«Jany nie palitviaźni». Mihracyjnaja palicyja Tajłanda prakamientavała zatrymańnie muzykaŭ «Bi-2»
Tajłandskija miedyja paviedamlajuć, što mihracyjnaja palicyja krainy siońnia praviała pres-kanfierencyju z nahody zatrymańnia muzykaŭ hurta «Bi-2» i ich dalejšaha losu. Tam zajavili, što hetaje pytańnie zakranaje nacyjanalnuju biaśpieku Tajłanda, «ale ŭ samim aryšcie palityki niama». Voś što stała viadoma jašče.
Tajłandskaje vydańnie Khaosod Online sa spasyłkaj na pres-kanfierencyju mihracyjnaj palicyi Tajłanda raskryła padrabiaznaści zatrymańnia muzykaŭ hurta «Bi-2».
«Pavodle palicyi, muzykanty byli zatrymanyja z-za adsutnaści dazvołu na pracu. Sprava była pieradadziena śledčym dla zaviadzieńnia kryminalnaj spravy i nakiravańnia parušalnikaŭ u SIZA hałoŭnaha ŭpraŭleńnia mihracyjnaj palicyi.
Adzin z parušalnikaŭ užo byŭ departavany, ale nie ŭ Rasiju», — piša Khaosod Online sa spasyłkaj na tajłandskich palicyjantaŭ.
Palicyjanty taksama zajavili, što pytańnie departacyi astatnich muzykaŭ siońnia ŭviečary razhledzić i Rada nacyjanalnaj biaśpieki krainy, «kab vyrašyć, jakim čynam viarnuć usich na ich radzimu».
Ale pry hetym adznačyli, što nie mohuć departavać muzykaŭ bieź ich pramoj zhody i što jany nie źjaŭlajucca palitviaźniami.
«Rada nacyjanalnaj biaśpieki siońnia razhledzić pytańnie departacyi muzykaŭ. Vydača parušalnikaŭ inšaj krainie adbyvajecca, tolki kali jany nie źjaŭlajucca palitviaźniami, ci nie ździejśnili złačynstva ŭ pracesie departacyi.
Pry hetym mihracyjnaja palicyja nie moža prymusić ich pakinuć krainu, pakul jany nie daduć na heta pramoj zhody. Da taho času jany buduć utrymlivacca pad vartaj», — padkreślili tajłandskija palicyjanty.
Jany dadali, što zatrymanyja muzyki z padvojnym hramadzianstvam nie pahadzilisia viarnucca ŭ krainu pachodžańnia na padstavie ŭjaznych (rasijskich) pašpartoŭ. Nieabchodna ŭzhadnić ich viartańnie z druhoj krainaj ich hramadzianstva.
Taksama členy hurta «Bi-2», pa słovach pravaachoŭnikaŭ, mohuć padać dakumienty na status palityčnaha ŭciekača ŭ Tajłandzie praź mižnarodnyja struktury AAN ci Mižnarodnuju arhanizacyju pa mihracyi, kali jany nie chočuć viartacca na radzimu.
Nahadajem, što 25 studzienia muzykaŭ hurta «Bi-2» zatrymali adrazu paśla kancertu na Pchukiecie. Paviedamlałasia, što jany vystupali biez adpaviednaha dazvołu.
Nastupnym dniom sud pryznačyŭ im štraf, jaki jany apłacili na miescy. Ale potym ich pierazatrymała mihracyjnaja palicyja. Muzykaŭ pieravieźli ŭ Banhkok, dzie vyrašajucca pytańni adnosna ich znachodžańnia ŭ Tajłandzie i krainy mahčymaj departacyi.
Pavodle miascovych zakonaŭ, departacyja pravodzicca pramym avijarejsam u krainu vydačy pašparta.
Hurt «Bi-2» byŭ stvorany ŭ 1988 hodzie ŭ Babrujsku. Zasnavalniki i niaźmiennyja ŭdzielniki — Alaksandr Uman (Šura Bi-2) i Jahor Bortnik (Lova Bi-2). U skład kamandy taksama ŭvachodziać Andrej Zvankoŭ, Maksim Andruščanka, Barys Lifšyc, Hleb Kaladzin i Jan Nikolenka. Usie jany, akramia vyzvalenaha Lovy Bi-2, pakul što znachodziacca pad vartaj u Banhkoku.
Lavon Volski: Kolki rasijskich fanataŭ vyjdzie na Krasnuju płošču z płakatam «Svabodu Bi-2»?
Ci mohuć u biełarusaŭ, jakija ŭdzielničali ŭ pratestach, uźniknuć prablemy, jak u «Bi-2»? Tłumačyć advakat
Paśla vizitu rasijskich dypłamataŭ departacyju ŭ Izrail dla «Bi-2» admianili
«U kamiery latali nieviadomyja mnie nasiakomyja». Raskazvajem pra tajskija turmy, dzie siadziać rokiery z «Bi-2»
«Jeździli-jeździli, a potym ich nie vypuścili». Biełarusy sutykajucca ź jašče adnym vidam represijaŭ1
Kamientary