Jašče adnaho biełarusa departujuć z Rasii za ŭdzieł u pratestach. Jaho prosta zaraz viazuć da miažy

Zatrymanaha kličuć Dzianis Chachłoŭ, i jamu 45 hadoŭ. Mužčyna žyŭ u Kruhłym.

Dzianisa pieraśledujuć pa «narodnym» 342-m artykule za ŭdzieł u demanstracyi 23 žniŭnia 2020-ha hoda — druhim vialikim niadzielnym maršy ŭ Minsku. 

Spravu zaviali i na jahonaha pryjomnaha syna Uładzisłava Łahucienku, jakoha adrazu źmiaścili pad vartu i paśpieli navat asudzić na 2,5 hoda «chatniaj chimii». Pa našych źviestkach, prakuratura padała pratest na prysud, kab zamianić jaho na bolš strohi.

Chachłoŭ u pačatku lutaha 2023-ha ekstranna vyjechaŭ u Rasiju, kab paźbiehnuć pieraśledu, viedajučy, što jaho šukajuć. A ŭ červieni vyrašyŭ vyjechać z Rasii ŭ Hruziju, ale nie zdoleŭ. Jaho zatrymali 11 červienia ŭ Kabardzina-Bałkaryi i pieravieźli ŭ IČU ŭ horad Nalčyk.

Ale reč u tym, što ŭ Rasii nie isnuje anałaha artykuła 342, «dziejańni, jakija hruba parušajuć hramadski paradak». Za chadźbu pa darohach padčas pratestaŭ isnuje tolki administracyjnaje pakarańnie, terminy jakoha daŭno vyjšli. Tamu ŭ departacyi rasijskaja prakuratura admoviła.

Zatoje ŭ inšym sudzie, kudy mužčynu pryvieźli 13 lipienia, jamu naznačyli administratyŭny štraf za «pieravyšeńnie maksimalnaha terminu znachodžańnia ŭ Rasii biez rehistracyi». Z-za krataŭ mužčynu nie vypuścili.

Jaho pierazatrymali i źmiaścili ŭ Centr časovaha znachodžańnia inšaziemcaŭ. U jakaści dokazu taho, što Dzianisa treba trymać pad vartaj da departacyi, było toje, što jon u vyšuku ŭ Biełarusi, niahledziačy na toje, što pa rasijskich zakonach jon całkam nievinavaty. Skarhi i zvaroty da aficyjnych orhanaŭ, jakija pisali rasijskija pravaabaroncy, vyniku nie dali.

Siońnia mužčynu vyvieźli ŭ Maskvu — ciapier jon znachodzicca ŭ adnym z aeraportaŭ horada. Nastupnym rejsam jaho zmusiać vylacieć u Biełaruś, dzie jaho ŭžo čakajuć biełaruskija siłaviki. U rasijskich pravaabaroncaŭ niama sumnievaŭ, što jaho adrazu pa prylocie zatrymajuć.

Juryst-pravaabaroncy Raman Kisialoŭ raskazaŭ nam, što jany viaduć spravu Chachłova ad samaha pačatku.

Raman ličyć, što pamiž śpiecsłužbami Rasii i Biełarusi jość niešta kštałtu damovy. Rasija svaich hramadzianaŭ nie vydaje, ale viadomyja vypadki, kali spravy, naprykład, pa artykule za «abrazu Łukašenki» ŭ adras rasijanaŭ prychodzili ź Biełarusi. Praŭda, usie jany skončylisia štrafami, bo ŭ rasijskim kryminalnym kodeksie niama takoha artykuła, jość tolki mienš strohija. Taksama ź Biełarusi ŭ Rasiju vydali Alaksieja Maskalova ŭ krasaviku, choć artykuła za «dyskredytacyju vojska» ci jahonych anałahaŭ u biełaruskim Kryminalnym kodeksie nie isnuje.

Pa słovach Ramana, kali jany chočuć departavać niekaha, to znojduć padstavu. Naprykład, heta moža być toje, što čałaviek žyvie nie pa miescy rehistracyi — choć, pa słovach Ramana, tam nie žyvie vielmi šmat ludziej (heta jak u Biełarusi žyć nie pa prapiscy). U takoj situacyi sud taksama moža rekamiendavać departavać čałavieka. Takaja historyja była ŭ palitviaźnia Juryja Kaściuka.

«Va ŭsich vypadkach, kali biełarusy zatrymlivalisia ŭ Rasii pa kryminalnych spravach, zaviedzienych u Biełarusi, tak adbyłosia. Navat paśla admovy vydačy pa kryminalnaj spravie ich pierazatrymlivajuć i sprabujuć «pryšyć» im administracyjnaje parušeńnie.

Paśla rašeńnia pra vydaču ŭžo amal niemahčyma abaranić čałavieka. Siońnia Dzianis pazvaniŭ mnie i skazaŭ, što jaho siońnia paviazuć u Biełaruś.

A kali jaho pasadziać na rejs da Minska, to jamu harantavany kryminalny pieraśled. I my baimsia, što jamu adpomściać za toje, što jon źbieh, i daduć realnaje pazbaŭleńnie voli», — padsumoŭvaje Raman.

• 1
• 0
• 1
• 0
• 0
• 2
• 16
• 0