Zamiest žanicha ŭ ZAHS pryjšła milicyja: dziaŭčyna chacieła vyjaznuju rehistracyju šlubu, ale ledź nie atrymała administratyŭku
U Biarezinie žanich ź niaviestaj płanavali zładzić pryhožaje viasielle ŭ siadzibie, jakaja znachodzicca za niekalki kiłamietraŭ ad horada. Dziaŭčyna pajšła ŭ miascovy ZAHS damovicca, kab na miesca viasiella pryjechaŭ supracoŭnik, jaki i zarehistruje šlub. Niečakana historyja skončyłasia vyklikam milicyi, a niaviesta cudam paźbiehła administratyŭki za chulihanstva.
Pra kanflikt, jaki praciahvajecca ź minułaha leta, raspaviała ŭ tyktoku taja samaja niaviesta — błohierka pad nikam juli_j5 (jaje sapraŭdnaje imia Julija Hruzd).
− Ja padała zajavu na vyjazny rośpis. Jana pracuje vielmi daŭno (dziaŭčyna maje na ŭvazie načalnicu Biarezinskaha ZAHSa Natallu Biełavus, jakaja i pravodzić rehistracyju šlubaŭ — «NN»). Ja sama niekali pracavała ŭ vykankamie. Vielmi šmat supracoŭnikaŭ da jaje ŭładkoŭvalisia, ale zvalnialisia, bo ź joj niemahčyma pracavać. Jana ich vyžyvała. Dyk voś, supracoŭnik ZAHSa moža vyjechać, a moža nie vyjechać na rehistracyju − pa žadańni.
Načalnica admoviła niavieście, a taja paprasiła dać joj admovu piśmova. Kali prajšoŭ vyznačany zakonam termin na piśmovy adkaz, Julija znoŭ pryjšła ŭ ZAHS. Ale skončyłasia ŭsio kanfliktam: zahadčyca pačała vyhaniać niaviestu sa svajho kabinieta i navat pasprabavała vybić telefon u jaje z ruk. Dziaŭčyna admoviłasia syści, tady Natalla Biełavus vyklikała narad milicyi.
Dalej žančyny vyśviatlali adnosiny ŭžo ŭ kampanii siłavikoŭ. Biełavus śćviardžała, što niaviesta ŭvarvałasia ŭ jaje kabiniet, kali tam byli inšyja ludzi, i stała parušać hramadski paradak.
Milicyjaniery prahladzieli videa z kamier nazirańnia, a taksama videa z telefona Julii (darečy, na adnym ź ich vidać, što kamieru ŭ svaim kabiniecie Biełavus uklučyła tolki ŭ siaredzinie kanfliktu). U vyniku abiedźviuch žančyn adpuścili.
− Ja vielmi pravilna zrabiła, što ŭklučyła kamieru. Bo kali b nie było majho videazapisu, na mianie b paviesili drobnaje chulihanstva, parušeńnie hramadskaha paradku.
Ale ŭžo šmat miesiacaŭ Julija sprabuje znajści praŭdu. Jana dajšła da staršyni vykankama, napisała zajavu ŭ prakuraturu Biarezinskaha rajona, hienprakuraturu, u Ministerstva justycyi i navat u administracyju Łukašenki. Ale adkaz usiudy adzin: pakarać načalnicu ZAHSa niama za što.
Svaju epapieju błohierka raspaviała ŭ čatyroch videa ŭ tyktoku, jakija nabrali ad 75 tysiač da amal miljona prahladaŭ. Mierkavańni kamientataraŭ padzialilisia: adny ŭpeŭnienyja, što prablema vysmaktanaja z palca, i rajać partnioru Julii ŭciakać ad jaje jak maha dalej. Inšyja padtrymlivajuć dziaŭčynu i ličać, što, kali ŭsie biełarusy nie buduć adstojvać svaje pravy, to ź imi praciahnuć taksama pa-chamsku razmaŭlajuć u dziaržaŭnych ustanovach.
Kali vy chvalujeciesia za asabistaje žyćcio błohierki, to viasielle Julii ŭsio ž adbyłosia.
A voś admova Natalli Biełavus vyhladaje cikava z ulikam taho, što ŭ 2022 hodzie jana ŭ intervju «Biarezinskaj panaramie» raskazvała, jak lubić mienavita vyjaznyja cyrymonii:
− Bolš za ŭsio zapomnilisia mnie vyjaznyja rehistracyi šlubaŭ, jakija prachodzili ŭ Minsku, heta zialonaja zona restarana «Novy Niaśviž», dzie para pradumała ŭsio da samych drabniutkich detalaŭ, usio było aformlena kampazicyjami z žyvych kvietak, była žyvaja muzyka ŭ vykanańni strunnaha kvarteta, a taksama viasielle, jakoje prachodziła ŭ «Minsk-Arenie». Tady ŭsio heta dla mianie było niezvyčajna, sama atmaśfiera była vielmi vieličnaja.
Kamientary