11 maja Paŭła Biełavusa asudzili na 13 hod kałonii. Minski haradski sud razhladaŭ spravu ŭ zakrytym režymie. Dyrektara symbal.by i arhanizatara śviatkavańnia 100‑hodździa BNR abvinavacili ŭ «raspaŭsiudzie nacyjanalizmu» i «zdradzie dziaržavie».
Abvinavačańnie Biełavusu rychtyk takoje, jak u stalinskija časy: «Pad vyhladam kulturna-histaryčnaha raźvićcia ŭ roznych ahulnadastupnych sacyjalnych sietkach i na sajtach jon raspaŭsiudžvaŭ idei biełaruskaha nacyjanalizmu, metaj jakich źjaŭlałasia źmiena dziaržaŭnaj ułady ŭ Biełarusi».
Na voli ŭ Paŭła zastalisia žonka i dvoje maleńkich dziaciej. Paplečniki Biełavusa z hramadskaj inicyjatyvy «Hodna» abviaścili zbor srodkaŭ na dapamohu siamji Paŭła. Mienš čym za sutki (za 9 hadzin) biełarusy sabrali bolš za 15 tysiač jeŭra.
«Idei i impet Paŭła Biełavusa natchnili być biełaruskimi patryjotami ci nie cełaje pakaleńnie. Navat čynoŭniki padchapili ŭ svoj čas trend na biełaruskaść, jaki zapuściŭ Biełavus z kamandaj. Palityčny režym paličyŭ aktyŭnaść Paŭła «zdradaj dziaržavie», ale biełarusy dali svoj adkaz na hety absurd.
Tak, Pavieł — nacyjanalist. A nacyjanalizm — heta ideja hramadzianskaj salidarnaści i adkaznaj pracy dziela dabrabytu ŭsich hramadzian krainy. Sprava Biełavusa — ahulnaja biełaruskaja sprava»,
— kamientuje kiraŭnica hramadskaj inicyjatyvy «Hodna» Alina Hieraščanka.
Zbor dapamohi dla siamji Paŭła Biełavusa praciahvajecca.
Sabranaja suma pojdzie na apłatu advakatam, a taksama na nabyćcio nieabchodnych dla žyćcia rečaŭ i pakryćcio bytavych vydatkaŭ na siamju Paŭła. U siamji kanfiskavanyja mašyny, častka bytavoj techniki. Usia majomaść u domie apisanaja i moža być kanfiskavanaja.
Prajekty, jakim Biełavus pryśviačaŭ svaje siły, taksama praciahvajuć svaju pracu. Hramadskaja inicyjatyva «Hodna» ładzić adukacyjnyja mierapryjemstvy, zdymaje zabaŭlalny i adukacyjny kantent. Naprykład, da Dnia rodnaj movy źniali sacyjalny rolik pra luboŭ da biełaruskaj movy.
A taksama vypuścili sieryju treveł-błohaŭ pra biełaruskija miaściny ŭ śviecie «Buś Biełaruś: pierazahruzka». Prajekt «Buś Biełaruś» Pavieł pačynaŭ u 2021 hodzie u krainie.
«Hodna» pravodzić daśledavańni pa temie nacyjanalnaj identyčnaści i stvaraje kantent, jaki natchniaje biełarusaŭ hanarycca tym, što jany biełarusy, lubić svaju krainu, movu, kulturu i historyju, viedać svaje tradycyi.
Krama «Symbal.baj» adradziła svaju dziejnaść za miažoj u anłajn-farmacie.
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?5
Kamientary