Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii
Niadaŭniaja prapanova Łukašenki, kab kiraŭniki rajvykankamaŭ pryznačali kiraŭnikoŭ pryvatnych struktur, vyklikała šyroki rezanans i, jak vyhladaje, uładam jon nie spadabaŭsia. Dziela taho rastłumačyć, što ž takoje Łukašenka nasamreč nibyta mieŭ na ŭvazie, daručyli viadomamu prapahandystu Iharu Turu.
Ihar Tur krytykuje apanientaŭ ułady, jakija, pavodle jaho słoŭ, prama śćviardžajuć, što staršyni rajvykankamaŭ buduć pryznačać kiraŭnikoŭ u pryvatnym biznesie, a kab davieści, što nasamreč heta nie tak, cytuje Łukašenku:
«Ničoha strašnaha, kali jon [staršynia rajvykankama] u niejkim sensie budzie pryznačać, zaćviardžać, uzhadniać kiraŭnikoŭ pryvatnych struktur. Tady i ŭpłyŭ budzie ŭ ich na heta».
Tur śćviardžaje, što hetyja słovy, maŭlaŭ — nie pramaja pastanoŭka zadačy, a «razvažańni na naradzie». Taksama jamu padajucca važnymi ahavorki «ŭ niejkim sensie» i varyjantnaść dziejańniaŭ, jakija mohuć rabić kiraŭniki rajonnaj viertykali z kiraŭnikami pryvatnych struktur.
Prapahandyst ličyć, što havorka ŭ hetaj cytacie idzie pieradusim tolki pra ŭzhadnieńnie, i prapanova, maŭlaŭ, «źviadziecca da prava vieta ad ułady na pryznačeńnie kiraŭnikom pryvatnaha biznesu niejkaha subjekta».
Bo, maŭlaŭ, kali pryvatnaja struktura bankrutuje, a dyrektar jaje biasśledna źnikaje, to ŭsie iduć da dziaržavy z prośbaj ab roznaha kštałtu ŭmiašalnictvie i dapamozie. A dziaržava ŭ Biełarusi takaja dobraja, što nie moža pakinuć ludziej sam na sam sa svaimi prablemami i zaŭsiody ratuje achviar pryvatnaha biznesu, «tamu što svaje ž ludzi».
«I kali dziaržava ŭ asobie miascovaj ułady bačyć, što ŭ pryvatny biznes pryznačyć sprabujuć sumnieŭnaha kiraŭnika — lepš adrazu heta zabłakavać, kab papiaredzić prablemy ludziej, jakija potym staršyni vykankama daviadziecca vyrašać».
Prytym Tur śćviardžaje, što niefarmalna, jak heta viadziecca ŭ Biełarusi, padobnaja praktyka i tak užo dziesiacihodździami isnuje, choć zakonami aformlenaja nie była:
«Jość padstavy mierkavać, što ŭ dziaržavy i miascovaj ułady i raniej było i jość «prava vieta» na pryznačeńnie kiraŭnika pryvatnaha biznesu».
Hety niepubličny miechanizm zasnavany
«na pavažlivaj, ale nastojlivaj prośbie da ŭładalnika biznesu pryniać inšaje rašeńnie. Dziesiacihodździami pracuje tak, i nijakaha kryku ad biznesu, kali heta biznes, a nie palityčny kala-biznes».
Bolš taho, sam biznes, maŭlaŭ, «z zadavalnieńniem idzie nasustrač», bo jon «zaŭsiody choča družby ci chacia b kanstruktyŭnych adnosin z uładaj, a nie hordaj i tupavataj «niezaležnaści». Dla jaho nibyta hałoŭnaje ŭ žyćci — kampramis ź dziaržaŭnym biznesam, jaki ŭ rehijonie pradstaŭlaje staršynia rajvykankama.
Tamu, padsumoŭvaje prapahandyst, «prapanova Alaksandra Łukašenki — kateharyčna pravilnaja», a taksama «krutaja dy svoječasovaja».
Łukašenka choča, kab kiraŭniki rajvykankamaŭ pryznačali i dyrektaraŭ pryvatnych struktur
Biełaruskija biznesmieny pradstaŭlali na mižnarodnaj kanfierencyi Zimbabve
Były ministr unutranych spraŭ Biełarusi maje biznes u akupavanym Maryupali
«Niedaloki čałaviek, jaki zajmajecca paklopam». Biełaruska raskazała, jak musiła likvidavać biznes i źjechać paśla napadak Bondaravaj
Jak «kašalok» Łukašenki Zajcaŭ zarablaje na prodažy luksavaha adzieńnia
Kamientary
Nasamreč: nie. Nachabnyja tłumačeńni dla biednych pad durnia.
Adrazu było zrazumieła, što ŭzhadnieńnie kiraŭnikoŭ z pravam vieta heta kantrol nad pryvatnym biźniesam. Kali nie vykonvaješ kamand pa viertykali, ŭzhadnieńnie prypyniajecca, a biźnies hety čas staić.
Pry ŭzhadnieńni buduć pravierki kiraŭnika u KDB i MUS, paśla ŭzhadniać i ŭvieś štat ź ideołahami (kab nie ŭziali na pracu byłych palitviaźniaŭ), paśla pryniać na pracu svajho ideołaha i h.d.
Kamandy pa viertykali heta čarhovy ŭzłom pravavoj sistemy, kali sistema pracuje nie pa praviłach i damoŭlenaściach, a pa chaciełkach źvierchu.
Pakul hetyja małpy z hranatami zusim nie dałomiać cyvilizacyju ŭ dziaržavie, ničoha nie zrazumiejuć. Chacia i tady nie zrazumiejuć, śpišuć na "vorahaŭ".