U palitviaźnia ŭ turmie zdarylisia infarkt i insult, ale jaho ŭsio adno adpravili ŭ kałoniju. Stała viadomaja čarhovaja historyja pra biesčałaviečnaść sistemy
Jak stała viadoma pravaabaroncam «Viasny», u listapadzie 2021 hoda ŭ mahiloŭskaj turmie ŭ 47-hadovaha palitviaźnia Dźmitryja Sončyka zdaryŭsia infarkt, a paśla — insult. Ale heta nie stała padstavaj dla taho, kab sudździam i turemščykam pastavicca da jaho choć krychu litaściviej. Były sukamiernik palitviaźnia z mahiloŭskaj turmy i źniavoleny z kałonii, dzie adbyvaje termin Dźmitryj, raskazali «Viaśnie» strašnuju historyju hetaha čałavieka, jakoha dahetul praciahvajuć niščyć za niekalki kamientaroŭ.
Try hady kałonii za kamientary
Viasielnaha fatohrafa ź Minska Dźmitryja Sončyka zatrymali ludzi ŭ cyvilnym na taniravanym busie 28 červienia 2021 hoda. Pryčyna — repost i kamientary ŭ internecie. Doma ŭ jaho praviali pieratrus i kanfiskavali ŭsiu techniku. Pry zatrymańni mužčynu nadzieli kajdanki i nakryli ich koftaj, kab susiedzi ničoha nie zapadozryli. Da suda fatohrafa ŭtrymlivali ŭ žodzinskaj turmie.
12 kastryčnika 2021 hoda sudździa Dźmitryj Karsiuk z suda Centralnaha rajona Minska pryznačyŭ Dźmitryju try hady kałonii. Pavodle viersii abvinavačańnia, Dźmitryj Sončyk abraziŭ čatyroch čałaviek i vykazaŭ pahrozu ich žyćciu ŭ kamientarach u adnym z telehram-kanałaŭ ciaham 2020-2021 hadoŭ. Paciarpiełyja — A. Pierachodźka ź Ivacevickaha RAUS, načalnik Niaśvižskaha RAUS A. Hrynkievič, staršy lejtenant Niaśvižskaha RAUS R. Pranievič i supracoŭnik HUBAZiKa A. Aloksa.
Na sudzie Sončyk tłumačyŭ, što pisaŭ kamientary praz emocyi paśla prahladu videa źbićcia i zatrymańniaŭ, aburany niepravamiernymi dziejańniami supracoŭnikaŭ. Ale padkreśliŭ, što nie źbiraŭsia ažyćciaŭlać pahrozy.
Da zatrymańnia ŭ Dźmitryja nie było prablem sa zdaroŭjem. Ale ŭ źniavoleńni jon pierachvareŭ na kavid. Da razhladu apielacyi ź SIZA-1 Dźmitryja Sončyka etapavali ŭ mahiloŭskuju turmu. Tam, pavodle infarmacyi pravaabaroncaŭ, jaho źbili, patrabujučy na kamieru prabačeńniaŭ i pryznańnia viny.
Praz dva tydni paśla taho, jak Dźmitryja pryvieźli ŭ turmu №4, u mužčyny zdaryŭsia infarkt, a jašče praz dva tydni — insult.
«Jaho faktyčna paralizavała»
Były palitviazień Valancin Łabačoŭ raskazaŭ «Viaśnie», što znachodziŭsia ź Dźmitryjem u kamiery mahiloŭskaj turmy 14 listapada 2021 hoda, kali ŭ jaho zdaryŭsia infarkt.
«Ja byŭ ź im u kamiery, kali jamu stała błaha i jaho zabrali ŭ balnicu. Jamu stała drenna nočču. Pakul my dahrukalisia da supracoŭnikaŭ, prajšło niekalki hadzin. Jaho adrazu zabrali ŭ miedčastku turmy, a ranicaj advieźli ŭ mahiloŭskuju haradskuju balnicu.
U balnicy jon prabyŭ dzieści miesiac. Potym u kamieru, ź jakoj jaho zabrali daktary, pryjšli supracoŭniki turmy i zapytali, chto ź im siadzieŭ i chto jaho viedaje. Ja adkazaŭ, što ja ź im znajomy. U Dźmitryja byli prablemy z pamiaćciu, tamu šukali znajomych, kab praces reabilitacyi prachodziŭ chutčej. Mianie i jašče niekalki čałaviek pieraviali ŭ nievialikuju kamieru, dzie byŭ Dźmitryj.
Tam my jaho dahladali, bo jon byŭ u vielmi ciažkim stanie. My navat pampiersy jamu mianiali, bo jon amal što chadzić nie moh. Treba było ŭ dušy jaho padtrymać, naprykład, kab jon pamyŭsia. U toj momant u jaho byli prablemy z maŭleńniem i jaho faktyčna paralizavała. U kamiery ja prabyŭ ź im miesiac».
U turmie ŭ Dźmitryja Sončyka adnialisia levyja ruka i naha, a taksama parušyłasia maŭleńnie. Za paŭtara miesiaca jon vielmi mocna schudnieŭ — pryblizna na 60 kiłahram. Jamu prysvoili invalidnaść druhoj hrupy, ale sud usio adno pakinuŭ prysud bieź źmienaŭ.
Były palitviazień Valancin Łabačoŭ adznačaje, što prablemy sa zdaroŭjem u jahonaha byłoha sukamiernika abvastrylisia paśla źbićcia siłavikami.
«Na maju dumku, akramia źbićcia, na jaho zdaroŭje jašče mocna paŭpłyvała toje, što jon vielmi chvalavaŭsia i šmat paliŭ».
Valancin Łabačoŭ navat u svajoj apielacyjnaj skarzie prasiŭ, kab sud uličyŭ toje, što jon dahladaje źniavolenaha Dźmitryja Sončyka. Ale Mahiloŭski abłasny sud hetaha, jak i treba było čakać, nie ŭličyŭ. Razhlad skarhi Valancina prachodziŭ u zakrytym režymie.
«U jaho byli prablemy z kaardynacyjaj ruchaŭ i havorki»
Z balnicy Dźmitryja Sončyka vypisali 17 śniežnia 2021 hoda, a ŭ siaredzinie studzienia 2022-ha jaho ŭžo etapavali praz Homiel u babrujskuju kałoniju №2. Tam ź im paznajomiŭsia były palitviazień Vital Žuk.
«Ź Dźmitryjem Sončykam ja paznajomiŭsia ŭ sančastcy kałonii ŭ kancy lutaha — pačatku sakavika 2022 hoda. Tam my praviali 10 dzion. Ja adrazu zaŭvažyŭ, što ŭ jaho niejkija prablemy z maŭleńniem, ale nie adrazu zrazumieŭ, što zdaryłasia.
Jon vielmi emacyjna žestykulavaŭ, ale było prykmietna, što jon zabyvaje słovy ŭ pracesie razmovy. Naprykład, jon choča niešta skazać, ale nie pamiataje, jak hučyć słova, tamu šukaŭ sinonimy. Ci, naprykład, błytaŭ kančatki słoŭ, naprykład, moh skazać zamiest «dzień dobry» — «dzień dobraja».
Tak ja zrazumieŭ, što ŭ jaho jość peŭnyja prablemy, ale ŭ pieršy dzień znajomstva pra heta my nie havaryli. Paśla ja daviedaŭsia i pra infarkt, i pra insult, jakija byli spravakavanyja źbićciom. Nakolki ja zrazumieŭ, usio sprabavali śpisać na kavid. Ale heta tryźnieńnie, tamu što čałaviek byŭ raniej absalutna zdarovym».
Dźmitryja vyznačyli ŭ atrad piensijanieraŭ, niahledziačy na toje, što jon nie padychodzić pa ŭzroście. Jamu pryznačyli piensiju pa invalidnaści (druhoj pracoŭnaj hrupy), ale jana da jaho nie dachodzić praz vyličvańni kałonii.
«Ja potym jašče sustrakaŭsia ź Dźmitryjem — u jaho byli prablemy z kaardynacyjaj ruchaŭ i havorki. Jon trochi kulhaje i robić mižvolnyja ruchi rukami. Ale Dźmitryj małajčyna. Jon vielmi mocny čałaviek unutry!» — kaža były palitviazień Vital Žuk.
Čytajcie taksama:
Byłyja siadzielcy «Vićby» raskazali pra Znaka i Viniarskaha. Usiaho tam 150 palitviaźniaŭ
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie5
Kamientary
Heta źniščaje ŭ nas čałaviečnaść.
Mienavita takoha staŭleńnia da siabie zasłuhoŭvajuć šakały režyma, ŭ peŭny monant hałoŭnaje nie daravać, anijakaha prabačeńnia biez pakarańnia.