Dniami rasijskija miedyja paviedamili pra zatrymańnie biełarusa, jaki padarvaŭ mašynu rasijskaha vajskoŭca. My vyśvietlili jahonuju asobu i daviedalisia, čym jon zajmaŭsia.
23 vieraśnia 2023-ha ŭ Džankoi, važnym łahistyčnym centry na poŭnačy Kryma, padarvali mašynu rasijskaha vajskoŭca. Spačatku kazali, što nichto nie paciarpieŭ, ale paśla źmianili pakazańni: maŭlaŭ, paciarpieły vajskoviec usio ž byŭ. Ciapier u padryvie vinavaciać biełarusa — Viačasłava Piskunova.
61-hadovy Piskunoŭ, choć i naradziŭsia ŭ Biełarusi, apošni čas žyŭ u Krymie z sužycielkaj, ź jakoj jany hadavali dvaich niepaŭnaletnich dziaciej. Sacsietak mužčyna nie viadzie.
Nieviadoma, kali dakładna jon upieršyniu vyjechaŭ ź Biełarusi. U Viačasłava było taksama rasijskaje hramadzianstva, ale ŭ 1999-m jon vyjšaŭ ź jaho praz dahiestanski sud — imavierna, tam byŭ vydadzieny jahony pašpart.
U tym ža 1999-m jon pierajechaŭ adniekul u Kalininhrad i atrymaŭ tam rehistracyju. Ale pracavaŭ u Biełarusi — na 2003-ci na kiraŭničaj pasadzie ŭ firmie, jakaja zajmałasia ramontam kampjutaraŭ. Ukrainskija pravy kiroŭcy Viačasłaŭ atrymaŭ u 2004 hodzie ŭ horadzie Sievastopal.
Zhodna z bazaj «Kibierpartyzanaŭ», na 2004-ty Viačasłaŭ, jakomu było tady 42, užo byŭ piensijanieram. Heta moža pakazvać na toje, što ŭ minułym jon słužyŭ u siłavych orhanach.
Zhodna z ukrainskimi rejestrami, farmalna Viačasłaŭ dahetul kiruje tryma ŭkrainskimi kampanijami: «Karter-Krym» (vytvorčaść vyrabaŭ ź bietonu dla budaŭnictva i zdača ŭ arendu nieruchomaj majomaści), «Karter-Poŭdzień» i «1MPZ» (zdača ŭ arendu nieruchomaj majomaści), — a vałodaje jašče adnoj, jakaja nazyvajecca «Linija krasy» i zajmajecca aptovym handlem. Taksama jon zajmaŭsia biznesam u Čechii — z 2008-ha vałodaŭ firmaj Liniakrasa.
Žyŭ mužčyna to ŭ Irkucku, to ŭ Čalabinsku, to ŭ Kalininhradzie, to ŭ Krymie. U 2009-m va Ukrainie jaho abjaŭlali ŭ vyšuk za chulihanstva z prymianieńniem zbroi, ale, vidać, suda pa spravie nie było.
Paśla akupacyi Kryma mužčyna vykupiŭ kampaniju «Karter-Poŭdzień» całkam. A ŭ 2018-m pieradaŭ dolu ŭ joj inšamu čałavieku, choć i zajmaŭ niejki čas u joj kiraŭničuju rolu, vyjšaŭ taksama z doli ŭ češskim biznesie, choć i zastaŭsia kiraŭnikom. U kancy 2020-ha, zhodna z publičnymi dakumientami, jon całkam vyjšaŭ z češskaha biznesu.
Mužčyna mieŭ češski dazvoł na žycharstva i ŭ 2021-m, naprykład, žyŭ u Čechii. Pavodle ŭkrainskich dakumientaŭ, jon byŭ žycharom Kryma, pavodle rasijskich — žycharom Kalininhrada.
Viačasłaŭ u siaredzinie 2022-ha prajhraŭ sud. Jon sprabavaŭ pradać firmu, jakoj raniej vałodaŭ, razam z majomaściu i ŭziaŭ u čałavieka zadatak try miljony rasijskich rubloŭ. Ale nie raskazaŭ kupcu, što suprać firmy «Karter-Krym», jakoj naležyć majomaść, zaviedziena kryminalnaja sprava za machlarstva. Zadatak jamu prysudzili viarnuć.
Imavierna, hrošaj, kab heta zrabić, u jaho nie było, bo na pačatak 2023-ha na im visieła kala dvuch miljonaŭ rasijskich rubloŭ doŭhu (na toj momant — kala 30 tysiač dalaraŭ). Kali vieryć publičnym dakumientam, ź biznesu na hety momant jon vyjšaŭ.
7 kastryčnika 2023-ha Viačasłava Piskunova asudzili za niepadparadkavańnie milicyjantu. Byccam, kali jaho ci to zatrymlivali, ci to praviarali dakumienty, jon sprabavaŭ źbiehčy i admoviŭsia nazvać siabie. Siarod paciarpiełych — padpałkoŭniki, siarod jakich načalnik adździeła baraćby z teraryzmam z Centra «E», viadomaha prymianieńniem da zatrymanych žorstkich katavańniaŭ. U sudzie jon skazaŭ, što kiruje firmaj «Linija krasy» — praŭda, niezrazumieła, jakuju jon mieŭ na ŭvazie.
Za heta Viačasłavu prysudzili 15 sutak aryštu. Vyjści jon musiŭ 22 kastryčnika.
A 24 kastryčnika stała viadoma, što Piskunova zatrymali pa padazreńni ŭ datyčnaści da padryvu mašyny ŭ Krymie.
Padčas pieratrusu, pavodle śćviardžeńniaŭ rasijskich śpiecsłužbistaŭ, u jaho znajšli dva kiłahramy hieksahienu, pistalet-kulamiot i bolš za sotniu patronaŭ. Admietna, što nie pakazali ni samoha Viačasłava, ni jahonaha arsienała.
Ciapier Piskunoŭ pad vartaj i jamu pahražaje šmathadovaje źniavoleńnie. Vinavaciać jaho ŭ sprobie zabojstva, zachoŭvańni zbroi i vybuchoŭki, a taksama naŭmysnym paškodžańni majomaści, kali vieryć rasijskim telehram-kanałam.
Za niezaležnaść Ukrainy ŭ składzie jaje Uzbrojenych sił vajavała, pa niekatorych acenkach, bolš za tysiaču biełarusaŭ, 36 ź ich zahinuli, dvoje trapiła ŭ pałon. Piskunoŭ — heta pieršy vypadak, kali biełarusa zatrymali na akupavanaj terytoryi pa abvinavačańni ŭ dyviersijnaj dziejnaści.
Kali vam važna toje, što robić «Naša Niva», to padtrymać nas možna praz Patreon pa spasyłcy nižej. Tady my zmožam bolš.
«Naša Niva» — bastyjon biełaruščyny
PADTRYMAĆStała viadoma, chto taki Jakucik, pra jakoha pa ŭsioj Biełarusi dapytvali strałkoŭ, i ŭ čym jaho abvinavačvajuć
Naradziŭsia va Ukrainie, byŭ drobnym čynoŭnikam, vajavaŭ u Afrycy. Raskrytaja asoba «Pijaniera», jaki ŭznačaliŭ «Vahnier» u Biełarusi
Pry jakich umovach Ukraina vyzvalić Krym i što z Danieckam? Mierkavańnie Sachaščyka
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8181
Kamientary