Rudzik padvioŭ sumnyja vyniki pracy Kaardynacyjnaj rady: «Farš u miasarubku nazad nie zamataješ»

«Z samoha pačatku jak by płanavałasia, što KR stanie alternatyŭnym centram siły i jana mieła dla hetaha ŭsie mahčymaści, nieadnarazova ab hetym pisaŭ. I rabiŭ usio mahčymaje, kab heta zrabić», — adznačaje jon

Na žal, pa słovach Rudzika, KR nie stała centram siły, śpikier i inšyja NDAšniki sprabavali praź źliŭ KR zaniać bolš vyhadnaje miesca ŭ užo dziejnaj ekasistemie, ale ničoha nie atrymałasia.

«Pakul sprabavali, kastryravali KR całkam. KR biez Ofisa prezidentki ciapier nie moža zrabić ničoha. I paśla vybaraŭ novy skład nie zmoža. Bo farš u miasarubku nazad nie zamataješ», — kanstatuje Jan Rudzik.

Zamiest prezidentki dla ŭzmacnieńnia mahli b pasprabavać naładzić kanekt z Pałkom Kalinoŭskaha. Ale ž dalej padpisańnia miemarandumu sprava nie zajšła, źviartaje ŭvahu jon.

«Franak da nas pryjazdžaŭ. Svarylisia, adzin inšaha nie razumiejem, bačańnie situacyi i budučyni tatalna roznaje. Ale kanekt jość i razmova idzie: Ofis padtrymaŭ naš zbor na FPV-drony, dziakujučy im, chutka sabrali. I sami chacia b i dva drony, ale ž pieradali. Ad KR zacikaŭlenaści i krokaŭ: nol», — dadaje Rudzik.

«Śpikier i architektar KR Jahoraŭ zamiest PKK vydumaŭ pastavić na šlubnych hienierałaŭ Sachaščyka i Prakopjeva. Nu-nu. Pośpiechaŭ», — iranizuje eks-vice-śpikier.

Što da budučych vybaraŭ, to, na jaho dumku, taksama ničoha dobraha nie dačakacca: «Ciapier KR ščylna asacyjujecca vyklučna z hiendarnymi kvotami. Našyja ludzi kansiervatyŭnyja (dziakuj Bohu), jany takoje nie razumiejuć».

«Navat samaje vidavočnaje: niejkuju supracu z parłamientami krainaŭ ES i Ukrainy nie vypracavali. Z deputatami ŭzajemadziejničaŭ tolki ja, dahetul padtrymlivaju kantant z polskimi PiSaŭcami. Ale ž heta nie dziakujučy KR», — dadaje jon.

Ź plusaŭ:

• Padčas vybaraŭ śpikiera ahučyŭ važnyja tezy, papularyzavaŭ kansiervatyŭna revalucyjny i nacyjanalistyčny dyskurs z novych placovak.
• Chtości pakataŭsia pa Brusielach i Vašynhtonach, pahladzieli śviet i patusavalisia.
• Mahčyma, chtości dziakujučy KR znajšoŭ dadatkovaje finansavańnie dla svaich NDA. Ale ž nie fakt.

Padsumoŭvajučy, Jan Rudzik iści na vybary i ŭvohule marnavać čas «na hetaje šapito» nie raić.

Jon kaža, što PKK budzie raźvivać «Šlach da voli» jak dyjałohavuju i abjadnaŭčuju placoŭku.

«Kali nie atrymlivajecca ŭ hramadskich aktyvistaŭ pabudavać parłamientaryzm, jaho pryjdziecca budavać vajskoŭcam. Poŭnaje adlustravańnie biełaruskaha hramadstva», — padsumoŭvaje jon.

• 15
• 0
• 9
• 33
• 2
• 10
• 5
• 0