«Žyć na pryrodzie, ale z kamfortam horada». «A-100» prezientavała novy kvartał pad Minskam
Za kalcavoj darohaj i vysokimi chvojami zusim pobač ź Minskam praciahvaje raści žyły kvartał Zialonaja Havań. Pakul što kompleks — u asnoŭnym katedžy i taŭnchausy, ale ŭ budučyni tut budzie i bolš ščylnaja zabudova. Pra toje, što budaŭnictva «horada na pryrodzie» pačniecca ŭžo zusim chutka, zabudoŭščyk «A-100 Deviełapmient» namiakaŭ jašče minułym letam, a siońnia pradstaŭniki kampanii prezientavali absalutna novy kvartał «Miełodyi lesu». Realt.by pakazvaje, jakim jon budzie, i kolki tut buduć kaštavać kvatery.
Prezientacyja novaha prajekta prajšła ŭ kinateatry Moon u Minsku. Na joj błohieram i žurnalistam pakazali novyja małapaviarchovyja žyłyja damy, jakija chutka źjaviacca ŭ Zialonaj havani.
Jak adznačyła kiraŭnica i akcyjanierka hrupy kampanij deviełapiera Śviatłana Šeŭlik, u najbližejšych płanach — ceły kvartał z nazvaj «Miełodyi lesu». Adroźnieńnie novaha praduktu ad inšych damoŭ «A-100» — absalutna novyja płaniroŭki kvater i novaja fiłasofija prastory:
«Spačatku my farmujem harady, a potym harady farmujuć nas. Chutkaść, napružańnie, enierhija — heta toje, što nie daje rassłabicca. Budynki rastuć i ŭšyrki, i ŭvierch, vielmi mała miesca dla parkaŭ, sadoŭ, dla taho, kab sabracca razam. Heta supiarečyć čałaviečaj pryrodzie. Svaju misiju my bačym u tym, kab stvarać aazisy dla žyćcia, dzie čałaviek budzie adčuvać siabie kamfortna. Hałoŭnaje — usie prastory pavinny być suraźmiernyja čałavieku».
Jak adznačyła Śviatłana, budučym navasiołam Zialonaj Havani nie daviadziecca vybirać — žyćcio ŭ horadzie, ale biez pryrody, albo žyćcio na pryrodzie, ale z adsutnaściu infrastruktury (daroh, škoł, kram).
Hałoŭnaja ideja kvartała za MKAD — žyć na pryrodzie, ale z kamfortam horada.
Ź cikavaha — u novym kvartale «Miełodyi lesu» buduć całkam pieraasensavanyja dvary. U ich zastanucca drevy, spakojnyja zony i zony adpačynku dla zusim maleńkich dzietak. A ŭvieś funkcyjanał, jaki byŭ raniej kala damoŭ, budzie vyniesieny ŭ asobnyja zialonyja kalidory. Heta toje, čaho jašče nichto nie rabiŭ.
«Kali ty baviš čas u adnym dvary, to kožny dzień u ciabie paŭtarajecca adzin i toj ža scenaryj. My vyrašyli adyści ad hetaha i zrabić žyćcio bolš raznastajnym. U žycharoŭ Zialonaj havani kožny dzień budzie napoŭnieny naviznoj».
Andrej Pašaŭ, hałoŭny architektar kampanii «A-100 Deviełapmient», havoračy pra novuju zabudovu, zaŭvažyŭ, što Zialonaja Havań pieršapačatkova nie płanavałasia adnapaviarchovaj:
«Heta budzie nie hihancki katedžny pasiołak na 220 hiektaraŭ, a paŭnavartasny horad na pryrodzie. Pa sutnaści, heta budzie žyćcio ŭ lesie, to-bok les budzie faktyčna prarastać skroź horad. Tut pra fłoru i faunu dzieci dakładna buduć daviedvacca nie ź internetu».
U novym kvartale stvaralniki abiacajuć maksimalna aščadnaje staŭleńnie da pryrody. Da prykładu, śsiečanyja drevy pojduć na małyja architekturnyja formy, a kara — na mulču dla kvietnikaŭ.
Pa kolki budzie mietr?
U novym kvartale budzie 6 damoŭ i kala 400 kvater. Vyjści na novuju placoŭku płanujecca ŭžo ŭ krasaviku, a zaviaršyć budaŭnictva pieršaha piacipaviarchovika − u 3-m kvartale nastupnaha hoda.
Pieršym dla kupli budzie dastupny piacipaviarchovy dom na 64 kvatery.
Prodaž kvater u novym kvartale startuje užo siońnia. Košt kvadratnaha mietra biez azdableńnia pačynajecca ad 1210 dalaraŭ. Taksama jość mahčymaść nabyć kvateru z azdableńniem (1180 dalaraŭ + košt ramontu ŭ zaležnaści ad abranaha varyjantu).
U pieršym domie abiacajuć płaniroŭki, raźličanyja na sučasnyja scenaryi žyćcia. Kolkaść «pustych» mietraŭ va ŭsich damach novaha kvartała budzie minimizavanaja. Tut buduć aptymalnyja suadnosiny roznych zon, mahčymaść transfarmacyi pad patreby siamji. Jak zaŭvažali śpikiery, «u kančatkovym vyniku košt takoha žylla źnizicca, a kolkaść ludziej, jakija zmohuć sabie dazvolić novyja kvatery, vyraście».
Tak, da prykładu, navat u nievialikaj 34-mietrovaj kvatery budzie asobnaja spalnia i kuchnia-haścioŭnia. Usie płaniroŭki dla novych damoŭ raspracavanyja na bazie zavoda «Sučasnyja bietonnyja kanstrukcyi».
Usie damy ŭ kvartale buduć sa zbornaha žalezabietonu.
Unizie — płaniroŭki samaj kampaktnaj (34 mietra) i samaj prastornaj kvatery (77 mietraŭ) u pieršym domie.
Ciapier u Zialonaj havani zabudavana tolki 20-25% terytoryi. Za 4 hady tut uźviali 50 katedžaŭ, niekalki błakavanych damoŭ, a taksama pieršyja sicichaŭsy (čatyrochpaviarchovyja damy z kvaterami).
Da 2035 hoda kompleks pavinien pavialičycca ŭ 4 razy. Da hetaha času tut płanujecca pabudavać 18 kvartałaŭ, jakija składajucca z 280 roznych damoŭ. Pa maštabach terytoryi heta buduć dźvie Novyja Baravyja, ale pa kolkaści žycharoŭ − u dva razy mienš. Usiaho tut budzie žyć kala 16 tysiač čałaviek.
U minułym hodzie ŭ kvartale stała źjaŭlacca pieršaja infrastruktura. Tut užo pracuje kaviarnia, jość taksama italjanski restaran (u holf-kłubie). U płanach na hety hod — pryvatny dziciačy sad, placoŭka dla kamiercyjnych abjektaŭ i, mahčyma, navat svaja maršrutka. Bolš bujnyja abjekty (sady, škoły, handlovyja centry) pačnuć budavać na praciahu 2-5 hadoŭ.
Da budaŭnictva žyłoha kompleksu «Zialonaja havań» kampanija «A-100 Deviełapmient» prystupiła ŭ 2018 hodzie. Kvartał raźmiaščajecca za paru kiłamietraŭ ad MKAD, pobač z holf-palami. Skončyć budaŭnictva kvartała płanujecca praz 10-15 hadoŭ.
Kamientary