Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu

Žycharka Mahilova vykłała ŭ TikTok videa pra toje, jak nibyta pryjšła ŭ palikliniku a 5-j ranicy i ŭbačyła tam čarhu ŭ rehistraturu. Rolik razyšoŭsia pa sacsietkach i trapiŭsia na vočy administracyi miedustanovy. Tam pierahledzieli zapisy z kamier i vyjavili, što nasamreč rolik źniaty na paru hadzin paźniej. Ciapier dziaŭčynie pahražajuć kryminalnym artykułam za «dyskredytacyju Biełarusi». Siužet telekanała «Biełaruś 4» pierakazała «Lusterka».

Zaraz rolik žycharki Mahilova vydaleny z TikTok, ale zastaŭsia ŭ sacsietkach niekatorych inšych resursaŭ, jakija jaho pierapościli. Na kadrach vidać, što žančyna zachodzić u mahiloŭskuju palikliniku №6, a tam la rehistratury ŭžo vystraiłasia čarha z naviedvalnikaŭ.

«Heta ja idu a piataj ranicy ŭ palikliniku, spadziajusia, što budu pieršaja», — havorycca ŭ podpisie da videa.

Administracyja palikliniki taksama ŭbačyła rolik i była ździŭlenaja. Tam patłumačyli, što lekary pačynajuć pryjom u 7.30, a patrapić unutr možna tolki z 7-j ranicy. Pa słovach hałoŭnaha ŭrača Taćciany Kandakovaj, byli padniatyja zapisy z kamier videanazirańnia.

Miarkujučy pa dadzienych z kamiery nazirańnia, žančyna pryjšła ŭ palikliniku ŭ 7:27, a nie a 5-j ranicy.

Praź niekalki chvilin viarnułasia, źniała na telefon čarhu i nakiravałasia ŭ bok lifta.

U administracyi śćviardžajuć, što žančyna pryjšła i na nastupny dzień, adnak čerhaŭ u rehistraturu tady nie było. Kiraŭnictva miedustanovy paskardziłasia na «chłuślivaje videa» ŭ milicyju. Hałoŭny ŭrač ličyć, što heta paklop nie tolki na šostuju palikliniku, ale i «na ŭsie arhanizacyi achovy zdaroŭja».

Staršaja pamočnica prakurora pa Mahiloŭskaj vobłaści Alena Šumiejka zajaviła, što ŭ takich videa možna ŭhledzieć «raspaŭsiud zaviedama chłuślivych źviestak ab palityčnym, ekanamičnym, sacyjalnym, vajennym abo mižnarodnym stanoviščy» Biełarusi i pakarać pa adpaviednym artykule 361-1 KK (Dyskredytacyja Respubliki Biełaruś). Jaje sankcyja praduhledžvaje da čatyroch hadoŭ pazbaŭleńnia voli.

Adznačym, što čerhi ŭ biełaruskija palikliniki, u jaki b čas jany ni byli źniatyja, — źjava realnaja: roliki pra ich rehularna źjaŭlajucca ŭ sacsietkach, asabliva ŭ siezon VRVI i pierad pačatkam školnaha navučalnaha hoda. Pry hetym aŭtary takich videa śćviardžajuć, što sapraŭdy vymušanyja zajmać čarhu jašče da pačatku pracy rehistratury — a piataj ranicy, a to i raniej. Prablemu pryznajuć i čynoŭniki ad miedycyny, adnak schilnyja pierakładać vinu na samich pacyjentaŭ. Tak, pa słovach byłoha namieśnika ministra achovy zdaroŭja — hałoŭnaha dziaržaŭnaha sanitarnaha ŭrača Biełarusi Alaksandra Tarasienki, čerhi ŭ rehistratury vystrojvajucca tamu, što «ludzi pryvykli tak žyć»:

«Achova zdaroŭja stanovicca bolš dastupnaj, ale zastajecca čałaviečy faktar. Jość elektronnaja čarha, jość zapis pa tałonach. Ale pacyjent usio roŭna pojdzie biez zapisu pa tałonach, pravakujučy kanfliktnuju situacyju jak dla siabie, tak i dla asiarodździa», — śćviardžaŭ jon.

• 2
• 0
• 1
• 4
• 0
• 0
• 9
• 0