Dačka deputata Savinych robić karjeru ŭ Łondanie, u toj čas jak jaje baćka vinavacić Zachad va ŭsich biedach
Stała viadoma, što dačka deputata Pałaty pradstaŭnikoŭ, byłoha pres-sakratara MZS i eks-ambasadara Biełarusi ŭ Turcyi Andreja Savinych Lizavieta davoli daŭno žyvie i pracuje ŭ Vialikabrytanii, jakuju aficyjny Minsk ličyć «niedružalubnaj krainaj». U toj ža čas jaje baćka zajmajecca aktyŭnaj demanizacyjaj Zachadu ŭ vačach biełaruskaha hramadstva. Vydańnie «Lusterka» pasprabavała daviedacca ŭ jaho, ci niama ŭ hetym supiarečnaści.
Uvahu na toje, što 34-hadovaja dačka Andreja Savinych Lizavieta žyvie i pracuje ŭ Vialikabrytanii, źviarnuŭ u svaim telehram-kanale pierformier Uładzisłaŭ Bochan. Praanalizavaŭšy akaŭnty ŭ fejsbuku samoha Andreja Savinych i jahonaj žonki, jon adšukaŭ u sacsietkach ich dačku Lizavietu. U jaje akaŭncie ŭ LinkedIn paznačany miescy vučoby (Ženieva) i pracy (Łondan).
U profili Lizaviety Savinych u sacsietcy LinkedIn paznačana, što ź vieraśnia 2022 hoda i da ciapierašniaha času dziaŭčyna pracuje mieniedžarkaj pa raspracoŭcy rašeńniaŭ u halinie baraćby z admyvańniem hrošaj brytanskaj finansava-techničnaj karparacyi Quantexa. Dahetul jana 11 hadoŭ adpracavała ŭ najbujniejšym pa pamiery aktyvaŭ i rynkavaj kapitalizacyi banku Vialikabrytanii HSBC.
Akramia taho, niejkaja Lizavieta Savinych (Elizaveta Savinykh), jakaja maje brytanskaje hramadzianstva, paznačanaja jak dyrektarka kampanii Canabel Limited, jakaja zajmajecca nieruchomaściu ŭ brytanskim horadzie Lidsie. Pavodle źviestak brytanskaha dziaržaŭnaha servisu i infarmacyi gov.uk, hetaja firma zajmajecca kuplaj, prodažam, zdačaj u arendu i kiravańniem ułasnaj i arandavanaj nieruchomaści. Praŭda, vyhladaje hetaja firma dziŭnaj, bo nie maje ni asobnaha sajta, ni aktyŭnych sacsietak.
Pry hetym usiudy pakazana, što Lizavieta Savinych naradziłasia ŭ śniežni 1988 hoda, i hetaja infarmacyja supadaje z tymi źviestkami pra datu naradžeńnia dački deputata, jakija «Lusterka» atrymała ad abjadnańnia byłych siłavikoŭ Belpol.
Žurnalist «Lusterka» patelefanavaŭ Andreju Savinych i spytaŭ, ci praŭdzivaja infarmacyja pra toje, što jahonaja dačka źjaŭlajecca hramadziankaj Vialikabrytanii i pracuje ŭ kampanijach u hetaj krainie, ale toj razmaŭlać admoviŭsia. Adkazu ad samoj Lizaviety Savinych žurnalisty taksama nie atrymali.
Adkaz «Lusterka» atrymała tolki ad kampanii Quantexa, u jakoj zapytalisia, ci ŭ kursie tam, što dačka biełaruskaha deputata i byłoha čynoŭnika pracuje ŭ ich. A taksama, ci nie aścierahajucca jany praz heta ŭciečki ŭ Biełaruś niejkaj infarmacyi, jakaja dapamoža ŭładam abychodzić sankcyi.
«U kampanii Quantexa dziejničajuć strohija praviły pryjomu na pracu i prahramy navučańnia, jakija harantujuć, što ŭsie siabry našaj kamandy buduć adpaviadać vysokim standartam etyčnych pavodzin, — havorycca ŭ adkazie Quantexa. — Naša kampanija vałodaje nadziejnymi i efiektyŭnymi srodkami kantrolu, jakija zabiaśpiečvajuć biaśpiečnaje i nadziejnaje kiravańnie luboj kanfidencyjnaj infarmacyjaj — techničnaj, stratehičnaj, asabistaj — u adpaviednaści z našymi damoŭnymi i narmatyŭnymi patrabavańniami».
U prapahandysta Mukavozčyka spytali, čamu jahonaja dačka pracuje ŭ ZŠA
«Prosta isteryčna». Deputat Savinych nie moža adyści ad pryjomu ŭ Vienie
Jak Franak Viačorka sprabavaŭ pahutaryć z Andrejem Savinych u Vienie, ale ničoha nie vyjšła
Savinych sprabavaŭ sarvać vystup Cichanoŭskaj pierad PA ABSIE. Ale nie vyjšła, i jon pakinuŭ zału
Kamientary