Historyja z zahinułaj rybaj pad Maładziečnam praciahvajecca, jaje vyjavili na inšym voziery. Miascovyja žychary jaje jaduć
U techničnym vadajomie ŭ vioscy Malinoŭščyna Maładziečanskaha rajona kala śpirtaharełačnaha zavoda «Akvadziŭ» uspłyła miortvaja ryba. Uviečary ŭ piatnicu na miesca vyjazdžaŭ učastkovy milicyjant, jaki dapytvaŭ ludziej i składaŭ dakumienty, piša Kraj.by.
Historyja z masavaj hibiellu ryby ŭ vadajomach Lebiedzieŭskaha sielsavieta praciahvajecca. Spačatku 29 lipienia mor byŭ znojdzieny na voziery z płatnaj rybałkaj pamiž vioskami Viažuci i Turec-Bajary, jakoje aranduje fiermierskaja haspadarka «La piasku».
Z 29 lipienia da 2 žniŭnia rabotniki haspadarki vyłavili z vadajoma 2 tony 640 kiłahramaŭ zahinułych karpaŭ, taŭstałobika, amura, ščupaka, akunia i płotki.
Miortvuju rybu ŭ techničnym vadajomie pobač z terytoryjaj śpirtaharełačnaha zavoda «Akvadziŭ» u Malinoŭščynie 4 žniŭnia zaŭvažyŭ administratar fiermierskaj haspadarki «La piasku» Viktar Hančarenka. Jon ličyć, što pryčyna hibieli ryby źviazanaja z vytvorčaściu na «Akvadzivie».
Pavodle viersii Hančarenki, mor, zaŭvažany ŭ Malinoŭščynie, dakazvaje dačynieńnie zavoda da incydentu na voziery kala Viažuciaŭ, bo vada z hetaha techničnaha vadajoma pa kanavach ciače ŭ ich vadajom.
Viktar 7 žniŭnia raspavioŭ nastupnaje:
— U piatnicu ŭ Malinoŭščynie ja zaŭvažyŭ miortvych karasioŭ. Prosta adtul patelefanavaŭ pa telefonie 102, i da mianie dasłali ŭčastkovaha. Było kala 17:00, tamu kiraŭnictva zavoda na miescy nie zaśpieli, a achoŭniki nijakich kamientaroŭ davać nie zachacieli. Učastkovy skłaŭ papieru, apytaŭ miascovych žycharoŭ. Darečy, hetych karasioŭ usia vioska źbirała. Ja čuŭ, što znajšli navat soma na 97 santymietraŭ. Miascovyja žychary kažuć, što karasi dochnuć nie ad chvarob, a ad niedachopu kisłarodu ŭ vadzie. U ich žabram kaput, i hetuju rybu možna jeści. Tych karasioŭ, jakija bolšyja, ludzi sušać i jaduć sami, a drobiaź addajuć kuram.
Akramia taho, u fiermierskaj haspadarcy «La piasku» čakajuć vynikaŭ łabaratornych daśledavańniaŭ vady i zahinułaj ryby sa svajho voziera.
Zavod «Akvadziŭ» admaŭlaje svajo dačynieńnie da hibieli ryby. Mor karasioŭ u svajoj techničnaj sažałcy administracyja zavoda nie paćviardžaje, ale i nie admaŭlaje.
— U vas jość fatahrafii zahinułych karasioŭ? Nu dobra, publikujcie, kali jość. Ale nijakich kamientaroŭ my z hetaj nahody davać nie budziem, — skazaŭ pradstaŭnik administracyi zavoda «Akvadziŭ».
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska4
Kamientary