«Ja stała fanatam sekandaŭ». Što ludzi šukajuć u hetych kramach i kolki hatovyja pakidać tam hrošaj?
Dla kahości pachod u sekand-chend — heta ekanomija, dla inšych — razumnaje spažyvańnie i ekałahičnaść. Chtości prosta choča znajści niešta niezvyčajnaje, a inšyja navat prymudrajucca zarabić na pieraprodažy. Zajšli ŭ dni novych pastupleńniaŭ u niekalki sietkavych sekand-chendaŭ i na dabračynnuju barachołku. Vydańnie Myfin.by spytała naviedvalnikaŭ, čamu jany vybirajuć sekand-chendy, jak časta tudy chodziać i kolki vydatkoŭvajuć na pakupki.
Aryna: «Apiakun sekandaŭ» vyrašyŭ uziać mianie ŭ abarot»
«Ja pastupova stała fanatam sekandaŭ. Usio pačałosia z pytańnia siabroŭki: «A jak ty stavišsia da sekand?». Jana pakazała mnie paru cikavych rečaŭ, nabytych tam. U hałavie adkłałasia, što možna znajści niešta kłasnaje. I voś prachodziła niejak u čarhovy raz mima sekanda na vuł. Pulichava. Mabyć, «apiakun sekandaŭ» tut ža vyrašyŭ uziać mianie ŭ abarot: ja znajšła naviusieńki trenč Tommy Hilfiger za 60 rubloŭ i kłasnuju błuzku s.Oliver za 10. Tak i padsieła.
Z taho času heta moj lubimy sekand. Tym bolš śpiecyjalna nikudy jechać nie treba — prachodžu mima kožny dzień, akramia kanikuł i vychadnych.
Spačatku ja zachapiłasia i kuplała šmat niepatrebnaha. Zdavałasia b, nu kłasnaja jakaść, tanna zusim, treba brać! Da prykładu, była klovaja šaŭkovaja błuzka za 7 rubloŭ. I ničoha, što ŭ ofis nie chadžu, — spatrebicca. Nie, nie spatrebiłasia ni razu za 3 hady.
Kali pačali nazapašvacca stosy niezapatrabavanych rečaŭ, vypracavała novy padychod: kuplaju, tolki kali baču, što reč mianie vidavočna ŭpryhožvaje. Nu i niešta bazava nieabchodnaje. Časam usio roŭna praskokvajuć niepatrebnyja pakupki. Ale niejak lahčej, kali takaja kupla kaštuje 10-20 rubloŭ, a nie 120.
Dzieciam ja taksama mnohaje kuplaju ŭ sekandach. Dačka za svaje hrošy niadaŭna kupiła novyja džynsy nie najlepšaj jakaści ŭ sietkavaj kramie za 90 rubloŭ. Potym pa majoj paradzie schadziła ŭ sekand i na 60 rubloŭ kupiła 2 viatroŭki, majku i błuzku.
U sekand-chendzie za miesiac ja vidavočna traču mienš, čym na kavu/iežu pa-za domam i zabavy. Niejak u dzień źnižak kupiła 6 rečaŭ u sekandzie za 67 rubloŭ, a potym zajšła ŭ kaviarniu i za kavu, amlet i desiert zapłaciła pałovu hetaj sumy. Tak i vyvieła svaju fiłasofiju: lepš ja kuplu rečy b/u, a na aščadžanaje schadžu lišni raz u dobruju kaviarniu, adkładu na adpačynak, pieraliču ŭ prytułak dla žyvioł».
Maryja: «Majo adzieńnie całkam z sekandaŭ, akramia bializny i abutku»
«Ja amatarka časta apranać novieńkaje. U zvyčajnych kramach užo b zhaleła. Praca ŭ ofisie taksama stymuluje kuplać bolš, u nas mnohija pryhoža apranajucca — chočacca nie adstavać. Choć pracuju ŭ banku i atrymlivaju całkam narmalny zarobak (kala 2000 rubloŭ), ale ceny na adzieńnie i abutak u Biełarusi mnie zdajucca zavyšanymi. Nie ŭjaŭlaju, jak ich kuplajuć tyja, čyje zarobki mienšyja za maje.
Niejak ja stała zaŭvažać, što kupiŭšy, naprykład, darahuju spadnicu, nadzieła jaje ŭsiaho niekalki razoŭ. A jakraz u sekandzie spadnicy ŭ pryncypie vielmi tannyja navat u pryvoz — mabyć, nie vielmi papularnyja. Niadaŭna voś kupiła novieńkuju sa skurzamieńnika za 15 rub. i štroksavuju Gant za 7. Abiedźvie hladziacca vielmi kruta. Nichto nie skaža, što jany z sekanda.
Niadaŭna ŭśviadomiła, što ciapier majo adzieńnie całkam z sekandaŭ, akramia bializny i abutku. Abutak ja naohuł vybiraju vyklučna darahi (apošniaja kupla — čaraviki Dr. Martens za $270). Mnie zdajecca, što spałučeńnie jakasnaha, chaj i b/u, adzieńnia i kłasnaha abutku daje maksimalny efiekt i pa canie, i pa jakaści, i pa vonkavym vyhladzie.
Chadžu ja ŭ sekandy ŭ dni pryvozaŭ (śpiecyjalna adsočvaju, kali jany) dla pošuku kłasnych rečaŭ, a potym užo na maksimalnyja źnižki -50% — dla kupli bazavych prostych rečaŭ. Sumu štomiesiačnych vydatkaŭ nazvać składana, jana zaležyć ad taho, ci znojducca prydatnyja rečy. Zredku za miesiac mahu ničoha nie kupić, ale čaściej za ŭsio ŭ siarednim maje vydatki ŭ sekandzie — 50-100 rub. Heta cana adnoj nie samaj darahoj błuzki ŭ zvyčajnaj kramie».
Lesia: «Lublu vintaž i niezvyčajnyja rečy»
«Moj styl adzieńnia adroźnivajecca ad ahulnapryniataha. Sekandy absalutna zakryvajuć patrebu ŭ niestandartnych rečach — tam zaŭsiody možna adkapać niešta takoje, na što nie kožny pakvapicca. Zvyčajna takija rečy novyja abo ŭ idealnym stanie — mała chto budzie nasić ich na kožny dzień. I kaštuje heta kapiejki. Navat nie adsočvaju vydatki na sekandy, bo jany mizernyja.
Plus ja z tych, chto za efiektyŭnaje vykarystańnie resursaŭ, źnižeńnie adchodaŭ. Sartuju śmiećcie, navat kali nichto nie patrabuje. Naohuł ja za minimalizm u spažyvańni. I mnie zdajecca vielmi razumnym nie płacić za vytvorčaść novaj rečy, a danasić reč, jakaja ŭžo jość i jašče ŭ vydatnym stanie».
Jula: «Šukaju tolki brendy — heta ŭžo zaležnaść»
«Ja prychodžu tolki ŭ dni pryvozu i metanakiravana šukaju krutyja brendy. Jość u mianie taki punkcik. Lublu styl «bahataja spadčyńnica», choć takoj nie źjaŭlajusia. Akramia taho, čaściej za ŭsio brend — heta kłasny kroj. Navat samyja prostyja rečy siadziać jak ulityja. I vielmi jakasnyja naturalnyja tkaniny.
Ź niadaŭnich znachodak: dva pinžaki Max Mara za 25 i 40 rubloŭ, dźvie pary štanoŭ Armani za 20 i 35 rubloŭ, usio heta biez bačnych prykmiet našeńnia, paŭpalito dobraj francuzskaj marki z 90% voŭny — za 50 rubloŭ.
Ale, viadoma, znachodžu ja takija rečy nie časta, asabliva kab i pamier mnie padyšoŭ. Tamu rehularna sychodžu biez pakupak. Maksimalnaja suma vydatkaŭ na sekand u miesiac składała rubloŭ z 250. Udała vyłoŭlivalisia rečy. Ale heta vialikaja redkaść, zvyčajna istotna mienš ci ŭvohule ničoha.
Naohuł u mianie ŭžo vypracavałasia zaležnaść, padobnaja da hulniamanii: kajf ad krutych znachodak za kapiejki».
Kaciaryna: «Chaču znajści sukienku dla vypusknoha»
«Ja zvyčajna kuplaju vopratku ŭ Polščy. Baćki śpiecyjalna jeździać tudy ŭ pieryjad źnižak na šopinh. U asnoŭnym usie maje pakupki z mas-markietu (Bershka, Zara, N&M). Ale na vypuskny chaču znajści niešta niezvyčajnaje, što dakładna nie paŭtorycca ni ŭ koha ŭ himnazii. I jašče mnie važna nie vielmi patracicca. Tym bolš što šykoŭnyja rečy ja našu vielmi redka, i ŭbor naŭrad ci spatrebicca jašče raz. U sekandy časta zachodzić maja siabroŭka. Ja baču, jakija cikavyja rečy jana tam znachodzić, i vyrašyła taksama pasprabavać. Pakul ničoha nie padabrała (užo bačyła klovuju sukienku za 25 rubloŭ, ale pamier nie padyšoŭ), ale vieru, što za niekalki naviedvańniaŭ znajdu patrebnaje».
Miłana: «Kuplaju b/u rečy ŭ dabračynnym prajekcie»
«U zvyčajnyja sekandy ja nie chadžu. A voś dabračynny prajekt KaliLaska pryvablivaje mianie i metami, na jakija iduć atrymanyja hrošy, i nizkimi cenami na vydatnyja rečy, i tym, što, akramia adzieńnia i abutku, tut možna kupić kłasnyja knihi, posud, ŭpryhožańni.
Asabliva padabajecca ich barachołka, jakaja prachodzić raz na miesiac na praciahu 4 dzion. Ja prychodžu ŭ pieršy dzień, kab paśpieć vybrać z maksimalnaha asartymientu. A potym idu ŭ apošni dzień i sa źnižkaj 50% znachodžu jašče šmat cikavaha. Naprykład, u apošni dzień na adnoj z barachołak kupili mužu palito Calvin Klein za 20 rubloŭ u vydatnym stanie i absalutna novaje šykoŭnaje padarunkavaje vydańnie Hi de Mapasana za 24 rubli.
Samyja vialikija vydatki za barachołku ŭ mianie — 200 rubloŭ. Heta byli i adzieńnie, i torba, i knihi, i sioje-toje z posudu. Čaściej upisvajusia rubloŭ u 50-100».
Anton: «Kuplaju brendavyja rečy — i pierapradaju»
«Ja chadžu prykładna ŭ 15 zručna raźmieščanych dla mianie sekandaŭ pa hrafiku novych pastupleńniaŭ. Sabie kuplaju trochi, bo abychodžusia nievialikaj kolkaściu rečaŭ. Ale prahladaju ŭvieś asartymient kram na pradmiet brendavych rečaŭ (krychu vyšej za ŭzrovień mas-markietu, choć i Zara časam biaru) aktualnych madelaŭ u vydatnym stanie. Pierapradaju ich potym siarod adnakurśnikaŭ, na anłajn-barachołkach, na prajekcie Open Šafa.
Užo nałaŭčyŭsia, razumieju, što pradajecca lepš za ŭsio (raniej byvała, što rečy zavisali nadoŭha). Atrymlivajecca časam niadrenny dadatak da stypiendyi. Uvohule taki bajer z sekandaŭ. Sumy vydatkaŭ u sekandach zaŭsiody vielmi roznyja, časam i z pustymi rukami vychodžu».
Taćciana: «Heta adzinaja mahčymaść prystojna apranuć dziaciej»
«Chadžu ŭ sekandy praz absalutny niedachop hrošaj na pachody ŭ zvyčajnyja kramy. Ja adna vychoŭvaju dvaich dačok 14 i 12 hadoŭ. Nam ledź chapaje na narmalnuju ježu i nieabchodnyja vydatki. Zarablaju niašmat, dapamahčy asabliva niama kamu, a vielmi chočacca, kab dočki nie adčuvali siabie siarod adnahodkaŭ niaŭtulna z-za adzieńnia. Bałazie ciapier padletki ŭ asnoŭnym apranajucca biez asablivaha vypiandrožu. I ŭ ich styli «ŭsio svabodnaje, pažadana čornaje, z prykolnymi pryntami».
Ja lohka vybiraju praktyčna ŭ luboje naviedvańnie sekandu rečy za razumnyja hrošy (majka 5-10 rub., pinžak 10-25, džynsy 10-30). A kali dabracca da «Pola cudaŭ» u Ždanovičach, to ceny buduć jašče nižejšyja».
U Biełarusi ŭžo niekalki viečaroŭ prablemy ź internetam. Raskazvajem, što adbyvajecca4
Kamientary