«Nu, i što?» Ministra handlu zahnali ŭ tupik «niekanstruktyŭnym» pytańniem pra dziaržrehulavańnie cen

Niajomkaja dla ministra situacyja adbyłasia padčas kanfierencyi «Respublikanski kłub dyrektaraŭ», jakaja prajšła ŭ Minsku 19 studzienia. Vystupajučy na joj, Alaksiej Bahdanaŭ zajaviŭ, što ŭłady nie płanujuć admianiać 713-ju pastanovu ŭrada, jakoj pa inicyjatyvie Łukašenki z kanca 2022 hoda ŭviali surovaje dziaržaŭnaje rehulavańnie cenaŭ.

«Inšaha instrumienta rehulavańnia my nie prydumali. My pakul budziem vybudoŭvać svaju pracu ŭ adpaviednaści z hetaj pastanovaj», — adznačyŭ ministr.

Sa słoŭ čynoŭnika, 713-ja pastanova była «składana ŭspryniataja» i biznesam, i dziaržpradpryjemstvami, ale za hod jaje dziejańnia «ničoha krytyčnaha nie zdaryłasia».

«Tavary jak byli, tak i zastalisia. Pradpryjemstvy pracujuć, kampanii pracujuć, navučylisia pa-novamu ažyćciaŭlać svaju dziejnaść. Tak, niejkija tavary syšli z rynku, zamiaścilisia inšymi, ale heta naturalny praces, jaki adbyvajecca pastajanna pa tych ci inšych pryčynach. Pavodle našych acenak, niehatyŭnaha ŭpłyvu [pastanova ab dziaržrehulavańni cenaŭ] nie akazała na ekanomiku», — zajaviŭ kiraŭnik MARH.

Ale adzin z žurnalistaŭ, jaki prysutničaŭ na kanfierencyi, pasprabavaŭ vyśvietlić u Alaksieja Bahdanava, jakich kryteryjaŭ «strašnaści» jon prytrymlivajecca, kali havoryć, što «ničoha krytyčnaha nie zdaryłasia». I pamiž imi adbyŭsia cikavy dyjałoh.

— Dniami Biełstat vydaŭ statystyku za 11 miesiacaŭ minułaha hoda. Vyručka — plus 11,9%, čysty prybytak — minus 8,1%. Pavialičyłasia kolkaść stratnych pradpryjemstvaŭ, pahoršyłasia rentabielnaść i hetak dalej. Usie pakazčyki ŭ minusie. Pryčym kali paraŭnoŭvać z danymi za 10 miesiacaŭ, vielmi mocna abvaliŭsia čysty prybytak — minus 2,2%. Ja dumaju, i durniu zrazumieła, z čym heta źviazana. Mienavita ŭ kastryčniku vy stali zmahacca z cenami. Vy ciapier zajavili, tavaryš Bahdanaŭ, — ničoha strašnaha nie adbyłosia. Chaciełasia b zrazumieć, daviedacca, dakładniej, u vas: kryteryi «strašnaści» jakija? — spytaŭ žurnalist.

— Vy chto? — spytaŭ Alaksiej Bahdanaŭ.

Ministru rastłumačyli, što pytańnie zadavaŭ adzin z žurnalistaŭ, jaki znachodziŭsia ŭ zale.

— A što za źviestki, adkul vy ich pryviali? — udakładniŭ Alaksiej Bahdanaŭ.

Žurnalist udakładniŭ, što heta źviestki Biełstata za 10 i 11 miesiacaŭ minułaha hoda.

— Nu, i što? — spytaŭ kiraŭnik MARH.

— Vam paŭtaryć jašče raz? — pierapytaŭ žurnalist.

— Dyk ja i biez vas viedaju hetyja ličby. I što? Navat bolš viedajem, čym toje, što vy pryviali. Što nie publikujecca. I što?

— Kryteryi «strašnaści»… Kali ŭ nas u krainie vyručka raście, sabiekošt raście, čysty prybytak padaje, kolkaść stratnych pradpryjemstvaŭ raście. A vy kažacie, što ničoha strašnaha, — udakładniŭ žurnalist. — Potym druhoje pytańnie. Vy kažacie, što nie zvuziŭsia asartymient, u asobnych tolki rečach. Dyk a za košt čaho tady vyrasła kolkaść, jak vy skazali, biełaruskich tavaraŭ, ich abjom u «pracentažy». Mienavita za košt taho, što ŭpaŭ zamiežny. Vy havorycie pra aŭtamatyzacyju pracesu… A kolki było ručnych zajaŭ, skažam tak, pra ŭzdymańnie cany za hod?

— A navošta vam heta? — spytaŭ ministr, a zatym dadaŭ: — Dajcie, moža być, u kahości sapraŭdy jość narmalnyja pytańni, kanstruktyŭnyja.

U vyniku kiraŭnik MARH tak i nie patłumačyŭ, jakich kryteryjaŭ «strašnaści» jon prytrymlivajecca, kali havoryć, što «ničoha krytyčnaha nie zdaryłasia» z-za pastanovy ab dziaržrehulavańni cenaŭ.

Prablema ŭźnikła paśla taho, jak 6 kastryčnika 2022 hoda Alaksandr Łukašenka zabaraniŭ padvyšać ceny. Dla hetaha spačatku ŭviali śpiecyjalnuju dyrektyvu №10, a 19 kastryčnika 2022 hoda ŭrad pryniaŭ alternatyvu joj — pastanovu № 713 ab rehulavańni cen na peŭnyja tavary. Joj uviali hraničnyja nadbaŭki dla imparcioraŭ i handlu. Paśla taho pastanovu nieadnarazova sprabavali palepšyć, unosiačy ŭ jaje roznyja karekciroŭki.

• 11
• 0
• 34
• 20
• 0
• 2
• 6
• 0