Čornyja parečki možna vykarystać tak

Chacia b adzin kust «smurodziny», abo čornaj parečki, jak jaje nazyvajuć pa-knižnamu, možna znajści na kožnym biełaruskim padvorku. Zdaŭna ludzi navučylisia vykarystoŭvać ź jaho nie tolki jahady. Tak, liście čornaj parečki kožnaja haspadynia vykarystaje pry zasołcy i marynavańni harodniny. A z pupyšak hatujuć esencyju i siropy.

Jašče našy prodki vykarystoŭvali śviežyja i suchija jahady pry zachvorvańniach straŭnika i kišečnika, lačeńnia i prafiłaktyki cynhi, padahry, dermatytu, dyjatezu. Harbatu z suchich listoŭ čornych parečak pili pry prastudzie i hrypie, prablemach sa stułam. Ciapier viadoma, što čornaja parečka sadziejničaje zachavańniu zroku i pieraškadžaje raźvićciu chvaroby Alchiejmiera, chvarobaŭ serca i dyjabietu.

Isnuje sotni roznych receptaŭ pierapracoŭki jahad. Kali ŭ vašym marazilniku dastatkova miesca, to najbolš prostym sposabam budzie zamarozić jahady.

Druhi nieskładany sposab zachavańnia ŭradžaju — pracierci jahady z cukram. Kolkaść cukru zaležyć ad vašaha hustu. Ale dla taho, kab jahady dastajali da nastupnaha ŭradžaju, daviadziecca ŭziać paŭtary-dźvie častki cukru na adnu častku jahad. Pierad pracirańniem treba ŭkinuć jahady na 10-15 siekund u kipień.

Bahatyja na piekcin i kisłoty jahady dobra pasujuć dla pryhatavańnia džemaŭ i žele, pavidła, marmieładu, paściły. Chiba što kožnaja haspadynia viedaje svoj admietny recept. My prapanujem niekalki svaich.

Marmieład

Dla pryhatavańnia marmieładu ŭ kastrulu zasypajuć kiłahram mytych parečak. Da ich dadajuć 100 mililitraŭ vady i varać da taho, pakul jahada nie raźmiaknie. Zatym zdymajuć z ahniu i z dapamohaj błendara źbivajuć u piure. Atrymanuju masu prapuskajuć praz drobnaje sita. Da jaje dadajuć 460 hramaŭ cukru, pieramiešvajuć i staviać na nievialiki ahoń. Pry pastajannym pamiešvańni varać 30-35 chvilin.

Pavialičyć

Kab pravieryć hatoŭnaść žele, možna kapnuć niekalki kroplaŭ na talerku. Kali kapla nie raściačecca i praź niekalki chvilin zastynie, to možna źniać z ahniu i raźlić pa formačkach.

Kvas z čornych parečak

U letniuju śpioku vy možacie paradavać svaich blizkich kvasam z čornych parečak. Dla hetaha ŭ 5 litrach kipiačonaj vady spačatku rastvarajuć stałovuju łyžku cukru. Zatym tudy dajuć sok, vycisnuty z adnaho kiłahrama čornych parečak, i 50 hramaŭ draždžej, papiarednie raściortych z čajnaj łyžkaj cukru. Atrymanaja sumieś stavicca ŭ ciopłaje miesca na 2-3 dni. Zatym kvas raźlivajecca pa butelkach i zachoŭvajecca ŭ prachałodnym miescy.

Sałodki chaładnik

Hetaja strava pavinna spadabacca jak małym, tak i darosłym. Dla jaho pryhatavańnia ŭ błendary źmiešvajuć 100 hramaŭ čornych parečak, 250 mililitraŭ kiefiru, 60 hramaŭ śmiatany i 1 čajnuju łyžku cukrovaj pudry.

Pavialičyć

Paśla atrymanaje piure prapuskajuć praz drobnaje sita, kab ačyścić ad škurak jahad. Zatym jaho pieralivajuć u talerku i ŭpryhožvajuć jahadami čornych parečak.

Marynavanyja parečki

Marynavanyja jahady buduć dobrym dadatkam dla smažanaj baraniny ci śvininy. Ich možna taksama vykarystać jak asnovu dla sousu.

Dla pryhatavańnia marynadu na paŭtara litra parečak (try paŭlitrovyja słoiki) treba 450 mililitry vady źmiašać z 100 mililitrami vocatu, 400 hramami cukru, dadać 5 harošyn duchmianaha piercu, 5 butonaŭ harčycy i trochi mołataj karycy.

Chałodny marynad zalivajecca ŭ słoiki na 3/4 vyšyni. Jany staviacca ŭ šyrokuju kastrulu (nie zabudźciesia na dno pakłaści rašotku ci ručnik). Praz try chviliny paśla taho, jak marynad zakipić, słoiki dastajuć i zakručvajuć.

• 4
• 3
• 0
• 1
• 0
• 0
• 0