Što za biełaruskaja dyzajnierka Taša Kacuba, pra jakuju napisaŭ polski Vogue
U padborku dyzajnierskich aksiesuaraŭ i juvielirnych vyrabaŭ ad Vogue Polska ŭvajšli vyraby mastački Tašy Kacuba. Raskazvajem, čym viadoma biełaruska i na jakija jaje raboty źviarnuŭ uvahu modny časopis.
Mastačka Taša Kacuba zajaviła pra siabie ŭ 2019 hodzie — tady jana stała pieramožcaj štohadovaj vystavy «Vosieński sałon». Chutka adbyłasia jaje piersanalnaja vystava ŭ minskim Pałacy mastactvaŭ. Adnak, niahledziačy na pośpiech u biełaruskaj art-prastory, paśla vybaraŭ u 2020-m dziaŭčynie pryjšłosia pakinuć stalicu i źjechać u viosku.
Jana vostra pieražyvała padziei tych miesiacaŭ: «U žniŭni 2020 hoda ja žyła ŭ Minsku pobač ź Niamihaj. Adnojčy na pratestach napieradzie pačalisia vybuchi, natoŭp pabieh nazad, maje znajomyja chłopcy raptoŭna spynilisia, ja taksama. Mima, zusim pobač, prabiahali amapaŭcy. Ja hladžu siłavikam u vočy, zaziraju ŭ ich tvary, a jany nas uvohule nie bačać, my byccam stali niabačnymi» — pryznavałasia dziaŭčyna ŭ adnym z intervju.
U hety pieryjad mastačka stvaryła šerah rabot, jakija apisvali jaje bačańnie taho, što adbyvałasia ŭ krainie. Častka tvoraŭ toj pary była pryśviečana rabotnikam siłavych struktur.
Paśla pasadki samalota, na borcie jakoha znachodziŭsia Raman Pratasievič, dziaŭčyna źjechała va Ukrainu, dzie jaje zaśpieła vajna. Praz paru miesiacaŭ zdaryŭsia pierajezd u Polšču.
Polski bamond ź cikavaściu sustreŭ biełaruskuju mastačku. U studzieni 2023-ha adbyłasia jaje pieršaja vystava ŭ Varšavie, a nieŭzabavie raboty Kacuby byli vystaŭleny ŭ Hdańsku.
Ciapier Taša praciahvaje svaju tvorčaść za miežami Biełarusi. U emihracyi dziaŭčyna zapuściła brend adzieńnia i aksiesuaraŭ Katsuba Clothes.
Viadomy modny časopis Vogue Polska źviarnuŭ uvahu na kalekcyju Bricks aŭtarstva talenavitaj mastački.
«U aksiesuarach Tašy jość niešta hodnaje, ale ŭ toj ža čas tryvožnaje, žałobnaje i buntarskaje. Sumki vykanany ŭ formie cehły i majuć hłyboki čorny koler. Elehantny aksiesuar moža stać simvaličnaj zbrojaj, nakiravanaj suprać kryvavych dyktataraŭ i ŭzurpataraŭ», — adznačyli ŭ vydańni.
Žurnalisty časopisa źviarnuli ŭvahu i na kalekcyju adzieńnia People siezona viasna-leta'24, vychad jakoj namiečany na nastupny hod. Kapsuła składajecca z 9 kaściumaŭ, kožny ź jakich, jak piša mastačka, pieradaje nastroj sučasnaha hramadstva.
-
Biełaruskam prapanoŭvajuć vip-šopinh sa stylistkaj u Italii. Bonus — invalid pieršaj hrupy ŭ kampanii. Navošta?
-
«Kab dzieci nie vyhladali, jak maleńkija čynoŭniki». Dyzajnierka padkazvaje, jak vybrać školnuju formu z katałoha «Biellehprama»
-
Stryžak ździviŭ svaim jarkim kaściumam z Super Mario. Dzie jon jaho ŭziaŭ?
KDB zatrymaŭ žančynu, z doma jakoj było źniata videa padzieńnia šachieda ŭ Kalinkavičach38
Kamientary