zakančeńnia terminu, sa słovami: «Nu jon by choć prašeńnie napisaŭ…» Nie, nie napisaŭ. I ciapier nie napiša.

2020 hod zaviaršyŭsia zusim nie dla ŭsich. I mužnaść hetych ludziej natchniaje, patrabuje być adkaznym, prapanuje nam mierać ułasnaje žyćcio voś takoj, bujnoj mieraju. Usiaho tolki prapanuje, nie bolš za toje.

P.S. Biełaruskaje zakanadaŭstva praduhledžvaje mahčymaść vychadu na volu źniavolenych, jakija majuć ciažkija zachvorvańni, zadoŭha da zakančeńnia terminu. Ich vyzvaleńnie nie patrabuje ni napisańnia prašeńniaŭ pra pamiłavańnie, ni navat ich ułasnaje zhody.

• 3
• 9
• 1
• 0
• 1
• 1
• 1