Školniki ŭ Rasii vybiehli na placoŭku padčas matča dziela hrošaj ad Mellstroy. Hamialčuk nie zapłaciŭ, a baćkoŭ aštrafavali
Samarskija padletki vyrašyli «zarabić» hrošaj, a ciapier abvinavačvajuć biełaruskaha treš-strymiera ŭ padmanie.
Dva 17-hadovyja padletki vybiehli na placoŭku padčas prafiesijnaha baskietbolnaha matča pamiž «Samaraj» i «Astanoj» 13 sakavika. U rukach adnaho z chłopcaŭ byŭ płakat z nadpisam «Mellstroy» — heta psieŭdanim homielskaha treš-strymiera Andreja Burymy.
Padletki śćviardžajuć, što jany spadziavalisia atrymać ad błohiera 4 miljony rasijskich rubloŭ (41 tysiaču dalaraŭ). Adnak hrošaj jany tak i nie atrymali, paviedamlaje Baza.
Paśla «pierfomansu» chłopcaŭ zatrymali achoŭniki areny, a zatym ich adpravili ŭ palicyju. U adździaleńni jany prabavili da poźniaj nočy, ale vyjšli zadavolenyja: školniki ŭžo abmiarkoŭvali, na što jany patraciać hrošy.
Na nastupny dzień jany źviazalisia z administratarami błohiera — tyja paabiacali zapłacić. Ale paśla hetaha pierastali adkazvać na paviedamleńni. Chłopcy sprabavali pryciahnuć uvahu samoha błohiera. Naprykład, jany adpraŭlali jamu novyja danaty na strym. Ale reakcyi nie było.
Bolš za toje, pa praviłach spabornictvaŭ kamandzie «Samara» za dziejańni padletkaŭ byŭ vypisany štraf 500 tysiač rubloŭ (5 tysiač dalaraŭ). Kłub štraf zapłaciŭ, ale vyrašyŭ patrabavać hrošy z baćkoŭ školnikaŭ.
Tym pryjšłosia brać kredyty, kab vypłacić hety štraf. Akramia taho, jany zapłacili administracyjny štraf za svaich dziaciej.
Homielski błohier Mellstroy atrymaŭ skandalnuju viadomaść u 2020 hodzie, kali padčas adnaho z svaich strymaŭ źbiŭ dziaŭčynu. Paśla hetaha na Burymu była zaviedziena kryminalnaja sprava. U vyniku jon atrymaŭ paŭhoda vypraŭlenčych rabot i štraf.
Mellstroy u cełym rehularna traplaje ŭ skandalnyja naviny, dajučy svaim hledačam varjackija zadańni i abiacajučy ščodryja vypłaty za ich vykanańnie. Tym nie mienš, hetyja abiacańni nie zaŭsiody vykonvajucca.
Tak, litoŭski chłopčyk, jaki z humaram paprasiŭ prezidenta svajoj krainy Hitanasa Naŭsiedu pieradać pryvitańnie Mellstroy, z dvuch miljonaŭ dołaraŭ, jakija byli abiacany za heta, zmoža atrymać, dobra kali, «tolki» 100 tysiač. Inšamu čałavieku było admoŭlena ŭ vypłatach miljarda rasijskich rubloŭ (kala 11 miljonaŭ dalaraŭ) za raźmiaščeńnie nika Mellstroy na Miesiacy.
1 červienia na finale Lihi čempijonaŭ pa futbole ŭ Łondanie na pole vybieh 16-hadovy padletak u futbołcy z łahatypam Mellstroy. Na sudzie jon patłumačyŭ, što błohier abiacaŭ jamu 385 tysiač dalaraŭ. U vyniku padletka asudzili da ŭmoŭnaha terminu na šeść miesiacaŭ i abaviazali apłacić układ na pakryćcio sudovych raschodaŭ.
Kamientary