Dzicia zhubiła hadzińnik z SIM-kartaj, a chtości aformiŭ na jaje «kredyt», ale spaliŭsia na drobiazi

Žančyna raspaviała, što jaje dzicia niekalki tydniaŭ tamu, u žniŭni, zhubiła dziciačy smart-hadzińnik, u jakim była ŭstaŭlenaja SIM-karta A1 (aformlenaja na samu žančynu). Pošuk vyniku nie daŭ — praz paru dzion jana adnaviła simku z zachavańniem numara, jakuju ŭstanaviła ŭžo ŭ mabilny telefon dziciaci.

Dziaŭčyna asabliva adznačaje: błakavać pieršuju (stračanuju) SIM-kartu pieršapačatkova jana nie płanavała, bo taja «nie daje mahčymaści syści ŭ minus». «Navat kali ŭ dziciaci na bałansie -1 kapiejka, suviaź błakujecca z abodvuch bakoŭ. I ŭvachodnyja, i vychodnyja», — udakładniaje karystalnica.

Niekalki dzion tamu žančyna nie zmahła datelefanavacca da dziciaci i vyrašyła pravieryć bałans na hetym numary — na im utvaryłasia zapazyčanaść sto rubloŭ.

«Ja vielmi ździviłasia, bo na telefonie staić baćkoŭski kantrol: dzicia nie moža samo ściahvać dadatki, zachodzić na veb-staronki, karystacca internetam i ŭsialakimi dadatkami, dzie mohuć śpisać hrošy», — kaža biełaruska.

Paśla zvarotu da apieratara, ź jaje słoŭ, vyśvietliłasia: na numary telefona, pryviazanym u tym liku da SIM-karty, jakaja zhubiłasia razam sa smart-hadzińnikam, niechta — sa słoŭ dziaŭčyny, nieviadomy, jaki zavałodaŭ stračanaj «simkaj», — skarystaŭsia pasłuhaj «A1 kašalok» ź limitam 100 rubloŭ. Na sajcie apieratara ŭdakładniajecca: «A1 kašalok» daje mahčymaść apłaty tavaraŭ, rabot i pasłuh u ARIP albo papaŭnieńnia virtualnaj karty A1 z vykarystańniem hrašovaha limitu ad A1».

«Ja adrazu ž pajechała ŭ ofis apieratara, kab daviedacca, jak takoje zdaryłasia. Mnie patłumačyli, što dla atrymańnia dadzienaj pasłuhi pašpartnyja danyja nie patrebnyja. Nieabchodnaja tolki SIM-karta z numaram telefona, na jaki prychodziać kody», — śćviardžaje dziaŭčyna.

I praciahvaje: «Ja paprasiła zrabić razdrukoŭku čekaŭ, na jakija pasłuhi vydatkavanyja 100 rubloŭ. Čałaviek ździajśniaŭ pakupki, apłaciŭ svoj mabilny telefon. Pamyłkaj stała toje, što čałaviek apłaciŭ dziaržpošlinu imihracyjnaha pašparta, i tam [u zachavanych płaciežnych dakumientach] paznačany jaho proźvišča, imia i doŭhi numar pašparta».

U kancy hutarki biełaruska dadała, što ŭžo źviarnułasia ŭ milicyju.

Što kažuć u A1

Žurnalisty źviarnulisia ŭ pres-słužbu apieratara z prośbaj ab kamientary. I spytali, ci sapraŭdy chapaje tolki kodaŭ z SMS-paviedamleńniaŭ, biez dadatkovaj źvierki danych? Voś što tam adkazali:

— U pieraliku pasłuh kampanii majecca pasłuha «kašalok» ź limitam 100 rubloŭ, ale dastupnaja jana vyklučna paśla aŭtaryzacyi i padklučeńnia jaje ŭ dadatku «A1 bankinh». Srodki pastupajuć na rachunak klijenta i mohuć być vykarystany tolki dla apłaty tavaraŭ, rabot i pasłuh u ARIP albo papaŭnieńnia virtualnaj karty ŭ ramkach hrašovaha limitu. Zrabić heta ŭ smart-hadzińnikach nie ŭjaŭlajecca mahčymym. Dla hetaha pavinien być nieabmiežavany dostup da samoj SIM-karty, jaje nieabchodna pastavić u smartfon i ŭvieści PIN-kod, ustalavać dadatak, prajści aŭtaryzacyju i ŭvieści kody z SMS. Hałoŭnaja rekamiendacyja: ni ŭ jakim razie nie pradastaŭlać dostup da SIM-karcie trecim asobam, a ŭ vypadku jaje straty — nieadkładna błakavać.

U adpaviednaści z punktam 2.3.2 damovy ab akazańni pasłuh elektrasuviazi, klijent abaviazany apieratyŭna paviedamlać pa telefonie kantakt-centra ab stracie abo kradziažy SIM-karty i na praciahu 24 hadzin paćviardžać heta piśmovaj zajavaj, źviarnuŭšysia ŭ centr prodažu i absłuhoŭvańnia kampanii albo ŭ punkt prodažu i absłuhoŭvańnia dylera z dakumientam, jaki śviedčyć asobu. Pry hetym klijent niasie ŭsie mahčymyja vydatki za pasłuhi da faktyčnaha prypynieńnia kampanijaj akazańnia pasłuh pa svaim zvarocie. 

Klijentu kampanii, pakazanamu ŭ zapycie redakcyi, u luby momant mohuć być pradastaŭleny čeki apłat, učynienych ź jaho rachunku telefona ŭ ARIP. U takoha rodu situacyjach kampanija rekamienduje źviartacca ŭ pravaachoŭnyja orhany.

• 1
• 1
• 1
• 6
• 3
• 0
• 3
• 0