U Vilni vynieśli vyrak biełarusu za napad na biełaruskuju ambasadu. Pakarańnie jon užo adbyŭ
Pa druhim abvinavačańni, źviazanym sa sprobaj uciačy z-pad aryštu, hramadzianina Biełarusi apraŭdali.
Vilenski haradski akruhovy sud pryznaŭ vinavatym hramadzianina Biełarusi Maćvieja Bialaja ŭ napadzie na ambasadu Biełarusi 20 krasavika 2023 hodu i pryznačyŭ jamu pakarańnie ŭ vyhladzie abmiežavańnia voli na 11 miesiacaŭ z nakiravańniem na papraŭčyja pracy va ŭstanovach achovy zdaroŭja, sacyjalnaha absłuhoŭvańnia abo ŭ niedziaržaŭnych arhanizacyjach, jakija zajmajucca apiekaj starych ludziej abo invalidaŭ, piša Radyjo Svaboda.
U toj ža čas, jak adznačajecca ŭ sudovym rašeńni, sud zaličyŭ u pakarańnie znachodžańnie Maćvieja Bialaja pad vartaj u časie dasudovaha rasśledavańnia.
«Zhodna z artykułam 66 Kryminalnaha kodeksu Litoŭskaj Respubliki, u pryznačanaje pakarańnie ŭklučyć čas časovaha zatrymańnia i znachodžańnia pad vartaj z 20 krasavika da 18 kastryčnika 2023 hodu, pryraŭniać adny sutki časovaha zatrymańnia i aryštu da dvuch sutak abmiežavańnia voli i ličyć, što Maćviej Bialaj adbyŭ pakarańnie», — adznačajecca ŭ rašeńni suda.
Sud pryznaŭ, što dziejańni Maćvieja Bialaja nie pryviali da maštabnaj škody majomaści biełaruskaj ambasady.
Pa druhim abvinavačańni, źviazanym sa sprobaj uciačy z-pad aryštu (č. 1 artykułu 22 i č. 1 artykułu 241 Kryminalnaha kodeksu Litvy), hramadzianina Biełarusi apraŭdali, bo nie znajšli dastatkovych dokazaŭ inkryminavanaha jamu złačynstva. Sud źviarnuŭ uvahu na toje, što kanvairy adklučali videarehistratar, tamu niama poŭnaha zapisu ŭ časie znachodžańnia biełarusa ŭ lakarni, ź jakoj jon nibyta sprabavaŭ uciačy.
Pavodle abvinavačańnia ŭ napadzie na ambasadu biełarusu pahražaŭ aryšt abo pazbaŭleńnie voli na 5 hadoŭ, a pavodle abvinavačańnia ŭ sprobie ŭciokaŭ — aryšt abo pazbaŭleńnie voli na termin da 3 hadoŭ.
«Ja budu abskardžvać hety vyrak. Mnie navat nie nadali jaho pierakład. Abskardzić ja mahu ciaham 20 dzion paśla atrymańnia pierakładu», — paviedamiŭ Svabodzie Maćviej Bialaj.
Sprava ab departacyi jašče razhladajecca
Pavodle Bialaja, 31 studzienia 2024 Najvyšejšy administracyjny sud Litvy razhladaje jahonuju apielacyju na rašeńnie suda pieršaj instancyi ab departacyi z pryčyny taho, što jon stvaraje «pahrozu dla nacyjanalnaj biaśpieki Litvy».
Maćviej Bialaj adsiedzieŭ paŭhoda ŭ śledčym izalatary, a paśla vychadu na volu jon daviedaŭsia ab pryznačeńni inšaha sudovaha pasiadžeńnia pa pytańni ab jahonaj departacyi.
U Mihracyjnym departamiencie Litvy, kudy Svaboda źviartałasia pa kamientar z nahody pazbaŭleńnia Maćvieja Bialaja prytułku i mahčymaj departacyi, admovilisia paviedamlać padrabiaznaści hetaj spravy.
U 2022 hodzie jon atrymaŭ piacihadovy dazvoł na žycharstva ŭ Litvie i status uciekača, zarehistravaŭsia indyvidualnym pradprymalnikam u śfiery budaŭnictva.
U spravie ab napadzie na ambasadu Biełarusi sud vynies vyrak 15 studzienia 2024 hoda.
Pravaabaroncy patrabujuć reabilitacyi Bialaja pa spravach u Biełarusi
24 studzienia 2024 hoda šerah pravaabarončych arhanizacyj Biełarusi vystupili z supolnaj zajavaj, u jakoj patrabavali reabilitacyi asudžanych udzielnikaŭ mirnych schodaŭ.
«Nam viadomyja imiony i abstaviny spravaŭ nastupnych ludziej, jakija ŭ pakarańnie za ažyćciaŭleńnie svabody vykazvańnia mierkavańniaŭ byli pazbaŭlenyja voli: źmieščanyja pad vartu, chatni aryšt, asudžanyja da pazbaŭleńnia abo abmiežavańnia voli, aryštu, a da ciapierašniaha času vyzvalenyja biez reabilitacyi i kampiensacyi naniesienaj škody: Pavieł Hołaŭ, Zachar Janoŭski, Maćviej Bialaj, Dźmitryj Smalaroŭ, Anton Nahieła, Vital Siryška, Viktar Rudźko, Alaksandr Fiedaruk, Uład Maniuk», — adznačałasia ŭ zajavie pravaabaroncaŭ.
Maćviej Bialaj raniej paviedamlaŭ Svabodzie, što ŭ 2021 hodzie jaho zatrymali i pamiaścili ŭ žodzinski izalatar za toje, što sprabavaŭ ustalavać na dźviarach budynku ŭradu bieł-čyrvona-bieły ściah i raźbiŭ tam škło małatkom. Praz paŭhoda jon vyjšaŭ ź izalatara i ŭciok — spačatku ŭ Maskvu, tam atrymaŭ humanitarnuju vizu ŭ Polšču. Jon šukaŭ dapamohu, kab trapić va Ukrainu, ale ŭ vyniku vymušany byŭ niezakonna pierabiracca praź Dzisnu ŭ Litvu.
«Ciapier u Biełarusi pravodziać vobšuki — u baćki, u siastry, vyklikajuć na dopyt usich maich svajakoŭ, siabroŭ, a kolišniuju žonku, ź jakoj my majem syna, zvolnili z pracy za padtrymańnie sa mnoj suviazi. Ciapier užo datyčna mianie nibyta zaviali spravu ab ekstremiźmie. Śledstva viadzie Barysaŭski śledčy kamitet», — raskazvaŭ Maćviej Bialaj u kastryčniku 2023 hoda.
U 2020 hodzie Maćviej Bialaj pracavaŭ kaardynataram u štabie kandydata ŭ prezidenty, staršyni Biełaruskaj sacyjał-demakratyčnaj Hramady Siarhieja Čeračnia. Bialaja ŭ žniŭni 2020 hodu zatrymlivali ŭ Viciebsku. U 2010 hodzie pracavaŭ kaardynataram i źbiraŭ podpisy za kandydata ŭ prezidenty Andreja Sańnikava i ŭdzielničaŭ u padziejach na Płoščy niezaležnaści ŭ Minsku.
Kamientary