Bramniku zbornaj Rasii zabaranili vyjazdžać u Jeŭropu, pakul nie vypłacić alimienty. Ci zmoža ŭciačy praź Biełaruś?
Z-za zapazyčanaści ŭ pamiery 60 miljonaŭ rasijskich rubloŭ (kala 680 tysiač dalaraŭ) bramniku zbornaj Rasii pa futbole 25-hadovamu Maćvieju Safonavu zabaroniena pakidać terytoryju Rasii, što moža sarvać jahony pierachod u francuzski «Pary-Sen-Žermien».
Pavodle infarmacyi telehram-kanała «Baza», pastanova ab zabaronie na vyjezd była vyniesienaja 6 červienia praź niavypłatu alimientaŭ.
U lutym Safonaŭ prajhraŭ sud svajoj byłoj žoncy, ź jakoj jon raźvioŭsia ŭ 2023 hodzie. Sud abaviazaŭ Safonava vypłačvać 25% svajho dachodu ŭ jakaści alimientaŭ. U vyniku nabiehła kruhłaja suma ŭ 60 miljonaŭ (kala 680 tysiač dalaraŭ).
Pikantnaść situacyi ŭ tym, što ciapier Safonaŭ znachodzicca ŭ Minsku, dzie zbornaja Rasii siońnia ŭviečary maje pravieści matč suprać zbornaj Biełarusi. U vypadku viartańnia ŭ Rasiju jamu budzie zabaroniena pakidać krainu da źniaćcia abmiežavańniaŭ.
Praŭda, u futbalista jość varyjant nie viartacca ŭ Rasiju, a adrazu ź Biełarusi pasprabavać pierasiačy miažu. Ale, uličvajučy ciesnyja suviazi Biełarusi z Rasijaj i rozhałas hetaj spravy, takaja mahčymaść pad vialikim pytańniem. Rasijski juryst Siarhiej Alaksiejeŭ śćviardžaje:
«Tearetyčna, u siłu dziejnaha zakanadaŭstva i damoŭ z Respublikaj Biełaruś, rašeńnie rasijskaha suda na terytoryi Biełarusi ŭ hetaj situacyi maje siłu, a značyć, pamiežnyja słužby Biełarusi nie pavinny ŭ takoj situacyi vypuścić Safonava za miažu. Kali infarmacyja, ustanoŭlenaja sudovymi prystavami-vykanaŭcami, pastupić chutka, to jaho nie pavinny vypuścić».
Pra pierachod rasijskaha bramnika ŭ PSŽ stała viadoma ŭ kancy traŭnia. Suma tranśfieru składzie 20 miljonaŭ jeŭra, a kantrakt budzie raźličany da 2029 hoda.
Kali Kanapackaja stała całkam padkantrolnaja Łukašenku?16
Kamientary