Łukašenka pryhraziŭ kiraŭnikam abłvykankamaŭ, što ździare ź ich skuru. Za što?
Alaksandr Łukašenka zapatrabavaŭ ad adkaznych asob uzmacnić jakaść i dastupnaść miedycynskaj dapamohi na vioscy. Pra heta jon zajaviŭ na naradzie pa aktualnych pytańniach achovy zdaroŭja, piša BiełTA.
U jakaści vostraj prablemy Łukašenka paznačyŭ dastupnaść i jakaść miedycynskaj dapamohi na vioscy. «Ja vam nikoli za siało nie daruju. Nikoli! Zapomnicie heta. Pierš za ŭsio hubiernatary. Ja z vas skuru ździaru, ale vy naviedziacie tam paradak!» — padkreśliŭ Łukašenka.
«Vy viedajecie, ja daju sabie spravazdaču, z kim ja siońnia razmaŭlaju i chto mianie pačuje. Heta ž biełaja kostka — daktary. Chiba ich možna krytykavać? Nie! Nu dyk zapomnicie: ja ni pierad čym nie spyniusia i paradak tut budzie naviedzieny! Navat kali pałova z vas sydzie. Ale ja budu viedać, z kim ja budu pracavać. Stali nachabnyja da apošniaj stupieni. Biehajuć vakoł načalnikaŭ ad rajonnaha źviana da Łukašenki. Tolki ich pryhoža ŭmiejem lačyć. A zvyčajnyja ludzi, jakija ŭtrymlivajuć heta ŭsio? Apuściciesia na ziamlu! Ad nas, u hetaj zale, zaležyć naohuł usio ŭ krainie», — padkreśliŭ Łukašenka.
«Kudy hladziać hubiernatary? Bo heta ich pierš za ŭsio śfiera adkaznaści — kultura, sport, adukacyja, achova zdaroŭja. Balnicy i škoły ŭ vas ža. Kudy hladziać načalniki ŭpraŭleńniaŭ achovy zdaroŭja? I naohuł, navošta jany vam pry takoj pracy? Kiraŭniki centraŭ hihijeny, staršyni rajvykankamaŭ … urad, Ministerstva achovy zdaroŭja viedajuć pra hetyja prablemy ci nie? A voś viedać i kantralavać vy pavinny», — skazaŭ jon.
Łukašenka dadaŭ što tymi pytańniami, jakimi zajmałasia stvoranaja pa daručeńni niezaležnaja rabočaja hrupa, pavinny štodnia zajmacca ministr i jaho kamanda — Ministerstva achovy zdaroŭja. «Tam usie śpiecyjalisty skancentravanyja. Heta jany pavinny stvarać hrupy i kamisii i hladzieć, što adbyvajecca na miescach. Atrymlivajecca jak zaŭsiody: kudy ja nie dajechaŭ, tam ciš», — adznačyŭ Łukašenka.
Kamientary