«Niama telefonaŭ, spatkańniaŭ z taboj, i, naturalna, vaj-faju». Były žurnalist z prezidenckaha puła ŭ kałonii vučycca na zvarščyka
Televiadoŭca, były supracoŭnik ANT, asudžany na try hady kałonij Dźmitryj Siemčanka adbyvaje pakarańnie ŭ kałonii № 22 pad Ivacevičami. U źniavoleńni Siemčanka ŭžo kala paŭhoda. Krynica, jakaja maje kantakty z byłymi viaźniami kałonii, padzialiłasia sa Svabodaj apošnimi źviestkami pra žurnalista.
«Jon trymajecca narmalna, maje roŭnyja adnosiny ź inšymi viaźniami. Vučycca na zvarščyka, u volny čas šmat zajmajecca sportam — jaho časta bačać na spartovaj placoŭcy», — raskazała krynica. Pavodle jaje źviestak, Dźmitryj Siemčanka nie skardzicca na zdaroŭje. Palitviazień znachodzić čas na čytańnie mastackaj litaratury i ŭdaskanalvaje svaju anhlijskuju movu.
«Da jaho dachodziać listy ad svajakoŭ, jość i telefonnyja zvanki. Na volu jamu vychodzić u siaredzinie 2025 hodu. Pratrymajecca!» — miarkuje krynica pra Dźmitryja Siemčanku.
U 2020 hodzie Dźmitryj Siemčanka ŭznačalvaŭ na ANT hetak zvany prezidencki puł — admysłovuju hrupu žurnalistaŭ, jakija aśviatlali aficyjnyja padziei, źviazanyja z Alaksandram Łukašenkam. Pavarotnym punktam u jahonaj karjery stali prezidenckija vybary 2020 hoda. Nieŭzabavie paśla ich žurnalist zvolniŭsia z ANT, a ŭ vieraśni jaho pakarali administracyjnym aryštam za ŭdzieł u pratestavym maršy.
Da 2022 hoda Siemčanka zajmaŭsia hramadskimi suviaziami, pracavaŭ u firmie «Biełahra», a ŭ kancy hodu jaho znoŭ zatrymali i paśla dvuch terminaŭ pa 15 sutak vystavili abvinavačańnie pavodle 130 artykuła Kryminalnaha kodeksu — za «padbuchtorvańnie da inšaj sacyjalnaj varažniečy». U sakaviku 2023 hodu Siemčanku pryznali vinavatym i prysudzili jamu 3 hady źniavoleńnia, jahonaja apielacyjnaja skarha vyniku nie dała.
Ź viaźnic, dzie siadzieŭ Dźmitryj Siemčanka, jon dasyłaŭ napisanyja ŭ niavoli vieršy. Niekatoryja ź ich, jak vierš «Try kroki», a taksama vierš pra biełaruskuju movu, užo publikavalisia raniej. Pavodle krynicaŭ Svabody, tvorčaść palitviaźnia za kratami praciahvajecca. Jany padzialilisia jašče adnym jahonym tvoram.
Tvoj list jak pavietra —
Dychaŭ by, dychaŭ.
Litary — nie nahladziecca.
Vodar z paŭmietra
Ptuškaju dzikaj
Bjecca da serca.
Prosta papiera.
Zvyčajny kanviert.
A dla mianie jak ikona.
Ty maja viera,
Moj zapaviet,
Zorka ŭ darozie dadomu.
Niama telefonaŭ,
Spatkańniaŭ z taboj
I, zrazumieła, vaj-faju.
Stvoranych słovaŭ
Tvajoj rukoj
Suviaź praz kraty prymaju.
Słovy składajucca
Ŭ vusny tvaje,
Niby na pieršym spatkańni.
Znoŭ uśmichajucca,
Byccam u śnie.
Tak vyhladaje kachańnie.
U adnym ź listoŭ na volu Dźmitryj Siemčanka pryznaŭsia: «Pryjemnaja ŭvaha, jakaja nadaje sens maim učynkam i siońniašniamu isnavańniu tut. Minie niejki čas (spadziajusia, što chutka), i ŭ adnym sa znakavych miescaŭ abaviazkova zrobiać pomnik u vyhladzie anioła z paštoŭkaj u adnoj ruce i banderolkaj u druhoj. Zrazumieła, kamu jon budzie pryśviečany».
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary