Načalnik Hienštaba Polščy: NATO abaviazkova dapamoža nam u vypadku ahresii Rasii ci Biełarusi. Pahroza vajny realnaja
Hienierał Viesłaŭ Kukuła parazvažaŭ pra vierahodnaść napadu z boku Rasii i vykazaŭ upeŭnienaść u efiektyŭnaści ŭzajemadapamohi ŭ ramkach NATO.
Načalnik Hienštaba Polščy Viesłaŭ Kukuła parazvažaŭ pra pahrozu napadu z boku Rasii i Biełarusi. Na dumku hienierała, takaja pahroza realnaja, ale ŭsio zaležyć ad hatoŭnaści Polščy abaraniacca, piša businessinsider.com.pl sa spasyłkaj na Rzeczpospolita.
«Heta realnaja pahroza. Dla mianie važniejšaje inšaje pytańnie. Ci zdolejem my i kali pabudavać sistemu ŭstojlivaści dziaržavy i zdolnaść uzbrojenych sił da doŭhaterminovaj niejtralizacyi hetaj pahrozy.
Toje, ci adbudziecca vajna i kali jana pačniecca, u peŭnaj stupieni zaležyć ad nas. Napad na dziaržavu, dobra padrychtavanuju da abarony, hramadstva jakoj hatova ŭstupić u boj, — heta vielizarnaja ryzyka. Ahresija zaŭsiody charčujecca słabaściu», — ličyć Kukuła.
Načalnik polskaha Hienštaba dadaŭ, što Rasija vałodaje surjoznym demahrafičnym patencyjałam i resursami.
«A samaje hałoŭnaje — pa-raniejšamu efiektyŭna funkcyjanuje abaronnaja pramysłovaść, jakaja dazvalaje nie tolki vajavać, ale i paralelna raźvivać svoj abaronny patencyjał. Zaviaršeńnie kanfliktu va Ukrainie značna palehčyć joj naroščvańnie svaich uzbrojenych sił i moža istotna skaracić terminy, pakazanyja hienierałam Brojeram», — ličyć Kukuła.
Idzie havorka pra prahnozy hienieralnaha inśpiektara Bundeśviera Karstena Brojera ab mahčymym adnaŭleńni patencyjału Rasii dla vajny z NATO da 2029 hoda.
Hienierał Kukuła pry hetym upeŭnieny, što Polšča atrymaje dapamohu ad krain NATO ŭ vypadku ahresii z boku Rasii abo Biełarusi.
«Tak, u mianie jość takaja ŭpeŭnienaść. Siońnia NATO — heta zusim inšaja arhanizacyja ŭ paraŭnańni z tym, jakoj jana była dziesiać hadoŭ tamu. Adzin z prykładaŭ — rehijanalnyja płany, a taksama šmatlikija vučeńni, jakija nazirajuć žychary Polščy. Hetyja vučeńni padrychtoŭvajuć sajuznyja siły da dziejańniaŭ u adpaviednaści z hetymi płanami. Biezumoŭna, my nie budziem abaraniacca adzinočku», — adznačyŭ jon.
Akramia taho, Polšča, pa słovach Kukuły, abaviazkova akaža dapamohu krainam Bałtyi ŭ vypadku ahresii z boku Rasii.
«Tak pracuje NATO. Z punktu hledžańnia adzinstva aljansu, biaśpieka Polščy pačynajecca ŭ Estonii i inšych krainach Bałtyi. Baraćba za kožny santymietr terytoryi NATO maje krytyčnaje značeńnie dla nadziejnaści aljansu. Taksama varta pamiatać, što abarona bałtyjskich krain niemahčymaja biez Polščy, praź jakuju prachodzić adzinaje suchaputnaje złučeńnie ź imi», — padkreśliŭ jon.
Kukuła ličyć, što z abrańniem Donalda Trampa prezidentam ZŠA staŭleńnie Vašynhtona da Varšavy nie źmienicca.
«Treba pamiatać, što z amierykanskaha punktu hledžańnia my źjaŭlajemsia dziaržavaj NATO, jakaja słužyć prykładam dla inšych, jak treba raźvivać ułasnyja abarončyja mahčymaści, kab stać efiektyŭnaj častkaj sajuznaj sistemy abarony», — zajaviŭ Kukuła.
Jon dadaŭ, što techničnaja i taktyčnaja intehracyja sistem uzbrajeńnia Polščy i ZŠA maje vialikaje značeńnie i padkreśliŭ važnaść prysutnaści 10 tysiač amierykanskich sałdat na terytoryi krainy.
Kamientary