«Šancaŭ na vyratavańnie nie było». Padrabiaznaści śmierci mastaka Alesia Puškina

Krynica, znajomaja ź situacyjaj sa śmierciu Alesia Puškina, raskazała MOST, što adbyłosia ŭ hrodzienskim špitali, dzie pamior palitviazień. U Alesia Puškina była prabadnaja jazva, jamu svoječasova nie dapamahli ŭ turmie.

Mastaka ŭžo ŭ nieprytomnym stanie pryvieźli ŭ balnicu 11 lipienia, na apieracyjnym stale ŭ jaho spyniłasia serca.

— Puškina pryvieźli ŭ balnicu faktyčna pry śmierci. U jaho byŭ raźvity pierytanit, byŭ septyčny stan i paliorhannaja niedastatkovaść. Kali skazać prostaj movaj, u jaho była dzirka ŭ straŭniku. Praktyčna nie było šancaŭ na vyratavańnie.

Prabadnaja jazva vyklikaje vostry bol. Tamu pacyjent adrazu źviartajecca sa skarhami. U bolšaści vypadkaŭ u čałavieka jość niekalki dzion dla taho, kab likvidavać prablemu apieratyŭna. Kali čałavieku svoječasova dapamahčy, jon budzie dalej žyć. Paśla takich apieracyj pacyjenta, jak praviła, užo praz paru dzion adpuskajuć dadomu. Kali hetaha nie zrabić svoječasova, to prabadzieńnie jazvy vykliča pierytanit i paśla septyčny šok.

Situacyja z Puškinym? Jaho prosta zabili ŭ turmie, pa-inšamu ja heta nie nazavu. Prosta nie mahło być takoha, kab jon nie źviartaŭsia ŭ turmie pa dapamohu, bo takaja kliničnaja karcina vyklikaje vostry bol.

Jon pavinien byŭ adčuvać mocnyja pakuty, heta jak kinžał u žyvacie, — skazaŭ surazmoŭca Most.

Surazmoŭca adznačaje, što jazva ŭ Puškina mahła zapalicca praz turemnaje charčavańnie, a taksama praz adsutnaść miedycynskaj dapamohi.

— Kormiać u hrodzienskaj turmie nie vielmi, taksama situacyja ź miedycynskaj dapamohaj tam na nizkim uzroŭni. U vyniku my atrymlivajem čarhovuju śmierć palitviaźnia. Nielha zamoŭčvać pra takoje biesčałaviečnaje staŭleńnie, biełarusaŭ prosta źniščajuć u turmach. Načalnik miedycynskaj častki Hrodzienskaj turmy Viktar Łutcaŭ adkazvaje za svoječasovuju dapamohu źniavolenym. U jaho abaviazki ŭvachodzić rašeńnie ab špitalizacyi, ale, jak pakazvaje situacyja, Puškina špitalizavali vielmi pozna, — skazała krynica.

Aleś Puškin pamior 11 lipienia na 58-m hodzie žyćcia. Viadomy biełaruski mastak, žyvapisiec-nonkanfarmist, pierformier byŭ zatrymany 30 sakavika 2021 hoda i praz hod asudžany na piać hadoŭ kałonii pa abvinavačvańni ŭ ździeku ź dziaržaŭnych simvałaŭ (artykuł 370 KK) i raspalvańni varožaści (častka 3 artykuła 130 KK). Spačatku pakarańnie adbyvaŭ u ivacevickaj kałonii, a potym byŭ pieraviedzieny na turemny režym u Hrodnie. U jaho zastalisia čaćviora dziaciej.

Prabadnaja jazva była taksama ŭ Maryi Kaleśnikavaj, ale joj svoječasova dapamahli ŭ listapadzie 2022 hoda.

• 2
• 5
• 5
• 3
• 53
• 165