Staś Karpaŭ: Dla taho, kab pierastać nienavidzieć biełarusaŭ, siaredniamu ŭkraincu spatrebicca prykładna ad 30 siekund da chviliny

Tak stałasia, što padčas žyćcia ŭ Hruzii ja asabliva nie zavioŭ blizkich znajomstvaŭ z hruzinami. Nie zavioŭ blizkich znajomstvaŭ ź biełarusami (pałova maich znajomstvaŭ prosta pierajechała siudy ź Biełarusi, i mnie ich bolš čym dastatkova), nie zavioŭ znajomstvaŭ z rasiejcami — navat z samymi charošymi ź ich.

A voś z kim ja zavioŭ blizkija znajomstvy — dyk heta z ukraincami. Pra rasiejcaŭ ja napišu nastupny post.

A hety, ličycie, admysłova adrasavany tym ukraincam, jakija majuć svaim abaviazkam pryjści na maju ścienačku, kab paabiacać mnie, što «jany» z «nami» buduć «raźbiracca» paśla taho, jak vajna skončycca i ŭ ich narešcie źjavicca volny čas.

Dyk voś što ja vam chaču skazać.

Mahčyma, mnie tut traplalisia niejkija niedastatkova śviadomyja ŭkraincy, ci niedastatkova sapraŭdnyja z vašaha punktu hledžańnia — ale ŭ mianie byli kanflikty ź biełarusami, z hruzinami, z kazachami, z rasiejcami, navat z turkami i kanadcami, a z ukraincami, ujavicie sabie, nie było.

Vam, moža być, cikava, čamu?

A tamu, što dla taho, kab pierastać nienavidzieć biełarusaŭ, siaredniamu ŭkraincu spatrebicca prykładna ad 30 siekund da chviliny sutyknieńnia z hetym samym patencyjalnym abjektam nianaviści.

Naturalna, vielmi zručna ŭ terapieŭtyčnych metach mieć pad rukoj niezabanienuju ŭ fejsbuku katehoryju ludziej, jakim možna zaŭsiody nasrać na hałavu. Tym bolej, što ŭnutry hetaj katehoryi jość unutranaja ŭpeŭnienaść u tym, što ich stan i sposab samaprymianieńnia — heta niejkaja vysakarodnaja achviarnaja misija. Ale, jak mnie padajecca, heta niespraviadliva ŭ dačynieńni da ich.

Da nas.

I adzinaje, što vam pieraškadžaje heta zrazumieć — heta strach pra nas choć niešta daviedacca.

Vam padabajecca paŭtarać prydumanyja ŭ rašcy kryčałki pra chobitaŭ, prydumanyja asabista śvietačam rasijskaha libieralizmu Julijaj darahoj Łatyninaj padjo… pra ŭstavańnie na łavački. Karaciej, vam padabajecca havaryć słovy, nie prychodziačy ŭ prytomnaść, spadziejučysia, što hetyja słovy sami pa sabie vypadkova składucca ŭ niejki sens.

Pry hetym, ja dumaju, kali paprasić vas sfarmulavać adnachvilinny śpič pra historyju Biełarusi za apošnija navat nie 100, a 30 hadoŭ — vy pałamajeciesia na pieršaj ža frazie.

I mienavita heta vas i pavinna zasmucić, bo ŭ nas užo jość taki narodziec, čyja nacyjanalnaja ideja — hienieravać płanietarnyja cyvilizacyjnyja aksijomy bieź minimalnaha razumieńnia pradmieta analizu.

Dyk voś.

Ja paznajomiŭsia ź vialikaj kolkaściu ŭkraincaŭ. I ŭ ich da mianie niama nijakaj nianaviści. I da žonki majoj niama. I naohuł da biełarusaŭ niama nianaviści. I jany navat uchitrajucca pieražyvać za Biełaruś, jak i my pieražyvajem za Ukrainu.

Jak vam padajecca — heta zdrada ź ich boku?

Adkul unutry vas uziałasia nianaviść da Cichanoŭskaj? Adkul pad intervju ź Viačorkam, jaki daje jaho na cudoŭnaj ukrainskaj (!) movie, najbolšaja kolkaść ukrainskich kamientaŭ — pra toje, što jaho, akazvajecca, nienavidziać usie biełarusy i navat vajary pałka Kalinoŭskaha? Što vy jašče viedajecie pra nas? Akramia našych dumak?

Maje ŭkrainskija siabry raskazvajuć pra nas svaim blizkim, i tyja im nie vierać. Maje siabry raskazvajuć svajakam, što my siabrujem, sustrakajemsia, švendajemsia pa Adžarščynie tudy-siudy. A tyja nie razumiejuć, jak heta mahčyma.

Bo vakoł ich niama biełarusaŭ. I niama žadańnia viedać niešta pra biełarusaŭ. Pałova zamšełaha Kirkorava cikaviejšaja, čym my ŭsie razam uziatyja.

Biełarus — naohuł heta niešta siaredniaje pamiž naboram piksielaŭ i kałaradskim žukom. Biełarusy — jany tam, na bulbianych palach u Łukalandyi, lažać na śpinie i varušać nožkami ŭ łužynie piestycydaŭ.

Takim čynam, vielmi zručna atrymlivajecca:

biełarusy nie majuć śviadomaści, jak ruskija, u ich niama historyi, jak u ruskich, u ich niama nijakich žadańniaŭ i intaresaŭ, jak u ruskich. Biełarusy prosta zdradzili. Heta ŭsio, što jany zrabili, vysunuŭšysia ź biaźviesnaści, ź biesčasoŭja 24-ha lutaha 2022 hoda z čornaj dzirki na mapie.

Naohuł, u ich niama bijahrafii i asobaŭ. A značyć, im nie kryŭdna i nie baluča. I vy, kaniečnie, ź imi raźbieraciesia. Kali ruki dojduć. Kali vašyja piksieli palaciać na našyja piksieli. I na bulbianyja pali.

Čytajcie taksama:

Staś Karpaŭ: Biełaruś — idealny prykład taho, što zdarajecca z krainaj, dzie ruskim dajuć usio, čaho jany patrabujuć

Staś Karpaŭ: Jak tolki ty pierasiačeš ukrainskuju miažu — ty zdochnieš jak ruski intelihient

• 87
• 0
• 12
• 13
• 4
• 7
• 9
• 0