Sacyjalnyja psichołahi: palityka raznastajnaści ŭ kampanijach časta pieraŭtvarajecca ŭ absurd

Kansałtynh pa palitycy raznastajnaści (Diversity-Management) maje pośpiech. U 2020 hodzie kampanii pa ŭsim śviecie vydatkavali 7,5 miljarda dalaraŭ na koŭčynh raznastajnaści. Pavodle halinovaha veb-sajta Researchandmarks.com, čakajecca, što da 2026 hoda hetaja suma padvoicca da 15 miljardaŭ dalaraŭ.

Łobi raznastajnaści padkreślivaje, što raznastajnaść i roŭnyja mahčymaści ŭ śfiery pracy — heta nie tolki etyčny impieratyŭ, jašče jany viaduć da adčuvalnych ekanamičnych pieravah. Kažuć, što šmatetničnyja kamandy bolš vynachodlivyja i prymajuć mudrejšyja rašeńni.

Adnak na praktycy heta vyhladaje pa-inšamu. 

Sacyjalny psichołah ź Jeŭrapiejskaha ŭniviersiteta ŭ Flensburhu (Hiermanija) Jochana Ł. Dehien (Johanna L. Degen) i jaje kamanda apytali 40 kiraŭnikoŭ kampanij i mieniedžaraŭ pa piersanale na temu kiravańnia raznastajnaściu ŭ kampanijach. U vyniku nivodzin z apytanych — biez roźnicy, žančyny ci mužčyny — nie zhadaŭ paśpiachovy prykład prasoŭvańnia palityki raznastajnaści.

«Ja dumała, što my dapuścili pamyłku ŭ acency», — kaža aŭtarka daśledavańnia Dehien. Ale heta było nie tak: pastajannyja admoŭnyja vodhuki ab realizacyi kancepcyj raznastajnaści ŭ kampanijach adpaviadali rečaisnaści.

Vysnova daśledavańnia Dehien, jakuju jana niadaŭna apublikavała ŭ vyhladzie knihi «Vykryćcio kiravańnia raznastajnaściu. Kapitalistyčnaja inkarparacyja subjekta, marali i supracivu», razburalnaja:

«Kiravańnie raznastajnaściu bolš nie stvaraje roŭnych mahčymaściaŭ u śfiery pracy», — havoryć sacyjalny psichołah. Choć mety kancepcyi, niesumnienna, vartyja taho, kab da ich imknucca, na praktycy kiravańnie raznastajnaściu «časta pieratvarajecca ŭ absurd».

Apytanyja Dehien i jaje kamandaj mieniedžary i supracoŭniki niamieckich kampanij, jak bujnych, tak i siaredniaha dy małoha pamieru, pastajanna pryvodzili adny i tyja ž pryčyny, pa jakich namahańni pa zabieśpiačeńni raznastajnaści ciarpiać niaŭdaču.

Dehien bačyć pryčynu hetamu ŭ tym, što adkaznyja, jakija ŭ svaich kampanijach pavinny prasoŭvać bolšuju raznastajnaść i spraviadlivaść, sutykajucca z admovaj z boku kiraŭnictva. Bo kiraŭniki adčuvajuć, što ich krytykujuć niespraviadliva. Typovaja zajava kiraŭnika: «Ja b chacieŭ naniać roznych ludziej, ale my nie možam znajści kandydataŭ, jakija b nam padychodzili».

Ź inšaha boku, zaŭvažaje sacyjalny psichołah, supracoŭniki nie adčuvajuć, što kiravańnie raznastajnaściu realizujecca naležnym čynam. Prostyja rabotniki časta zajaŭlajuć ab tym, što «jany ŭsio roŭna mnie nie dapamohuć, jany nie mohuć prymusić mieniedžara ŭziać mianie ŭ svaju kamandu».

Dehien zajaŭlaje, što miery pa kiravańni raznastajnaściu praktyčna nie padviarhajucca acency efiektyŭnaści. Krytykavać nichto nie ryzykuje, tamu što nichto nie choča być źniavažanym jak praciŭnik roŭnych mahčymaściaŭ.

«Nichto ŭ kampanii nie kaža pra heta, ale ŭsie viedajuć, što heta nie pracuje»,

— pieradaje Dehien słovy adnaho z apytanych kiraŭnikoŭ.

Jašče adzin aśpiekt, na jaki źviartaje ŭvahu vučonaja, — toje, što kiravańnie raznastajnaściu pryvodzić da kanfliktaŭ pamiž hrupami rabotnikaŭ. Kiraŭniki adčuvajuć siabie abmiežavanymi ŭ svaich rašeńniach ab najmie. Mieniedžary, jakija adkazvajuć za praviadzieńnie palityki raznastajnaści, u svaju čarhu, abvinavačvajuć kiraŭnictva ŭ najmie nie tych ludziej. A ź inšaha boku, jany časta skardziacca na tuju hrupu, intaresy jakoj jany pavinny adstojvać.

«Ja chaču prasoŭvać žančyn, a jany nie chočuć», — pieradaje sacyjalny psichołah słovy adnaho z respandentaŭ.

Pra toje, što kiravańnie raznastajnaściu sutykajecca z roznymi prablemami na šlachu svajoj realizacyi, paćviardžaje i daśledavańnie ekanamistki Beciny Al-Sadzik-Łavinski (Bettina Al-Sadik-Lowinski). Svaje vysnovy jana sabrała ŭ knizie «Alfa-samcy i alfa-samki».

Al-Sadzik-Łavinski praviała 28 padrabiaznych intervju z 28 mužčynami-kiraŭnikami z 11 krain. Usie apytanyja mužčyny zajavili, što vystupajuć za pavieličeńnie kolkaści žančyn na kiroŭnych pasadach, ale na praktycy mnohija ź ich sutyknucca z tym, što «žančynam nie chapaje aryjentacyi na karjeru».

Takim čynam, zaklučaje Al-Sadzik-Łavinski, kiraŭniki aścierahajucca, što žančyna, jakaja atrymała pavyšeńnie, paciarpić niaŭdaču, jakaja adabjecca i na ich. Na asnovie hetaha daśledčyca robić vysnovu, što bolš źmiešanyja kamandy kiraŭnikoŭ uźnikajuć tolki tady, kali dva baki ruchajucca razam:

«Žančyny pavinny pracavać nad svajoj aryjentacyjaj na karjeru, a mužčyny pavinny dapamahać žančynam u karjery i adčyniać im dźviery ŭ śviecie biznesu».

Vydańnie cytuje Jochanu Dehien: «Viadoma, było b pažadana, kab u kampanijach likvidavali strukturnyja niedachopy. Ale heta nie źmienicca z tym kiravańniem raznastajnaściu, jakoje ŭ ciapierašni čas ažyćciaŭlajecca ŭ kampanijach i ŭstanovach».

Dehien pasprabavała vyśvietlić, što ŭ rečaisnaści robiać mieniedžary pa raznastajnaści. Jak pakazała daśledavańnie, jany arhanizujuć sieminary na temu «rasizmu i sieksizmu na pracoŭnym miescy», sočać za tym, kab abjavy ab vakansijach byli inkluziŭnymi i napisanymi na movie, jakaja adpaviadaje hiendarnaj prablematycy. Akramia hetaha, jany jeździać na sustrečy i kanhresy, kab daviedacca pra apošnija tendencyi palityki kiravańnia raznastajnaściu i inkluziŭnaściu.

Ale hetaha niedastatkova. «Pry hetym jany nie likvidujuć dyskryminacyju, a zamiest hetaha prycharošvajuć fasad, kab pavysić imidž kampanii», — kaža Dehien.

Jak adznačaje šviejcarskaje vydańnie, niadaŭna Businessinsider.com pryjšoŭ da padobnaj vysnovy, adznačyŭšy, što

«kiravańnie raznastajnaściu stała novym Green Washing. Darahija, ale małaefiektyŭnyja prahramy pa raznastajnaści vykarystoŭvajucca kampanijami jak pijar-paviedamleńni dla palapšeńnia svajho imidžu i pryciahnieńnia klijentaŭ i inviestaraŭ».

U jakaści prykładu nieadpaviednaści publičnych abaviazacielstvaŭ pa raznastajnaści realnaj dziełavoj praktycy vydańnie pryvodzić Amazon. Z adnaho boku, heta kampanija rekłamuje svaje prahramy raznastajnaści, a z druhoha — jana zmahajecca z prafsajuzami, jakija imknucca palepšyć umovy pracy, asabliva dla ludziej ź ciomnym koleram skury.

U abaronu kampanij u ich realizacyi palityki kiravańnia raznastajnaściu ŭ artykule vystupaje adjunkt-prafiesarka ŭniviersiteta Sankt-Halena (Šviejcaryja) Hudrun Sander (Gudrun Sander). Jana ličyć, što

«mnohija kampanii sapraŭdy nastrojenyja surjozna i chočuć, kab pracoŭnaja siła była bolš raznastajnaj».

Adnak, na jaje dumku, paśpiachovaja realizacyja vysakarodnych namieraŭ u biznes-realnaści časta ciarpić niaŭdaču, tamu što adkaznyja za raznastajnaść nie atrymlivajuć dastatkovych resursaŭ i ŭpłyvu. Adziny mieniedžar pa raznastajnaści z samaha pačatku znachodzicca ŭ projhryšnym stanoviščy ŭ kampanii.

«Kiravańnie raznastajnaściu aznačaje ŭniasieńnie źmianieńniaŭ u kulturu — dla realizacyi takoha pracesu vam patrebnyja cełyja kamandy z adpaviednymi paŭnamoctvami pa pryniaćci rašeńniaŭ»,

— skazała Sander ŭ intervju Tagesanzeiger.

U tym, što kiravańnie raznastajnaściu nie abaviazkova asudžanaje na pravał, taksama pierakananaja Jochana Dehien: «Łejbł paškodžany, ale jaho funkcyja vielmi patrebnaja». Adnak, jak zaŭvažaje vučonaja, dla taho, kab stvaryć bolš spraviadlivaści na pracoŭnym miescy, nieabchodna niešta bolšaje, «čym napisańnie abjaŭ ab vakansijach hiendarna-niejtralnaj movaj».

Čytajcie jašče:

«Dobra pracuje toj, chto dobra adpačyvaje». Psichołah — pra sakrety praduktyŭnaści

Google prymušaje supracoŭnikaŭ viarnucca ŭ ofis

• 7
• 0
• 7
• 8
• 8
• 2
• 8
• 0