U Karelii na miescy masavych rastrełaŭ stalinskich časoŭ ustalujuć pomnik achviaram «finskaj akupacyi»
Na terytoryi miemaryjalnych mohiłak Sandarmoch u Karelii pastaviać stełu z nadpisam «Achviaram represij 1937-1939 hadoŭ i achviaram finskaj akupacyi časoŭ Vialikaj Ajčynnaj vajny». Pra heta sa spasyłkaj na svaje krynicy paviedamiła deputat zaksabrańnia Respubliki Karelija Emilija Słabunova, piša «Važnyje istorii».
«Taki nadpis nie adpaviadaje ŭstalavanamu dziaržaŭnymi dakumientami statutu abjekta, jaki padlahaje dziaržachovie. Heta supiarečyć histaryčnaj praŭdzie»,
— zajaviła palityk. Jana dadała, što nakiravała zapyt u prakuraturu z prośbaj pravieści pravierku.
Ab tym, što ŭrad Karelii płanuje vyłučyć 25,5 młn rasijskich rubloŭ na «dobraŭparadkavańnie» miemaryjała, stała viadoma ŭ kancy 2022 hoda. Pry hetym, srodki vydzialalisia nie ź biudžetu respubliki. «Apynułasia, što heta srodki niejkaha hranta, atrymanaha kiraŭnikom Respubliki Karelija za dasiahnieńnie niejkich pakazčykaŭ», — pisała Słabunova.
Pa słovach deputata, na praciahu hoda čynoŭniki pad roznymi nahodami admaŭlalisia dać joj dostup da prajektu rekanstrukcyi.
U adkazach na zapyty jany śćviardžali, što havorka idzie ab pašyreńni parkoŭki i ŭstalavańni łavaŭ.
Sandarmoch — adno z samych vialikich pachavańniaŭ achviar masavych stalinskich represij 1937-1938 hadoŭ. Rasstrelny palihon byŭ znojdzieny ŭ 1997 hodzie historykam Juryjem Dźmitryjevym.
Svajo «rasśledavańnie» padziej u Sandarmochu ŭ 2018-m hodzie arhanizavali aktyvisty ŭznačalenaha Uładzimiram Miedynskim Rasijskaha vajenna-histaryčnaha tavarystva. Jany zajavili, što va ŭročyščy pachavany viaźni finskich łahieraŭ.
U apošni čas adnosiny pamiž Finlandyjaj i Rasijaj rezka pahoršylisia. Finlandyja stała členam NATA 4 krasavika 2023 hoda. Kraina padała zajaŭku na ŭstupleńnie ŭ Paŭnočnaatłantyčny aljans paśla poŭnamaštabnaha rasijskaha ŭvarvańnia va Ukrainu ŭ lutym 2022 hoda. Da hetaha Finlandyja zachoŭvała niejtralny status.
Praz heta rasijski prezident Uładzimir Pucin paabiacaŭ krainie prablemy.
Ciapier praź mihrancki kryzis Finlandyja zakryła pamiežnyja pierachody z Rasijaj.
«U vas niama budučyni». Rasija idzie pa šlachu Biełarusi — likvidavali samuju značnuju pravaabarončuju arhanizacyju
Maskoŭski teatr admianiŭ premjeru śpiektakla «Kremulatar» pavodle Sašy Filipienki
Pieršy rasstreł biełaruskaj intelihiencyi. 90 hadoŭ spravie «Biełaruskaha nacyjanalnaha centra»: jak heta było arhanizavana
Kamientary