Babrujčanie arhanizavali ŭ Rasii dźvie narkałabaratoryi, a ŭ sudzie paprasilisia na vajnu va Ukrainie

Žychary Babrujska Uładzisłaŭ i Anton atrymali ŭ Rasii pa 16 hadoŭ kałonii strohaha režymu. Ich spravu razhladaŭ Uładzimirski abłasny sud.

Biełarusaŭ pryznali vinavatymi ŭ tym, što jany stvaryli narkałabaratoryi i vyrablali narkotyki na prodaž — heta značyć u niezakonnaj vytvorčaści i zamachu na niezakonny zbyt narkatyčnych srodkaŭ, učynienych arhanizavanaj hrupaj u asabliva bujnym pamiery i niezakonnym zachoŭvańni prekursoraŭ narkatyčnych srodkaŭ, piša «Mahiloŭ-Anłajn».

Jak vynikaje z materyjałaŭ spravy, babrujčanie pajechali na zarobki ŭ Rasiju, a tam zavierbavalisia ŭ arhanizavanuju złačynnuju hrupu, arhanizatar i kiraŭnik jakoj pa spravie prachodzić jak «nieŭstanoŭlenaja asoba». Maładyja ludzi vykonvali daručeńni svajho kuratara, jakoha, pa ich słovach, ni razu nie bačyli — razmaŭlali praź internet.

Za hod takoj kamandziroŭki babrujčanie paśpieli stvaryć dźvie narkałabaratoryi. Uviesnu minułaha hoda ich zatrymali supracoŭniki FSB u vioscy Niadziurava Kiržackaha rajona, dzie na imia siastry adnaho z babrujčan byŭ nabyty dvuchpaviarchovy dom i ziamielny ŭčastak.

Śledstva ŭstanaviła, što Uładzisłaŭ i Anton paśpieli zvaryć bolš za 6 kh miefiedronu, častku jakoha raźmiaścili ŭ schovankach-zakładkach, a inšuju zachoŭvali doma. Akramia hatovaj pradukcyi, ź niezakonnaha abarotu kanfiskavali zvyš 163 kh prekursoraŭ narkatyčnych rečyvaŭ i bolš za tonu roznych reaktyvaŭ.

Svaju vinu babrujčanie całkam pryznali. Vyznačajučy pamier pakarańnia, sud uličvaŭ asoby biełarusaŭ. U pryvatnaści, abodva raniej nie sudzimyja, navat da administracyjnaj adkaznaści nie pryciahvalisia, pa miescy žycharstva i pa raniejšych miescach pracy charaktaryzujucca stanoŭča. 

Abvinavačanyja pradstavili ŭ sud navat hramaty za ŭdzieł u školnych i spartyŭnych konkursach i hramadskim žyćci. Akramia taho, Uładzisłaŭ paviedamiŭ, što akazvaŭ materyjalnuju dapamohu Babrujskamu dziciačamu domu.

Bolš za toje — u sudzie biełarusy paprasilisia ŭ rasijskuju armiju na vajnu va Ukrainie. U prysudzie paznačana, što sud uličyŭ «pryniasieńnie vybačeńniaŭ pierad hramadstvam za pryčynienuju škodu i namier udzielničać u jakaści dobraachvotnikaŭ u składzie Uzbrojenych sił Rasijskaj Fiederacyi ŭ zonie praviadzieńnia śpiecyjalnaj vajskovaj apieracyi». 

Dalejšy los babrujčan nieviadomy. Pra Viačasłava ŭ sudovych kartatekach naohuł niama źviestak, Anton ža abskardziŭ prysud u apielacyjnym paradku, a zatym i ŭ kasacyjnym. U vieraśni jaho skarha pastupiła ŭ Druhi kasacyjny sud ahulnaj jurysdykcyi. Mahčyma, jana jašče nie razhledžanaja. Ci pajechali biełarusy na vajnu, nieviadoma.

• 0
• 0
• 1
• 2
• 0
• 0
• 0
• 0