«Babuliny» kvatery za $ 160, a kolki za «elitku»? Pačym zaraz u Minsku doŭhaterminovaja arenda kvater

«Babuliny» kvatery. $160—180 pa kursie za adnapakajoŭku

Historyja, kali minskija arandatary ŭ pošukach žylla prachodzili «kastynhi» pierad ułaśnikami i časta čuli ŭ trubcy «ŭžo zdadziena», syšła ŭ minułaje. A ŭžo pra adnapakajoŭki za $350 u rajonie Anharskaj nichto nie čuŭ z kanca 2014 hoda. Ciapier prapanoŭ na rynku šmat, i daloka nie ŭsie sychodziać z abjaŭ za dzień. Jak u takoj situacyi zdajucca kvatery na druhasnym rynku — biez ramontu i va ŭmoŭnaj Čyžoŭcy?

Marharyta Pačyckaja daje taki roskid cen u biudžetnym siehmiencie:

• adnapakajovyja — $ 160—180;
• dvuchpakajovyja — $ 200—250;
• trochpakajovyja — $ 250—280 (trochpakajovyja samyja niezapatrabavanyja).

— Heta buduć prostyja varyjanty. Treba razumieć, što hetyja kvatery ŭžo daŭno maralna sastareli, znachodziacca daloka ad centra. I takoje žyllo siarod našych arandataraŭ užo nie vielmi zapatrabavana. Navat biudžetnyja kvatery na druhasnym rynku ludzi chočuć bačyć sa śviežym ramontam: chaj biez vynachodak, ale kab byŭ novy linoleum, novyja špalery, — kaža surazmoŭnica.

— Nie nastolki ciapier aktyŭny popyt, kab ludzi chapali ŭsio, što bačać.

Tak jak siońniašni arandatar, niezaležna ad svajho biudžetu na arendu, staŭ kudy bolš patrabavalnym da kvater, asablivuju ŭvahu ŭładalnikam treba źviartać na tyja momanty, jakija raniej zdavalisia drobiaziami. Naprykład, na stan sanvuzła. Byvaje, u astatnim kvatera narmalnaja, a voś u tualecie ci vannym pakoi ŭsio zusim drenna.

— Pryčym takaja situacyja byvaje i ŭ novabudoŭlach. Časam kvatery ad dziaržzabudoŭščykaŭ zdajucca z vannymi pakojami, dzie ścieny prosta pafarbavany. Časta paśla minimalnaha vykarystańnia farba padnimajecca, i vyhlad stanovicca zusim nietavarnym. 

Raniej biudžetnyja kvatery chutka raźbirali studenty, asabliva padčas studenckaha bumu. Ale letaś pavyšanaha popytu nie było — dla pryjezdžych chapała miescaŭ u internatach.

Pavialičyć

Adnak moładź z abmiežavanym biudžetam usio roŭna zastałasia metavaj aŭdytoryjaj padobnaha žylla, a jašče — siemji ź dziećmi, jakija šukajuć bolš tannyja varyjanty.

— Siemji ź dziećmi čaściakom hatovyja zdymać navat adnapakajovyja, aby mienš płacić. I jany pryviazany da miesca z-za dziciačaha sada, škoły. Kali ŭ patrebnym rajonie budzie kvatera, dy jašče i tannaja, — heta plus dla takich klijentaŭ, — tłumačyć Marharyta Pačyckaja. — Pa dośviedzie našaha ahienctva, «babuliny» kvatery va ŭmoŭnaj Čyžoŭcy nie zdajucca, jak raniej, za dzień — navat za $ 160 pa kursie. I heta pry tym, što my źbirajem popyt z usiaho rynku. A što ŭžo kazać, kali ŭłaśnik sprabuje zdać žyllo samastojna ci prosta daŭ abjavu i čakaje zvankoŭ.

— Ci ŭsie ŭładalniki takich kvater adekvatna aceńvajuć svaje «kvadraty»? 

— My sprabujem adrazu danosić svaim arendadaŭcam infarmacyju ab situacyi na rynku, padkazvać, jakoj pavinna być cana. Chtości prysłuchoŭvajecca — tady kvatera sychodzić davoli chutka, inšyja iduć za svaimi «žadańniami», i varyjant zavisaje ŭ abjavach. Ludzi roznyja. Jość tyja, chto nie da kanca razumieje admietnaść biahučaj situacyi.

Naprykład, zdavaŭ ułaśnik piać hadoŭ tamu svaju kvateru za 200, choča i zaraz hetyja ž 200 dalaraŭ atrymać. My tłumačym, što situacyja na rynku arendy ŭžo nie taja.

Inšyja ŭłaśniki, naadvarot, pahadžajucca zafiksavać sumy ŭ biełaruskich rublach, što raniej rabili nieachvotna.

— My ŭ svoj čas šmat pracavali nad hetym, i mnohija arendadaŭcy nas pačuli. Biudžetnyja varyjanty siońnia časta iduć biez pryviazki da dalara. Ludzi razvažajuć tak: «Ja lepš stabilna budu atrymlivać svaje 600 rubloŭ u miesiac i nie budu dumać, dva rubli siońnia kurs dalara ci ŭžo nie».

«Bolš za ŭsio paciarpieli ad rełakacyi». Kvatery ŭ novabudoŭlach i na druhasnym rynku paśla ramontu

U ahienctvach nieruchomaści kvatery dzielać na try katehoryi ŭ zaležnaści ad cany: biudžetnyja, siaredni siehmient i elitnyja. Ab pieršych my ŭžo pahavaryli, a što z «siaredniačkom»?

— Heta załataja siaredzina pamiž biudžetnymi varyjantami i elitnym žyllom. Kamfortnyja kvatery, u jakich budzie i novy ramont, i bytavaja technika. Pryčym heta žyllo zvyčajna ŭ dobrym rajonie ci pobač ź mietro. U hetym siehmiencie možna znajści jak novabudoŭli, tak i kvatery ŭ stareńkich damach (stalinki, brežnieŭki), kali ŭ astatnim tam usio dobra», — kaža Marharyta Pačyckaja.

Pavialičyć

Košty za arendu tut składana ŭpisać u peŭnyja ramki. Pradstaŭnica «Tvajoj stalicy» daje taki aryjencir:

• adnapakajovyja — $ 230—280;
• dvuchpakajovyja — $ 300—400.

— Kvatery siaredniaha siehmienta, na moj pohlad, bolš za ŭsio paciarpieli ad rełakacyi ajcišnikaŭ. U vyniku vyzvaliłasia šmat dobraha žytła, a zdymać jaho tak masava, jak raniej, užo niama kamu. Źniziŭsia i ceńnik na takija varyjanty — na 10—20%, a ŭ ciapierašnich arandataraŭ źjaviŭsia vybar. Hetyja kvatery zaraz zdajucca daŭžej: kali raniej sychodzili za dva dni, to zaraz, byvaje, za miesiac. 

Važny momant: absalutnaja bolšaść arandataraŭ šukaje kvatery z meblaj.

— Asabliva heta tyčycca adnapakajovych. Ich časta vybiraje moładź i tyja, chto pryjechaŭ u Minsk na pracu, — jany chočuć pryjści prosta z čamadanam i adrazu žyć. Kali kazać pra dvuch— i trochpakajovyja kvatery, takija ŭžo krychu čaściej hatovyja zdymać biez mebli. Tudy časta zasialajucca siemji, jakija ŭžo paśpieli nažyć niejkuju kolkaść mebli. Jany zhodnyja źniać žyllo tańniej i zapoŭnić jaho svajoj meblaj, ale takich arandataraŭ niašmat — da 20%.

Pavialičyć

Asobna stajać kvatery ŭ «Minsk-Śviecie» i «Novaj Baravoj», na jakija pa roznych pryčynach vysoki popyt i zaraz.

— Ceny na arendu ŭ «Minsk-Śviecie» mocna varjirujucca ŭ zaležnaści ad mietražu, napaŭnieńnia kvatery. Ale heta novaje žyllo, tam budzie pryjemna navat pry biudžetnym ramoncie, tamu tudy zaraz hatovy pierajazdžać. Da taho ž raźmiaščeńnie niadrennaje — navat da «Kavalskaj Słabady» možna prahulacca pieššu.

Rascenki prykładna takija:

• adnapakajovyja — ad $ 250;
• dvuchpakajovyja — ad $ 350;
• trochpakajovyja — ad $ 450.

Upłyvaje na košt arendy i toje, ci zarehistravany niechta na «kvadratach». Dla kvater u «Minsk-Śviecie» heta asabliva aktualna, bo tam časta jakraz nichto nie prapisany.

— Vy viedajecie, što zimoj «kamunałka» moža być u dva razy daražejšaja ŭ kvaterach biez zarehistravanych. Tamu mnohija ŭłaśniki iduć na kampramis: albo na aciaplalny pieryjad źnižajuć košt arendy, albo zimoj za kamunalnyja pasłuhi płaciać papałam. Kali vy chočacie, kab arandatary ŭ vas spakojna žyli, a nie pastajanna šukali bolš tannyja varyjanty, to tak i treba — damaŭlacca.

— Ekśpierty kažuć, što ŭ «Minsk-Śviecie» chutka budzie nastolki šmat arendnych kvater, što ceny buduć źnižacca z-za vialikaj kankurencyi. Što vy pra heta dumajecie?

— Pa adčuvańniach, tam sapraŭdy vielmi mnohija kvatery byli pabudavany dla zdačy ŭ arendu, a nie dla siabie. Ale kali heta paŭpłyvaje na canu? Moža być, kali dabudujuć uvieś kompleks, u niejkim dalokim dalahladzie.

Druhi vielmi papularny siońnia ŭ arandataraŭ rajon — «Novaja Baravaja».

Pavialičyć

— «Novaja Baravaja» raźmieščana daloka ad centra, ale ŭsio roŭna zapatrabavana. Ciapier šmat chto pracuje addalena, i im važny kamfort na miescy. Žyllo novaje, dzicia možna adpravić adno pahulać na vulicu, tamu što mašyny nie jeździać pa dvary, jon začynieny. Kvatery ŭ hetym rajonie, skažam prama, nie zastojvajucca.

Jaki tam zaraz prykładna ŭzrovień koštaŭ? Surazmoŭnica pryvodzić sumy:

• adnapakajovyja — ad $ 250;
• dvuchpakajovyja — kala $ 350;
• trochpakajovyja — ad $ 500.

— Mnohaje zaležyć ad ramontu: byvajuć jak biudžetnyja varyjanty, tak i kvatery z bolš darahimi materyjałami, — robić remarku Marharyta Pačyckaja.

Pacyjent chutčej žyvy. Što zaraz ź minskaj «elitkaj»?

Kali prahladaješ kvatery za $1000—1500 za miesiac, mimavoli zadumvaješsia, chto heta ŭsio ciapier zdymaje. Čaściakom žalacca na toje, što ŭpaŭ popyt na takoje žyllo i ahienty nieruchomaści. Adnak načalnik adździeła arendy «Tvajoj stalicy» ŭpeŭniena: pacyjent chutčej žyvy.

— Viadoma, niama raniejšaha patoku zamiežnikaŭ, ale takija klijenty ŭsio roŭna jość. Jość popyt z boku rasijan, jakija tut pracujuć, da hetaha času pryjazdžajuć niejkija pasolskija supracoŭniki. Nie ŭ raniejšym abjomie, ale rynak u hetym siehmiencie jość.

Pa nazirańniach surazmoŭcy, zavisaje ŭ pošukach arandataraŭ «elitka» ŭčarašniaha dnia ci navat pazaŭčarašniaha.

Pavialičyć

Siońnia ŭ absalutnym trendzie — sučasnaść i novabudoŭli.

— Ramont žylla ŭ hetym siehmiencie pavinien adpaviadać duchu času. Jość kvatery, jakija 20 hadoŭ tamu byli «elitkaj», adnak ich ułaśniki ličać, što takoje žyllo i zaraz zastajecca elitnym. Ale my razumiejem, što maralna ich ramont daŭnym-daŭno sastareŭ. Tak, byccam by žyllo ŭ dobrym domie, tak, z padziemnaj parkoŭkaj, ale jano ŭžo nie budzie kankuryravać z kvateraj u novym sučasnym domie sa śviežym dyzajnierskim ramontam.

Pavialičyć

Maralna sastarełych kvater, jakija ŭ minułym byli elitnymi, dastatkova šmat u centry Minska, u Starym horadzie.

— Dobra zdajucca elitnyja kvatery ŭ novych rajonach: «Park Čaluskincaŭ», Vogue, «Majak Minska». Vialikim popytam karystajucca kvatery ŭ Lebiadzinym — tam niamała damoŭ pavyšanaj kamfortnaści. Zaŭsiody jość vulica Pijanierskaja ŭ Drazdach, małapaviarchoŭki na Dzimitrava. Pieraličvać usio nie budzieš, ale heta albo novyja damy pavyšanaj kamfortnaści, albo nie novyja, ale kłubnyja, małakvaternyja, sa svajoj terytoryjaj i parkinham. I z aktualnym dyzajnierskim ramontam.

Słovam, ceny na «elitku» siońnia mocna zaležać ad šmatlikich faktaraŭ. Ale aryjencir taki:

• adnapakajovyja — $ 500—600 (bolš darahija varyjanty prastojvajuć);
• dvuchpakajovyja — $ 600—700;
• trochpakajovyja — ad $ 1000.

Padahulniajučy situacyju na rynku doŭhaterminovaj arendy, Marharyta Pačyckaja kaža:

— Tak, heta nie toj uzrovień, jak hadoŭ piać tamu, kali va ŭłaśnikaŭ pastajanna źvinieŭ telefon i zdavałasia, što kožny choča źniać ich kvateru. Ciapier popyt jość, ale jon spakojny. Siońnia ŭžo mała prosta dać abjavu i spadziavacca, što mienavita vaša kvatera kahości zacikavić siarod mnostva inšych, dy jašče i ŭ kankurencyi z novabudoŭlami. Treba samomu vychodzić na popyt — tolki tak možna paźbiehnuć prastoju kvatery, jaki niasie dla ŭłaśnika značnyja straty. Heta dakazvaje i zvarotnaja suviaź ad ułaśnikaŭ, jakija zrazumieli heta tolki paśla niekalkich miesiacaŭ prastoju.

• 4
• 0
• 4
• 1
• 3
• 4
• 4
• 0