«Miesca ŭ trochpakajoŭcy, dzie pražyvaje 4-6 studentaŭ, zdaju pa 70 dalaraŭ». Jak rost dalara ŭpłyvaje na arendu
Staŭki na arendu žytła tradycyjna pryviazany da dalara, adnosna jakoha biełaruski rubiel apošni miesiac vielmi nie stabilny. Spytali ŭ arendadaŭcaŭ i arandataraŭ, jak rynak reahuje na kursavyja vahańni.
Minsk
Čytačy ź Minska ŭžo hod zdajuć adnapakajoŭku-studyju na 38 «kvadrataŭ» za 670 rubloŭ.
«Canu jak adrazu zamacavali ŭ rublach, tak i nie mieniali, kab nie šukać inšych žylcoŭ», — kaža čytačka.
Inšyja surazmoŭcy ź Minska zdajuć jeŭradvušku ŭ Novaj Baravoj za 370 dalaraŭ u miesiac.
«Kvatera zdajecca ŭžo bolš za hod, arandatary — siabry znajomych. Cana ad pačatku była nie vysokaja, kali zdavali, kurs dalara byŭ na piku, prykładna, jak i ciapier. Arandatary za ŭvieś čas pytańnie cany nie padymali, zaŭždy spraŭna płacili damoŭlenyja $370. My sa svajho boku adviazvacca ad staŭki ŭ valucie nie źbirajemsia, bo žyviem za miažoj i rubli nas nie vielmi cikaviać», — pryznajecca čytačka.
Taksama surazmoŭca adznačaje, što padymać staŭki pa arendzie nie źbirajecca, choć i razumieje, što pry žadańni možna zdavać hetuju kvateru krychu daražej.
«Ale heta dadatkovyja kłopaty, plus treba razumieć, što ciapier niama vysokaha popytu na kvatery, tamu navat miesiac prastoju pryniasie nam minus 400 dalaraŭ, bo treba jašče i za kamunalnyja pasłuhi zapłacić. U vyniku my paličyli, što lepiej stabilna zdavać pa 370, čym šukać niekaha, chto budzie płacić 400 ci 450.
Tym bolš, što našyja arandatary nam padabajucca i nakolki my viedajem, źjazdžać bližejšym časam jany nie płanujuć», — kaža žančyna.
Hrodna
Čytačka z Hrodna, jakaja ŭžo niekalki hadoŭ zdaje łožak-miescy studentam, adznačaje, što ciaham niekalkich hadoŭ staŭki pakidaje bieź źmienaŭ.
«Miesca ŭ trochpakajoŭcy, dzie pražyvaje 4-6 studentaŭ, kaštuje 70 dalaraŭ u miesiac. U ahučany košt uklučany kamunalnyja pasłuhi», — kaža čytačka.
Žančyna kaža, što staŭki zafiksavanyja ŭ dalarach i źmianiać heta jana nie źbirajecca. Choć pry kožnym prasiadańni rubla i čuje takija prapanovy.
«Uźnikaje pytańnie, pa jakim kursie budziem fiksavać canu i što budziem rabić, kali kurs znoŭ stanie mienšym, jak heta nieadnarazova było? Vynikaje, što arandatary chočuć zafiksavać, naprykład pa 3 rubli za dalar, ale kali stanie 2,8, to paprosiać źnižku. Vyhladaje nie nadta», — dzielicca žančyna.
Tamu trymaje canu, zafiksavanuju ŭ dalarach ZŠA.
Tym nie mienš, čytačka adznačaje, što popyt na žytło ad studentaŭ patrochi skaračajecca.
«Internataŭ stała bolš, a studentaŭ krychu mienš. Ale tym nie mienš, popyt jość i kvatery zasielacca i na takich umovach».
Inšy čytač z Hrodna, jaki zdymaje adnapakajoŭku za 150 dalaraŭ u miesiac, kaža, što, niahledziačy na prasiadańnie rubla, haspadary kvatery niadaŭna zajavili, što chočuć padniać staŭku na 20 dalaraŭ.
«Mianie heta vielmi ździviła, bo dalar i biez taho mocna padaražeŭ i ŭ našych hrošach arenda stała daražejšaj. Daviałosia tłumačyć haspadaru, što heta niełahičny krok. Tym bolš, što ja, jak i bolšaść biełarusaŭ, zarpłatu maju ŭ rublach», — raspaviadaje čytač.
Mahiloŭ
Čytač z Mahilova zdaje dvuchpakajoŭku na ŭskrajku horada za 450 rubloŭ u miesiac. Cana zafiksavanaja ŭ rublach. Płošča kvatery pad 50 «kvadrataŭ».
Mužčyna pačaŭ zdavać kvateru jašče ŭ 2012 hodzie, tamu pamiataje, jak pry kancy 2014 hoda mocna źnizilisia staŭki na arendu.
Apošnija arandatary žyvuć u jahonaj kvateru ŭžo nie pieršy hod
«Ja nie pryviazvajusia da kursu dalara. Ludzi zarablajuć u asnoŭnym u rublach, tamu hetyja vahańni im i mnie tolki lišni kłopat i niervy. Damaŭlajemsia pa canie ŭ rublach, potym raz u paŭhoda-hod pry vialikaj inflacyi pavialičvajem staŭku», — kaža čytač.
Pa jahonych słovach, hod tamu jamu płacili 400 rubloŭ za arendu, a dva hady tamu — 380. To-bok faktyčna staŭka nie paśpiavaje ni za rostam kursu, ni za inflacyjaj. Tym nie mienš, fiksavać canu ŭ dalarach mužčyna nie źbirajecca.
«Mnie niavyhadna kali ludzi źjazdžajuć, ja hublaju čas, pakul šukaju novych. Da taho ž treba prybracca, niekalki razoŭ źjeździć, kab pakazać kvateru. Heta lišnija vydatki», — tłumačyć mužčyna.
Taksama mužčyna adznačaje, što, pa jahonych nazirańniach, za apošnija dva hady, popyt na doŭhaterminovuju arendu kvater u Mahilovie źniziŭsia.
Ci nie stanie Novaja Baravaja spalnikam i ci płanuje jaje zabudoŭščyk iści ŭ rehijony?
Hrodziency ad śvitanku vystrojvajucca ŭ čerhi, kab nabyć novyja kvatery ad dziaržzabudoŭščyka. U čym pryčyna?
U Breście zdajecca kvatera za 1000 dalaraŭ na miesiac. Sapraŭdy nastolki šykoŭny varyjant?
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ1
Kamientary