Francyja razhladaje mahčymaść dazvolić śpiecnazu i inšym vajskovym farmavańniam pierasiakać miažu Ukrainy — Le Monde
U składanaj situacyi na froncie, kali ŭkrainskija vojski adstupajuć, a adnosna zachodniaj vajskovaj dapamohi zachoŭvajecca niavyznačanaść, prezident Francyi vystupiŭ z zaklikam pierałamać situacyju. I sprava nie tolki ŭ pastaŭkach zbroi.
Jak viadoma, 26 lutaha 2024 hoda pa inicyjatyvie prezidenta Francyi Emanuela Makrona ŭ Paryžy adbyłasia kanfierencyja pa akazańni dapamohi Ukrainie. U svaim vystupleńni jon zajaviŭ, što nielha vyklučać nijakich varyjantaŭ padtrymki, uklučna z uvodam vojskaŭ. Pry hetym jon dadaŭ, što siarod sajuźnikaŭ Ukrainy niama adzinaha mierkavańnia.
Jak piša Le Monde, takija słovy pryŭźniali zasłonu nad faktyčnaj prysutnaściu zachodnich śpiecsłužbaŭ va Ukrainie.
25 lutaha hazieta New York Times apublikavała padrabiaznaje rasśledavańnie, u jakim havorycca ab isnavańni dvanaccaci sakretnych baz CRU ŭzdoŭž miažy pamiž Ukrainaj i Rasijaj. Budaŭnictva hetaj sietki bazaŭ pačałosia jašče ŭ 2014 hodzie. Ciapier, jak śćviardžajuć karespandenty vydańnia, jakija naviedali adnu ź ich, bazy vykarystoŭvajucca dla dapamohi ŭkraincam u arhanizacyi ich «sakretnych apieracyj kamandas».
Z francuzskaha boku maŭkliva pryznajecca tolki prysutnaść va Ukrainie ahientaŭ Hienieralnaha dyrektarata źniešniaj biaśpieki (DGSE), niekatoryja ź jakich źjaŭlajucca vychadcami sa słužbaŭ, jakija śpiecyjalizujucca na apieracyjach u kryzisnych zonach. Ale ni ich kolkaść, ni misii nie byli pradmietam publičnych paviedamleńniaŭ ad pačatku kanfliktu.
Aficyjna francuzskija śpiecnazaŭcy, jakija nie zjaŭlajucca tajemnymi ahientami i znachodziacca pad kamandavańniem Hienieralnaha štaba ŭzbrojenych sił, zaŭsiody spynialisia na ŭkrainskaj miažy, ci to dla navučańnia ŭkrainskich vajskoŭcaŭ, u pryvatnaści ŭ Polščy, ci dla kantrolu za pastaŭkami zbroi.
Adnak, pavodle infarmacyi Le Monde, ideja dazvolić hetym vajskovym instruktaram pierasiakać ukrainskuju miažu, mahčyma, razam ź inšymi zvyčajnymi padraździaleńniami, lažyć u asnovie francuzskaha myśleńnia. Heta ŭjaŭlajecca jak vielmi aściarožny varyjant, daloki ad adpraŭki vielizarnaj kolkaści vojskaŭ, i ŭ pieršuju čarhu razhladajecca jak srodak pastavić Rasiju pierad «stratehičnaj dylemaj».
U zadaču takich padraździaleńniaŭ uvachodziła b navučańnie ŭkraincaŭ, u pryvatnaści, naziemnaj supraćpavietranaj abaronie. Prysutnaść francuzskich sałdat ci sałdat inšych nacyjanalnaściaŭ patencyjna zrabiła b niekatoryja rajony ŭkrainskaj terytoryi biaśpiečnymi i surjozna abmiežavała b siońniašnija niastrymnyja napady Maskvy. Hety patencyjał taksama pavinien akazacca važnym dla abvieščanaha prybyćcia amierykanskich samalotaŭ F-16 va Ukrainu ŭ 2024 hodzie.
Jak piša Le Figaro, patencyjnuju adpraŭku suchaputnych vojskaŭ va Ukrainu Emanuel Makron źbirajecca abmierkavać na sustrečy ź lidarami palityčnych partyj, pradstaŭlenych u parłamiencie, 7 sakavika.
Čytajcie jašče:
Čatyry krainy NATA nie vyklučyli adpraŭki svaich vojskaŭ va Ukrainu
Ekśpiert apisaŭ try mahčymyja scenary ŭdziełu sałdat NATA ŭ vajnie va Ukrainie
Čamu Makron raptam zahavaryŭ pra mahčymy ŭvod zachodnich vojskaŭ va Ukrainu
Makron nie vyklučyŭ mahčymaści adpravić vojski zachodnich krain va Ukrainu
Kamientary