«Dapamahaŭ Siarhieju Cichanoŭskamu ŭ arhanizacyi masavych biesparadkaŭ». Pačaŭsia sud nad Eduardam Babarykam, jon viny nie pryznaŭ
Siońnia ŭ 11:00 pačałosia sudovaje pasiadžeńnie pa kryminalnaj spravie ŭ dačynieńni da 33-hadovaha Eduarda Babaryki, syna byłoha staršyni praŭleńnia Biełhazprambanka, pretendenta na post prezidenta na vybarach 2020 hoda Viktara Babaryki.
Kryminalnuju spravu razhladaje Minski abłasny sud u vyjaznym sudovym pasiadžeńni ŭ pamiaškańni suda Minskaha rajona.
Eduarda Babaryku sudziać za nibyta ŭchileńnie ad vypłaty padatkaŭ, lehalizacyju srodkaŭ, atrymanych złačynnym šlacham, dapamohu ŭ arhanizacyi masavych biesparadkaŭ i raspalvańni varožaści.
Pavodle dziaržabvinavačańnia, Eduard Babaryka akazvaŭ sadziejničańnie Cichanoŭskamu ŭ arhanizacyi masavych biesparadkaŭ.
«Eduard Babaryka dapamahaŭ Siarhieju Cichanoŭskamu ŭ arhanizacyi masavych biesparadkaŭ, jakija supravadžalisia nasillem nad asobaj, pahromami, padpałami, źniščeńniem majomaści i ŭzbrojenym supraciŭleńniem pradstaŭnikam ułady», —
pieradaje BiełTA cytaty abvinavačańnia, ahučanyja ŭ sudzie prakuroram.
Pry hetym Babaryka, pavodle abvinavačańnia, «z dapamohaj płatform «Vulej» i «Moła-moła» arhanizavaŭ zbor «srodkaŭ ź nieakreślenaha koła asob dla padtrymki ŭdzielnikaŭ masavych biesparadkaŭ».
Eduard Babaryka, akramia taho, abvinavačvajecca ŭ sadziejničańni dziejańniam, «nakiravanym na ŭzbudžeńnie inšaj sacyjalnaj varožaści i varažniečy pa prykmiecie inšaj sacyjalnaj prynaležnaści, učynienych hrupaj asob pa papiaredniaj zmovie». Pa viersii śledstva, «hetyja dziejańni paciahnuli inšyja ciažkija nastupstvy ŭ vyhladzie ŭźniknieńnia masavych biesparadkaŭ, pryčynieńnia ŭronu ŭ asabliva bujnym pamiery».
Eduard svaju vinu całkam nie pryznaŭ.
Baćku i syna Babarykaŭ zatrymali 18 červienia 2020 hoda. Eduard uznačalvaŭ pieradvybarčy štab baćki, ich spynili, kali jany vieźli ŭ CVK podpisy, sabranyja dla vyłučeńnia Viktara Babaryki kandydatam u prezidenty.
Za kratami biez suda Eduard znachodziŭsia amal try hady.
Eduardu pahražaje da 20 hadoŭ źniavoleńnia.
Pravaabaroncy aceńvajuć hetyja abvinavačańni jak palityčna matyvavanyja, ličać, što syna aryštavali dla cisku na baćku.
Pra los samoha Viktara Babaryki ničoha nie viadoma ŭžo miesiac. Raniej paviedamlałasia, što ŭ noč z 24 na 25 krasavika Viktar Babaryka byŭ špitalizavany z kałonii Navapołacka ŭ balnicu. Dalejšaje miescaznachodžańnie palitviaźnia nieviadomaje.
12 maja źjaviłasia infarmacyja ad pravaabaroncaŭ, što da svajho atrada ŭ navapołackaj kałonii jon nibyta ŭžo nie prypisany, a paźniej — pra toje, što jaho nibyta pieraviali ŭ turemnuju balnicu pry SIZA-1 u Minsku. Ni advakaty, ni rodnyja nie zmahli ź im pabačycca.
Kamientary
eduard charašo pažyu