Supracoŭniki Samsung zładzili strajk upieršyniu ŭ historyi kampanii
Zabastoŭka adbyvajecca ŭ toj čas, kali Samsung Electronics zmahajecca za daminujučyja pazicyi siarod inšych technałahičnych kampanij pa vytvorčaści čypaŭ pamiaci — najvažniejšaha kampanienta pieradavych sistem štučnaha intelektu.
U piatnicu prafsajuz paŭdniovakarejskaj kampanii Samsung Electronics zładziŭ strajk upieršyniu za 55-hadovuju historyju kampanii. Takim čynam rabotniki technałahičnaha kanhłamieratu damahajucca pavyšeńnia zarobku, piša Bi-bi-si.
Nacyjanalny prafsajuz Samsung Electronics (NSEU), u jakim składajucca 28 tysiač členaŭ (heta piataja častka ŭsich rabotnikaŭ kampanii), zajaviŭ, što supracoŭniki kampanii ŭ Sieule nie vyjduć na pracu na adzin dzień — u piatnicu 7 červienia, jakaja vypadaje pamiž dziaržaŭnym śviatam u čaćvier i vychodnymi.
Pradstaŭniki prafsajuza zajavili, što niekalki raŭndaŭ pieramovaŭ ab pavyšeńni zarobku i premijach z kiraŭnictvam technałahičnaha hihanta sarvalisia.
«Meta siońniašniaj zabastoŭki-pravieści kanstruktyŭnuju razmovu z kiraŭnictvam», — zajaviŭ Reuters aficyjny pradstaŭnik NSEU Li Chien Kuk.
Samsung Electronics zajaviła, što zabastoŭka nie paŭpłyvała na vytvorčaść i dziełavuju aktyŭnaść kampanii.
«My ščyra supracoŭničali z prafsajuzam i praciahniem pieramovy ź im», — cytuje Reuters pradstaŭnika kampanii.
Pa słovach analitykaŭ, ź jakimi pahavaryła ahienctva Reuters, zabastoŭka naŭrad ci imhnienna akaža ŭpłyŭ na vytvorčaść abo pastaŭki paŭpravadnikoŭ, adnak stvoryć dadatkovy cisk na kampaniju Samsung Electronics, jakaja imkniecca da naroščvańnia ŭpłyvu ŭ halinie raspracoŭki štučnaha intelektu.
U najbujniejšaha ŭ śviecie vytvorcy mikraschiem było niekalki ciažkich hadoŭ. Za histaryčnym deficytam kampjutarnych čypaŭ padčas pandemii karanavirusa nastała padzieńnie popytu na ich u minułym hodzie: spažyviecki apietyt na elektroniku zastavaŭsia słabym z-za hłabalnaj ekanamičnaj niavyznačanaści.
Adnak dziakujučy bumu štučnaha intelektu spravy kampanii pajšli na papraŭku.
U krasaviku Samsung pradstaviła svoj čyp pamiaci LPDDR5X DRAM dla štučnaha intelektu, stvorany pa 12-nanamietrovym techpracesie, jaki zabiaśpiečvaje pieradaču infarmacyi z chutkaściu 10,7 hihabit u siekundu.
U mai Samsung paviedamiła pra bolš čym dziesiacirazovy rost apieracyjnaha prybytku ŭ pieršym kvartale na fonie prahnozaŭ vysokaha popytu na ŠI i čypaŭ vysokaha kłasa — haliny, u jakoj kampanija kankuruje z Intel (INTC) i tajvańskaj TSMC.
Pieravažnaja bolšaść pieradavych mikračypaŭ u śviecie vyrablajecca ŭsiaho ŭ dvuch miescach: Tajvani i Paŭdniovaj Karei. Tajvańskaja pramysłovaść bolš bujnaja i daminujučaja, Paŭdniovaja Kareja imkniecca kinuć joj vyklik.
Kali Kanapackaja stała całkam padkantrolnaja Łukašenku?16
Kamientary