Śledčy kamitet Rasii zabraŭ z kałonii, dzie pamior palityk Alaksiej Navalny, 75 roznych pazicyj: heta faktyčna ŭsie pradmiety i rečy, ź jakimi kantaktavaŭ Navalny, u tym liku śnieh ź miesca jaho hibieli, piša Rasijskaja słužba Radyjo Svaboda.
U rasparadžeńni śledčych apynuŭsia vopis zabranych abjektaŭ. Siarod ich byli ŭsie asabistyja rečy Navalnaha, uklučajučy vierchniuju vopratku i spodniuju bializnu, matrac, knihi, uzory ježy, zmyvy z bušłata palityka, dva pakiety z 11 tubusami, u jakich lažaŭ śnieh z prahułačnaha dvoryka, vanitavyja masy, paznohci, zmyvy z vusnaŭ, kiściaŭ, z nosa i rota, vałasy, čatyry videarehistratary i materyjały, jakija zastalisia paśla pracy miedykaŭ.
Z 75 pazicyj u śpisie tolki 31 byli, jak miarkujecca, adpraŭlenyja na ekśpiertyzu — nasuprać hetych punktaŭ staić adpaviednaja paznaka. Vyniki ekśpiertyz nieviadomyja.
Pry hetym u pastanovie śledstva ad 26 lipienia paznačana, što ŭ ciele Navalnaha i na jaho rečach nie znajšli «atrutnych arečyvaŭ, ałkaholu, narkatyčnych srodkaŭ».
«Dziejańni śledstva mohuć śviedčyć na karyść taho, što pravaachoŭnyja orhany sprabavali vyklučyć usie pradmiety, na jakich tearetyčna mahli zastavacca ślady atrutnaha rečyva», — prychodzić da vysnovy «daśje».
U materyjałach Śledčaha kamiteta jość šeść viersij pastanovy ab admovie ŭ zaviadzieńni kryminalnaj spravy. U apošniaj, lipieńskaj, vypraŭlenaj dvojčy, havorycca, što pryčyna śmierci — «hipiertaničnaja chvaroba z sasudzistymi i orhannymi paražeńniami, dyfuzny mijakardyjaskleroz, što ŭskładniŭsia raźvićciom acioku hałaŭnoha mozhu, fibrylacyi žałudačkaŭ serca, acioku lohkich». Žonka palityka Julija Navalnaja i jahonyja paplečniki nie vierać u hetuju viersiju i miarkujuć, što Navalnaha zabili.
***
Alaksiej Navalny zahinuŭ 16 lutaha 2024 hoda ŭ kałonii «Palarny voŭk» u horadzie Charp Jamała-Nienieckaj aŭtanomnaj akruhi. Za čas źniavoleńnia jaho adpraŭlali ŭ ŠIZA 27 razoŭ — tam jon pravioŭ amal 300 dzion. Paśla śmierci palityka ŭ haradach Rasii prajšli žałobnyja pikiety, udzielnikaŭ jakich masava zatrymlivali supracoŭniki palicyi.
15 žniŭnia ŭdava Alaksieja Navalnaha Julija atrymała aficyjnuju pastanovu Śledčaha kamiteta Rasii ab admovie ŭ zaviadzieńni kryminalnaj spravy ab śmierci jaje muža. U im havorycca, što palityk pamior u vyniku «kambinavanaha zachvorvańnia». U liku pryčyn nazvanaja ŭ tym liku arytmija.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść38
Kamientary