YouTube testuje funkcyju, pra jakuju daŭno maryli šmatlikija miełamany
YouTube abviaściŭ pra testavańnie na pryładach Android mahčymaści pošuku piesień, kali karystalnik moža prosta napieć miełodyju.
YouTube abviaściŭ ab novym ekśpierymiencie na pryładach Android, jaki vyznačaje pieśniu z dapamohaj napiavańnia. Heta vyhladaje surjoznym krokam u kankurencyi z papularnaj prahramaj Apple dla raspaznańnia muzyki Shazam, z dapamohaj jakoj karystalnik moža znajści nieabchodnuju kampazicyju, zapisaŭšy (abo «prasłuchaŭšy») jaje z dapamohaj prahramy.
Karystalniki, jakija ciapier majuć dostup da ekśpierymientu, mohuć pieraklučycca z hałasavoha pošuku ŭ YouTube na novuju funkcyju pošuku piesień. Ciapier u testavalnikaŭ jość mahčymaść napiavać (biez słoŭ), śpiavać (sa słovami) abo zapisać pieśniu na praciahu troch i bolš siekund, jak u Shazam. Zatym płatforma identyfikuje miełodyju i nakiruje karystalnika da adpaviednych videa YouTube, jakija pakazvajuć mahčymyja varyjanty šukanaj pieśni.
Mahčymaść pošuku pa pieśniach dastupnaja ciapier tolki nievialikaj častcy karystalnikaŭ Android. Kali hetaja funkcyja budzie raspaŭsiudžvacca bolš šyroka, to jana budzie karysnaj dla vielmi vialikaj aŭdytoryi, bo YouTube źjaŭlajecca ci nie najpapularniejšym miescam dla pošuku piesień.
Hety apošni ekśpierymient YouTube, vierahodna, moža padacca niekatorym karystalnikam znajomym. U 2020 hodzie maciarynskaja kampanija Google upieršyniu zapuściła padobnuju mahčymaść u vidžecie Google Search i ŭ Google Assistant, dazvalajučy karystalnikam znachodzić pieśniu, napiavajučy ci naśvistvajučy matyŭ, abo śpiavajučy, kali vy viedajecie słovy. Adnak hałoŭnaja roźnica palahaje ŭ tym, što hetaja ŭžo isnaja funkcyja ad Google patrabuje napiavać na praciahu nie mienš 10-15 siekund, kab identyfikavać pieśniu.
Jak raniej tłumačyŭ Google, funkcyja pabudavanaja na madelach mašynnaha navučańnia, jakija mohuć supastaŭlać hudzieńnie čałavieka z «adbitkam palca» pieśni abo firmovaj miełodyjaj. Kampanija paćvierdziła vydańniu TechCrunch, što novy test YouTube vykarystoŭvaje tuju ž technałohiju, što i ŭžo isnaja funkcyja.
Inšyja prahramy raspaznavańnia muzyki, takija jak SoundHound i MusixMatch, taksama mohuć identyfikavać pieśni praź śpieŭ abo napiavańnie miełodyi. Choć jany nie takija papularnyja ŭ paraŭnańni z YouTube i Google — tym nie mienš, vy možacie pravieryć, jak jany pracujuć, užo ciapier.
Bondarava abrynułasia na muziej Janki Kupały i mastaka Sušu31
Kamientary