Hrupa asob pasprabavała zachapić budynak Abchazskaj dziaržaŭnaj teleradyjokampanii ŭ Suchumie, achoŭniki adahnali ich papieradžalnymi strełami, paviedamili ŭ infacentry prezidenta Abchazii.
«Paśla apoŭnačy, 18 listapada 2024 hoda adbyŭsia incydent la budynka Abchazskaj dziaržaŭnaj teleradyjokampanii. Da terytoryi telekanała padjechała hrupa asob, jak miarkujecca, jakija pradstaŭlajuć apazicyjnyja siły, z metaj ustanaŭleńnia kantrolu nad viaščańniem», — havorycca ŭ paviedamleńni.
Taksama pratestoŭcy skazali, što pahodziacca na pryznačeńnie v.a. kiraŭnika respubliki vice-prezidenta Badry Hunby, kali na pasadu premjer-ministra budzie pryznačany pradstaŭnik apazicyi, zajaviŭ staršynia hramadskaj arhanizacyi «Abchazskaje narodnaje ruchańnie» Adhur Ardzinba.
Taksama abchazskaja apazicyja zajaviła, što nie maje namieru vykonvać patrabavańnie prezidenta samaabvieščanaj respubliki Asłana Bžanija ab vyzvaleńni kompleksu ŭradavych budynkaŭ.
Pra heta na mitynhu la budynka Administracyi prezidenta zajaviŭ lidar Abchazskaha narodnaha ruchu Adhur Ardzinba. «Heta nieprymalna. Siudy jon (Asłan Bžanija) bolš nie zojdzie», — padkreśliŭ jon, dadaŭšy, što zajavu ab adstaŭcy toj moža napisać «u lubym miescy».
Z-za čaho ŭźnikli pratesty?
Pratesty ŭ Abchazii ŭźnikli z-za ratyfikacyi inviestycyjnaj damovy z Rasijaj. Voś čamu dakumient nie padabajecca abchazskaj apazicyi, piša «Mieduza».
Prajekt damovy byŭ anansavany hod tamu. Jon praduhledžvaje vydzialeńnie ziamielnych učastkaŭ dla rasijskich biznesoŭcaŭ i mnohija hady padatkovych kanikułaŭ. Taksama dakumient dazvalaje pryvozić u Abchaziju zamiežnych pracoŭnych, biazmytny impart budaŭničych materyjałaŭ i adkryćcio ŭ častkova pryznanaj krainie filijała rasijskaha banka.
Minimalnaje abmiežavańnie inviestycyj — dva miljardy rasijskich rubloŭ za prajekt (20 młn dalaraŭ). Pry hetym dachodnaja častka biudžetu Abchazii na 2024 hod składaje 12 miljardaŭ rubloŭ (120 młn dalaraŭ).
Ułady Abchazii śćviardžajuć, što inviestycyi nieabchodnyja dla stabilizacyi ekanomiki ŭ krainie. Krytyki dakumienta ličać, što jon vyhadny tolki Rasii.
Asablivaje niezadavalnieńnie vyklikajuć punkty, jakija praduhledžvajuć pieradaču abchazskich ziamiel rasijskim pradprymalnikam. Apazicyja taksama ličyć, što biznesoŭcy z RF vycisnuć abchazaŭ z važniejšaj dla krainy turystyčnaj śfiery.
Nam naviazvajuć ideju, zakładzienuju ŭ pahadnieńni, asvoić Abchaziju biez hramadzian Abchazii. <…> To-bok heta budzie paralelnaja niejkaja ekanomika z udziełam rasijskich inviestaraŭ, rasijskich bankaŭ», — zajaviŭ ekanamist Achra Arystava.
Maskva nastojvaje na ratyfikacyi dakumienta ŭ Abchazii. Rasija zabiaśpiečvaje amal treć biudžetu Abchazii, i finansavy cisk u častkova pryznanaj respublicy adčuvalny. Akramia taho, u Abchazii znachodzicca vajskova-marskaja baza Rasii.
Kamientary