Vienhryja? Italija? Ci Hrecyja? Dzie možna chutka i lohka aformić šenhienskuju vizu

Pasolstvy stali mała davać miescaŭ na indyvidualnuju padaču, taksama skaročana kolkaść piersanału, jaki razhladaje vizavyja zajavy.

U turfirmach rajać: kali treba chutka i adnosna niadoraha adkryć vizu, to heta Hrecyja, Bałharyja. Ale tam dajuć adnarazovyja abo karotkija multyvizy pad tur. Kali chutka, ale na paradak daražej — Ispanija.

Kali nie chutka i nie tanna — to heta Italija, Francyja, Vienhryja. Hiermanija moža dać dobruju vizu, ale… praz hod.

Respublikanski sajuz turystyčnaj industryi raskazvaje ab niuansach padačy na šenhien.

Vienhryja

Heta kraina pakidaje ŭ suiskalnikaŭ viz supiarečlivyja ŭražańni.

«Vienhry mohuć pastavić dobruju vizu — na termin ad hoda da troch, kali vy ŭžo byli ŭ hetaj krainie i jość vizy. Ci kali pa papiaredniaj vizavaj historyi vidać, što vy byli ŭ krainie, jakaja vydała vizu, — kaža vizavy śpiecyjalist «Studyjatrevieł» Antanina Aparovič. — Kali viza ispanskaja, pakažycie ŭ pašparcie štampy ispanskich aeraportaŭ abo kvitki na samalot u Ispaniju, rachunak-fakturu ź ispanskaha hatela.

Usie lubiać, kab była pravilnaja pieršaja kraina ŭjezdu. Pry hetym mohuć usio roŭna na 4 dni adkryć vizu: chtości pahladzić na vizavuju historyju, a chtości — nie. Usio vielmi randomna.

Taksama vienhry ŭ luby momant mohuć pravieryć broń, navat kali viza ŭžo vydadziena. Byŭ vypadak, kali turyst admianiŭ broń, a pasolstva jamu tut ža anulavała hadavuju vizu, jon nie paśpieŭ pa joj i vyjechać.

Jon dasłaŭ list, što prosta vyrašyŭ pamianiać hatel i ŭžo apłaciŭ inšy, ale było pozna. Ź vienhrami i niemcami ŭ hetym płanie treba akuratna. Košt rašeńnia «pad kluč» — 800-900 rubloŭ, kali nabyvać tur ź vizavaj padtrymkaj, to heta abyjdziecca ŭ 1600 rubloŭ (naprykład, Aŭstryja i Vienhryja na 5 dzion). 

Hrecyja

Hrecyja apieratyŭniej za ŭsich afarmlaje šenhienskuju vizu, ale karotkuju — na 2-3 tydni, vyklučna pad daty tura. Ale bližejšyja słoty ŭ haračy letni siezon buduć dastupnyja praź miesiac ad siońnia. I navat u letni siezon byvajuć admovy — pa słovach turahientaŭ, 15-20%.

Zrešty, kali ŭ inšych pasolstvach ažyjataž, mienavita hreckimi vizami niekatoryja firmy zavablivajuć svaich turystaŭ, jakija zapłacili za tury ŭ Ispaniju, Italiju.

Dla atrymańnia spatrebicca paćvierdžańnie broni hatela, transpartu. Pasłuhi ahienctva ŭ hetym vypadku — 250—350 rubloŭ, plus 65 jeŭra viza i 40 rubloŭ konsulskija zbory.

Mahčyma, pryjdziecca ŭ vizavym centry dapłacić za premium-servis (170 rubloŭ) abo prajm-tajm (120 rubloŭ) — uletku raźmiatajuć usie varyjanty padačy.

Bałharyja

Kraina vydaje turystam u asnoŭnym adnarazovyja vizy, pad pajezdku, ale možna paśpieć navat da kanca žniŭnia. Treba tolki paćvierdžańnie 100% apłaty žylla i transpartu, a kali płanujecie jechać na aŭto — pakazać paśviedčańnie kiroŭcy, strachoŭku i braniravańnie tranzitnych hatelaŭ pa maršrucie ruchu. Kali płanujecie adpačyvać u Bałharyi — možna razhladać hety varyjant.

Ceny na zapis i pakiet dakumientaŭ pačynajucca ad 350 rubloŭ plus apłata ŭ vizavym centry pamieram 280 rubloŭ.

Rumynija

Rumynija adkryvaje pad pajezdku karotkaterminovyja vizy abo na termin ad 3 da 6 miesiacaŭ (vizavaja historyja moža dapamahčy). Taksama patrabujecca paćvierdžańnie apłaty hatela, a nie prosta broń. Čakańnie — dva miesiacy. Vizavaja padtrymka budzie kaštavać 600 rubloŭ. Kvoty na šenhien vielmi maleńkija. Tamu raźličvać na ich mocna nie varta.

Takaja ž situacyja sa Słavakijaj, jakaja adkryvaje turystyčnyja vizy dla Partuhalii. Ale šaniec zapisacca — adzin na tysiaču — dźvie vizy ŭ miesiac!

Italija

Kraina supiarečlivaja, ale samaja žadanaja. Trapić samastojna na padaču składana, svabodnych dat nie dajuć. Vizavy centr Italii prypyniŭ vydaču słotaŭ praz elektronnuju sistemu zapisu, adnavili žyvuju čarhu z 16:00 da 17:00 — «sšytak Aleha».

Ale kali nastojlivy turyst sam znojdzie svabodnaje akno dla zapisu, to ŭsio mahčyma. Italija moža pastavić vizu i na paŭhoda, i na hod navat u čysty pašpart.

U kaho niama volnaha času dziažuryć pad pasolstvam i łavić daty, možna dziejničać praz turapierataraŭ, jakija branirujuć pražyvańnie ź pieralotam (pakietnyja tury z adpačynkam na mory, a taksama kruizy pa Italii i Jeŭropie) i majuć błok miescaŭ u vizavym centry.

Ale i ŭ hetym vypadku płanavać pajezdku varta ŭžo na vosieński siezon — chutčej vizu nie adkryjuć.

Navat pa bolš darahim varyjancie padačy praz pasiarednikaŭ — ad 600 jeŭra — na razhlad zajaŭki ŭ letni siezon u siarednim sychodzić kala miesiaca.

Ispanija

Trapić da ich na padaču taksama ciažka, ale realna. Turahienctvu pryjdziecca zapłacić za rehistracyju ad 350 rubloŭ, jašče ad 250 rubloŭ za pakiet dakumientaŭ i plus 280 rubloŭ pry padačy dakumientaŭ, i jašče plus 200 rubloŭ, kali heta premium-servis u vizavym centry. Razam — ad 880 rubloŭ da 1100 rubloŭ. Termin razhladu — 45 dzion. Razam na ŭsio pra ŭsio — 2-3 miesiacy. A vizu adkryjuć maksimum na miesiac-try, kali vielmi pašancuje.

Važna taksama paćvierdzić finansavyja mahčymaści ŭ raźliku 108 jeŭra na kožny dzień płanavanaj pajezdki. Na heta ispancy źviartajuć asablivuju ŭvahu i praź niedachop srodkaŭ na rachunku nie vyklučanyja admovy.

Francyja

Adno z samych łajalnych pasolstvaŭ, jak i Italija. Turapieratary sychodziacca ŭ mierkavańni, što mienavita hetaja kraina časta vydaje vizy na paŭhoda ci hod navat u čysty pašpart. Ale vizavych centraŭ niama, niama i samastojnaj elektronnaj rehistracyi. Padača tolki praz pasolstva.

Vizy dajuć albo pad tur — ale płanavać pajezdku treba mocna zahadzia (užo na listapad-śniežań), — albo pa zaprašeńni ad svajakoŭ i siabroŭ, pa biznes-kamandziroŭkach, humanitarnych prahramach. Čakańnie — ad niekalkich miesiacaŭ. A pasłuhi pasiarednikaŭ raŭnasilnyja canie tura. Vip-padača kaštuje ad 600 jeŭra.

Darečy, francuzy postfaktum praviarajuć, ci byli vy ŭ Francyi. Kali śladoŭ pražyvańnia nie vyjaviać, moža być anulacyja vizy abo nastupnyja admovy.

Hiermanija

Nie raduje padarožnikaŭ chutkim zapisam. Dla padačy dakumientaŭ pryjdziecca zapaścisia ciarpieńniem na… hod, kali heta turyzm. Ci jak minimum na paŭhoda, kali pa zaprašeńni. Zatoje achvotna vydajuć šmatrazovuju vizu.

Dla turystyčnaj vizy spatrebicca broń hatela, avijabiletaŭ abo maršrutny list z ukazańniem haradoŭ, u jakich płanujecie spyniacca.

Pry hetym niemcy praviarajuć nie tolki broń, ale i zasialeńnie. I kali turyst nie pryjechaŭ — heta viadzie da anulacyi vizy i departacyi. Navat kali vy vyrašycie pamianiać hatel, pra heta treba zahadzia, da pajezdki, papiaredzić ambasadu. Vydatki — tolki na samu vizu — 35 jeŭra i pasłuhi ahienctva za pakiet dakumientaŭ (250-300 rubloŭ). 

Polšča

Polšča samaja darahaja, kali dziejničać praz pasiarednikaŭ. A taksama lidar pa admovach. Pad tur adkryć vizu nie atrymajecca.

Samomu zapisacca ŭ vizavy centr — sapraŭdny kvest. Svabodnych słotaŭ u sotni razoŭ mienš, čym achvotnych zarehistravacca. Pry hetym treba prajści vieryfikacyju ŭ sistemie, i lik idzie na chviliny, pakul chtości inšy nie pierachapiŭ datu.

Dla tych, chto nie hatovy samastojna raźbiracca z anłajn-sistemaj, košt rehistracyi — ad 600 da 1300 rubloŭ za čałavieka.

U astatnim — pry najaŭnaści paćvierdžańnia apłaty hatela i tałona na zapis abzavieścisia vizaj možna ŭsiaho za dva tydni pry stanoŭčym rašeńni konsuła.

Ale admovaŭ Polšča daje vielizarnuju kolkaść, bolš za ŭsich pasolstvaŭ.

Asabliva składana ź vizami pa turyźmie. Tolki vizy pa zaprašeńni i časam pracoŭnyja vizy možna adkryć na bolš praciahły pieryjad, ale i tut byvajuć admoŭnyja rašeńni.

Alena Varaksa, namieśnik dyrektara «Bieł-aryjencir»:

— Jeŭrapiejskija tury ŭ cełym pa rynku za apošnija niekalki hadoŭ padaraželi ŭ paŭtara razu. Ciapier heta ad 850 rubloŭ za aŭtobusny tur z tydniovym adpačynkam na mory. Ale ŭsio roŭna jeduć. I popyt nie mienšy — hrupy za paŭhoda ŭžo sfarmavanyja.

Adkryć vizy stała ciažej, a mnohija turysty pa-raniejšamu płanujuć u apošni momant.

Ale ciapier dla adkryćcia viz patrabujecca 2-4 miesiacy, a nie miesiac, jak raniej.

Kali ŭ turapieratara dobraja reputacyja, to i admovaŭ pa vizach niama. Francuzy zaŭsiody staviać dla turpajezdak paŭhoda, italjancy taksama nie sknarničać, ispancy ŭ siarednim miesiac-try, niemcy — ad troch miesiacaŭ da hoda.

Tak, skaračeńnie dat na padaču jość, ale bolš dla indyvidualnych turystaŭ. Dla turapierataraŭ abmiežavańniaŭ niama (vyklučeńnie — Italija vosieńniu). Popyt na vizy siońnia navat vyšejšy, čym na tury. Nie ŭ apošniuju čarhu vybar Italii i Francyi matyvavany mienavita vizavaj padtrymkaj.

Raniej praktyčna ŭsie turysty, vybirajučy tur, užo mieli vizy. A ciapier usim, chto źviartajecca, patrebna viza. Tamu płanavać svoj adpačynak u Jeŭropie treba mocna zahadzia.

• 0
• 0
• 0
• 0
• 1
• 2
• 0
• 0