Hramadstva55

«Viasielle sarvałasia, zamiest pajezdki na mora ja pajšła ŭ milicyju». Biełarusy zapisvajucca na vizy i miesiacami nie mohuć dačakacca pašpartoŭ

Padajecca, što biełarusy ŭžo pryvykli, što dla atrymańnia šenhienskaj vizy mała prosta žadańnia kudyści vyjechać. Za zapis u pasolstva abo vizavy centr treba pazmahacca (i čaściej za ŭsio vykłaści prystojnuju sumu pasiarednikam). Hetym letam dziasiatki biełarusaŭ nie mohuć dačakacca pašpartoŭ, jakija pajechali ź minskaha ispanskaha vizavaha centra ŭ Maskvu. Zryvajucca adpačynki, jość navat historyja pra admienienaje viasielle. Onliner pasprabavaŭ razabracca, što adbyvajecca. 

U červieni źjaviłasia navina, što ŭ Minsku zapracavaŭ ispanski vizavy centr (paśla hadavoha pierapynku). Patencyjnyja turysty ciešylisia, što zaraz u ich znoŭ źjavicca mahčymaść padavacca na ispanskuju vizu ŭ stalicy. Da hetaha ahienctva adpraŭlała biełarusaŭ u Maskvu, što, pahadziciesia, nie vielmi zručna.

Jak i raniej, rašeńni nakont viz prymajuć nie ŭ nas, heta adbyvajecca ŭ Hienieralnym konsulstvie Ispanii ŭ Rasii, kudy dakumienty pryvoziać kurjerskija słužby. Zatoje z adkryćciom vizavaha centra jak minimum adpała nieabchodnaść u asabistaj padačy.

Z momantu adkryćcia vizavaha centra prajšło ŭžo bolš za dva miesiacy. Dziasiatki, a to i sotni turystaŭ pavinny byli viarnucca z prastornych ispanskich plažaŭ. Ale ščaśliŭčykaŭ, jakim udałosia hetym letam atrymać ispanski šenhien, akazałasia niašmat. U telehram-čacie «Viza ŭ Ispaniju» bolš za 1,5 tysiačy ŭdzielnikaŭ, i tolki adzinki na pytańnie žurnalista adpisalisia ab atrymanaj vizie.

Na pieršy pohlad, usiamu vinoj prablemy z terminami razhladu dakumientaŭ u Hienieralnym konsulstvie Ispanii. Kali adrazu paśla adkryćcia biełarusaŭ aryjentavali na try tydni čakańnia, to ŭžo z 4 lipienia ŭvodnyja pamianialisia: turystaŭ papiaredzili, što dakumienty buduć razhladać šeść tydniaŭ. Adnak akazałasia, što i heta nie miaža.

Zapis idzie — adkul niezadavolenyja?

Jak pakazała praktyka, zakładvać na vizu treba dva miesiacy ci navat bolej. Z tych, chto padavaŭsia ŭ Minsku ŭ pieršych šerahach (heta značyć u kancy červienia), mnohija da hetaha času nie atrymali svaje pašparty nazad.

Naścia addała dakumienty 27 červienia. Upeŭnivaje, što pracaŭniki vizavaha centra tady vyrazna kazali pra try tydni. Svoj adpačynak dziaŭčyna spłanavała z zapasam — na pačatak žniŭnia.

— Ale cudu nie adbyłosia, ja patrapiła ŭ lik tych niaščasnych, chto da hetaha času čakaje svoj pašpart. My sprabavali pieranieści naš aŭtobusny tur na novyja daty — z 27 žniŭnia, ale čas imkliva nabližajecca, a navin niama. Vizavy centr infarmacyi nie daje, rabotniki pišuć, što «dakumienty na razhladzie ŭ konsulstvie». U adpačynak ja, viadoma ž, nie pajdu, pakul mnie nie viernuć dakumienty.

Adkazy vizavaha centra na listy biełarusaŭ

Julija padavałasia na vizu 29 červienia, pajezdku aptymistyčna płanavała na kaniec lipienia. Kali ŭličyć šaścitydniovy intervał na afarmleńnie dakumientaŭ, adpačynak užo tady byŭ pad pahrozaj zryvu. U vyniku prajšło amal dva miesiacy, a pašpartoŭ usio niama.

— Na adpačynak u Ispanii ja ŭžo nie spadziajusia. Pieraniesła svoj vodpusk na pačatak vieraśnia ŭ Turcyi. Ale ciapier vialikija sumnievy, što ja ŭbaču svoj pašpart i paśpieju pajechać choć kudyści! A ja ž užo apłaciła pajezdku, — niervujecca minčanka. — Chutčej za ŭsio, treba rabić novy pašpart terminova, a tamu pisać, što jon zhubleny.

Anatol byŭ rady, kali jamu ŭdałosia zapisacca na padaču dakumientaŭ 27 červienia. Tady jon płanavaŭ pajezdku na siaredzinu žniŭnia.

— Adpačynak pryjšłosia pieranieści. Praz toje, što niama pašparta, nakładvajucca inšyja prablemy. Jakraz u lipieni ŭ mianie skončyŭsia termin dziejańnia zarobkavaj kartki, i biez pašparta novuju nie zabrać… Ja nie mahu karystacca hrašyma.

Praz prablemy ź vizami pryjšłosia pieranosić viasielle

U Kaciaryny, mabyć, samaja emacyjnaja historyja z usich. Sproba zrabić vizu abiarnułasia dla jaje pieranosam viasiella i zvarotam u milicyju.

— Ja padała dakumienty na vizu 5 lipienia. Jak i inšym, mnie abiacali niedzie try tydni na razhlad dakumientaŭ. Dzieviatnaccataha žniŭnia ŭ mianie pavinna było być viasielle, a na 23-je byli nabytyja kvitki ŭ viasielnaje padarožža. Naturalna, nikudy my nie palacieli. Viasielle pryjšłosia pieranieści, dziakuj ZAHSu, što pajšli nasustrač, dali nam čas na rośpis da 5 vieraśnia.

Vasiamnaccataha žniŭnia dziaŭčyna napisała zajavu ŭ milicyju. Kaža, u jaje prosta nie vytrymali niervy, bo tak i nie ŭdałosia atrymać kankretnuju infarmacyju ab ruchu pašpartoŭ ad rabotnikaŭ vizavaha centra. Jana dva razy pakidała zvarot u knizie zaŭvah i prapanoŭ, atrymała adzin adkaz.

— Ja prychodziła ŭ vizavy centr niekalki razoŭ, mnie nie kazali ničoha kankretnaha nakont terminaŭ. Nieadnarazova prasiła dyrektara pahavaryć sa mnoj. Ale čałaviek uvieś čas «u adjeździe», «na abiedzie», «u buchhałteryi». U vyniku ja vyrašyła vyklikać milicyju. Užo ŭ adździaleńni napisała zajavu na niepradstaŭleńnie infarmacyi, i mnie skazali, što ja ŭžo nie pieršaja, raspačata pravierka.

Sproba zrabić vizu akazałasia dla Kaciaryny nie tolki niervovaj, ale i zatratnaj. Spačatku jana zapłaciła 450 rubloŭ inšamu ahienctvu za toje, kab dla jaje znajšli akienca na zapis u VC, i kala 250 rubloŭ pakinuła ŭ samym vizavym centry. Hetaja suma ŭklučaje konsulski zbor (€35), servisny zbor i łahistyčny zbor (za pieramiaščeńnie pašparta).

Admiena viasiella i pajezdki taksama kaštavała hrošaj.

— Nam pašancavała, što mnohija viasielnyja padradčyki ŭvajšli ŭ stanovišča i viarnuli pieradapłatu. Haścinicu mnie taksama ŭdałosia admianić ź nievialikim štrafam. A voś hrošy za avijabilety my stracili (heta kala € 560), — pieraličvaje vydatki Kaciaryna. — Ciapier my znachodzimsia ŭ padviešanym stanie. Vasiamnaccataha žniŭnia ja napisała zajavu na viartańnie pašparta, ale mnie pakul ničoha nie adkazali.

Stracili €3 tys. i kuču niervaŭ

Jašče adna pajezdka sarvałasia —– i kaśmičnyja straty z boku turystaŭ. 

Siamja ŭ składzie traich darosłych i dziciaci kupiła bilety pa maršrucie Vilnia — Barsiełona — Lisabon i ŭ vyniku straciła €1400. Jašče €1500 zhareli za broń hatela ŭ Barsiełonie, bo tam nie było opcyi biaspłatnaj admieny.

Treba pryznać, što biełarusy ryzykavali. Čaćviortaha lipienia jany padali dakumienty, a na 4 žniŭnia zapłanavali pajezdku. Kali stała zrazumieła, što vylet blizka, a pašpartoŭ niama, biełarusy pačali rabić samyja aktyŭnyja dziejańni.

— Napiaredadni pajezdki našy ispanskija siabry pisali listy konsułu z prośbaj chutčej razhledzieć dakumienty. A ŭžo 2 žniŭnia ŭsia naša siamja stajała ŭ Maskvie pad dźviarami konsulstva i prasiła pryniać nas. Achoŭnica skazała, što z 4 lipienia konsulstva kateharyčna zabaraniła puskać ludziej i prasić štości ŭ konsuła. Chacia raniej takaja mahčymaść u ekstrannych vypadkach była. Nam vielmi paspačuvali, ale ničym nie pamahli. Taksama my źjeździli ŭ abodva vizavyja centry ŭ Maskvie — biezvynikova. Pašparty dahetul u konsulstvie na razhladzie.

Dakumienty miesiac jeduć da Maskvy?

Na jakim etapie adbyvajecca zatrymka z dakumientami, skazać ciažka. Adkazvajučy na ​​listy klijentaŭ, pracaŭniki minskaha VC spasyłajucca na toje, što razhladam dakumientaŭ na vizu zajmajecca konsulstva ŭ Maskvie i vizavy centr nijak nie moža paŭpłyvać na hety praces.

U rabotnikaŭ konsulstva zaraz jość prava razhladać zajaŭki 45 dzion u suviazi z tym, što pamiž ES i Rasijaj było spyniena dziejańnie pahadnieńnia ab spraščeńni vizavaha režymu. Mahčyma, biełarusy patrapili pad hetuju chvalu, chacia z našaj krainaj pahadnieńnie pa-raniejšamu dziejničaje, adznačaje dyrektar ahienctva Tutvisa.by Hleb Łaryjonaŭ.

— Inšyja krainy addajuć dakumienty biełarusam značna chutčej. U niemcaŭ termin razhladu zvyčajna składaje 7—8 dzion, u italjancaŭ — da 14, u vienhraŭ — 7—10. Polšča moža addać pašparty za 3 dni, a moža trymać i 15. Termin šeść tydniaŭ fihuruje pakul tolki ŭ Ispanii. Usia praca ciapier idzie praz Rasiju, i pačak dakumientaŭ ad biełarusaŭ, imavierna, hublajecca na fonie vialikaha pačka pašpartoŭ rasijan.

U samim konsulstvie Ispanii prablemu pryznajuć, ale źviartajuć uvahu na ciažkaści z dastaŭkaj dakumientaŭ ź Minska. Voś jaki adkaz z Maskvy my atrymali pa elektronnaj pošcie (pryvodzim pierakład ź ispanskaj):

«Nam viadoma, što ŭ suviazi ź niadaŭnim adkryćciom novaha vizavaha centra ŭ Minsku jość peŭnyja zatrymki ŭ dastaŭcy pašpartoŭ praz łahistyčnyja prablemy z boku BLS International Services (mižnarodnaja kampanija, pradstaŭnictvam jakoj źjaŭlajecca VC u Minsku. — Zaŭv. Onlíner) . My spadziajomsia, što hetyja ciažkaści buduć vyrašanyja ŭ najbližejšy čas, i praca ź vizavymi zajaŭkami vierniecca ŭ narmalnaje rečyšča».

Sudziačy pa ŭsim, heta standartny adkaz. Inšym biełarusam prychodzili listy z padobnaj farmuloŭkaj.

Na prablemy z dastaŭkaj dakumientaŭ ź Minska ŭkazvajuć i nazirańni biełarusaŭ, jakija ŭvažliva sačyli za statusam svaich zajavak (heta možna zrabić anłajn). Naprykład, dziaŭčyna z admienienym viasiellem śćviardžaje, što jaje dakumienty byli pieradadzienyja ŭ konsulstva tolki 1 žniŭnia. I hetuju datu zhadvajuć inšyja paciarpiełyja.

«My padavali dakumienty siamjoj 5 lipienia. Nam abiacali viarnuć ich nie paźniej za 16 žniŭnia z ahavorkaj, što ŭžo praz try tydni možna praviarać status, — raskazvaje Arciom. — Pa statusach: 6 lipienia — status «Zajava na šlachu ŭ konsulstva», 1 žniŭnia jon źmianiŭsia na «Zajavu ŭ konsulstvie Ispanii». I na hetym usio. 

Atrymlivajecca, što amal ceły miesiac pašparty jechali ŭ Maskvu».

«Padača była 4 lipienia. Sudziačy pa statusie, dastaŭlali dakumienty ŭ konsulstva miesiac, u toj čas jak pieršapačatkova kazali pra adpraŭku pašpartoŭ adzin-dva razy na tydzień. U cełym heta niejki nierealny termin. Lubaja kurjerskaja słužba dastaŭlaje dakumienty maksimum tydzień», — dzivicca Liza.

«U nas pašpartoŭ da hetaha času niama, chacia padavalisia 30 červienia. Status da 1 žniŭnia byŭ takim: «Adpraŭlena ŭ konsulstva», — piša ŭ redakcyju Kościa. — Ja, ščyra kažučy, nie asabliva ŭnikaŭ u hety niuans, byŭ upeŭnieny, što kali adpraŭlena, značyć dakumienty ŭžo ŭ konsulstvie. A kali źjaviŭsia status «Na razhladzie», stała zrazumieła, što naŭrad ci my kudyści pajedziem. Dakumienty ŭ hetym statusie ŭžo bolš za dva tydni. Samaje drennaje, što datelefanavacca da vizavaha centra nierealna, navat kali rabić heta kožnuju siekundu. Tam prosta nie biaruć trubku».

Žurnalisty paćviardžajuć: pa telefonie, ukazanym na sajcie, źviazacca z VC nie atrymałasia. Niedastupnymi akazalisia i tyja numary, jakimi abmieńvalisia adzin z adnym udzielniki čata «Viza ŭ Ispanii». Mienavita na niedachop infarmacyi skardzicca bolšaść z tych, chto pahadziŭsia parazmaŭlać z žurnalistami.

Pa elektronnaj pošcie na list adkazali i paabiacali vyjści na suviaź. 

Chto-niebudź uvohule atrymaŭ vizu?

Tak, takija ludzi jość. Havorać, niekatoryja z tych, chto pakidaŭ zajaŭki ŭ kancy červienia, atrymali pašparty na pačatku žniŭnia. Pra hadavyja «mulciki» ad udzielnikaŭ čata žurnalisty nie čuli, tolki pra «miesiačny šenhien».

Kaciaryna z tych, kamu zapavietny štamp u pašpart ukleili paśla paŭtara miesiaca čakańnia.

— Ja padavała dakumienty ŭ vizavym centry Minska 26 červienia, a vizu zapytvała z 27 lipienia. Supracoŭnica zapeŭniła, što za try-čatyry tydni pašpart vierniecca. Ale tolki 27 lipienia status abnaviŭsia na «Zajava znachodzicca ŭ konsulstvie». Ja pytałasia ŭ listach, dzie moj pašpart kataŭsia amal miesiac, ale mnie ničoha nie adkazali. Adzinaccataha žniŭnia pryjšło SMS ab tym, što pašpart možna zabirać. Vynik: viza ŭklejena i dziejničaje z 2 žniŭnia pa 1 vieraśnia. Ujezd adnarazovy.

U vypadku Kaciaryny prajšło amal 10 dzion dziejańnia miesiačnaj vizy, pierš čym joj viarnuli pašpart. Spłanavać pajezdku ŭ Ispaniju dziaŭčyna ŭžo nie paśpiavała.

— Pracu nichto nie admianiaŭ, a adpačynak skončyŭsia, tamu ja tak nikudy i nie źlatała. Kab vykarystać vizu, źjeździła ŭ Litvu.

Alaksiej pryznajecca: praz kvest z atrymańniem vizy hetaje leta dla jaho prajšło ŭ stresie. Ale, paraŭnoŭvajučy svoj dośvied ź inšymi, jon ličyć, što abyšoŭsia lohkim spałocham.

— Ja samastojna zapisaŭsia ŭ vizavy centr na 23 červienia. Pry padačy 10 razoŭ pierapytaŭ, jakija terminy atrymańnia vizy. Mnie abiacali, što ŭsio zrobiać za try tydni. Dalej było doŭhaje čakańnie biez usialakaj infarmacyi. Miesiac sprabavaŭ datelefanavacca — biezvynikova. U listavańni mnie adkazali, što heta transpartnyja vydatki, jany nievinavatyja.

Čaćviortaha žniŭnia ja paprasiŭ błank na viartańnie pašparta i adpraviŭ jaho. A ŭžo 11 žniŭnia status pa majoj zajaŭcy abnaviŭsia, ja zmoh zabrać pašpart. Zapytvaŭ vizu ja na try hady z 23 žniŭnia — mnie dali miesiačnuju z hetaj daty. Ciapier my z žonkaj znachodzimsia ŭ Pałanzie, adpačynak u nas nie sarvaŭsia. Heta značyć, ja trapiŭ u katehoryju ludziej, jakija abyšlisia biez strat, — raspaviadaje chłopiec.

Kali nie Ispanija, dyk jakija varyjanty?

Pierśpiektyva miesiačnaj vizy ciapier natchniaje nie ŭsich. Asnoŭny zapyt u biełarusaŭ, jakija padalisia, siońnia — jak viarnuć pašparty. Ludzi cikaviacca praceduraj adklikańnia dakumientaŭ.

Jak zrazumieła z adkazaŭ vizavaha centra, dla hetaha treba napisać zajavu. Ale znoŭ ža nichto nie harantuje chutkaha viartańnia dakumientaŭ. Klijentaŭ aryjentujuć na tydzień čakańnia i padkreślivajuć, što «vychad dakumientaŭ budzie zaležać ad pracy konsulstva».

Što rabić, kali vam patrebnaja viza i vy spadziavalisia na ispanski vizavy centr? 

U ahienctvach ličać, što hety varyjant pa-raniejšamu nielha śpisvać z rachunkaŭ. Ale, zapisvajučysia na Ispaniju, treba być hatovymi da praciahłaha čakańnia. Kali vy chočacie atrymać šenhien harantavana na praciahu miesiaca, lepš razhledzieć Hrecyju.

— Heta samy realny varyjant, choć i nie vielmi zručny. Reč u tym, što Hrecyja amal zaŭsiody stavić adnarazovyja vizy. Šenhien na paŭhoda — heta vyklučeńnie, — kamientuje Hleb Łaryjonaŭ.

Tym, chto choča atrymać vizy na hod-dva, śpiecyjalist raić padavacca praź vizavy centr Italii ŭ Minsku ci pasolstva Hiermanii.

— U Niamieččynu padača na turystyčny šenhien ciapier idzie na krasavik. Kali jość zaprašeńnie, možna zapisacca na studzień. Na Italiju my łovim daty na vierasień, ale možna asabista padyści ŭ vizavy centr Italii i biaspłatna zapisacca ŭ sšytak. Vam patelefanujuć, napeŭna, u listapadzie-śniežni. Vizy dajuć dobra: časam adnarazovyja, a časam na paŭhoda-hod-dva. I pa-raniejšamu pracoŭnym zastajecca varyjant ź Vienhryjaj, jany 50/50 dajuć adnarazovyja i na dva-try hady. Niazručnaść tolki ŭ tym, što treba poŭnaściu zahadzia apłačvać hatel. I jość prablemy z zapisam, jak i pa mnohich inšych kirunkach, — padsumoŭvaje dyrektar ahienctva Tutvisa.by.

Kamientary5

  • Hańba
    24.08.2023
    Žestačajšyja prablemy pieraharnuŭšych staronku. Darahaja redakcyja, lepš pišycie pra hiemaroj - heta prablema sapraŭdy cikavić pałovu čałaviectva.
  • Čas nažej
    24.08.2023
    Skažycie padziaku skacinie, jakaja uciahnuła Biełaruś u vajnu.
  • fighter
    24.08.2023
    Hańba, 👍:⁠-⁠)

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta7

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta

Usie naviny →
Usie naviny

Borys Džonsan raskazaŭ, u čym źmiest mirnaha płana Donalda Trampa pa Ukrainie7

Łukašenka: My «kinuli jakar» u Rasii i Kitai, ale treba znachodzić šlachi supracoŭnictva i ź ES4

«U Biełaruś Kryhier zajechaŭ turystam». Źjavilisia novyja padrabiaznaści pra niemca, prysudžanaha da rasstrełu12

Namieśnik kiraŭnika MZS Polščy nazvaŭ try ŭmovy narmalizacyi adnosin ź Minskam9

Za «abrazu pradstaŭnika ŭłady» mastačcy z Połacka pryznačyli prymusovaje lačeńnie. Jana viarnułasia z Polščy3

«Ź lohkim vietram» i «Narešcie, bro» — što pišuć Bajdenu ŭ tvitary

Stryžak raskazaŭ, ci ŭziaŭ by miljon dalaraŭ ad Čyža6

U Biełarusi źjavicca nacyjanalny videachostynh — vidieo.bieł 10

Džej Ło pierastała nasić zaručalny piarścionak. Kaniec historyi kachańnia

bolš čytanych navin
bolš łajkanych navin

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta7

«50 hadzin u apošniaj dyktatury Jeŭropy». U Biełaruś pryjechali miehapapularnyja błohiery z ZŠA i Kanady — voś navošta

Hałoŭnaje
Usie naviny →