Mikrapłastyk — adna z hałoŭnych pahroz zdaroŭju ŭ XXI stahodździ. Ale navukoŭcy znajšli rašeńnie
Aerahiel na jaječnaj asnovie ačyščaje vadu biez škody dla navakolnaha asiarodździa.
![](http://d3kcf2pe5t7rrb.cloudfront.net/img/w840d4webp1/photos/z_2022_11/640-close-up-side-shot-of-microplastics-on-human-fingers-concept-for-water-pollution-and-global-warming-climate-change-idea-soft-focus-on-a-bunch-of-micro-plastic-that-cannot-be-recycled-4a2de.jpg.webp)
Mikrapłastyk jość paŭsiul. Jon znojdzieny na Eviereście, na dnie Maryjanskaha žołaba, u Arktycy, u rybie, soli, marskoj i presnaj vadzie, pivie, maluskach. Navat u čałaviečym ciele. Štodnia my ŭdychajem mikrapłastyk, źjadajem jaho i pjom. U arhanizm traplaje ŭ siarednim 5 hramaŭ mikrapłastyku štotydzień, a ŭ hod — kala 250 hramaŭ. Prykładna stolki ž važać 230 płastykavych trubačak ci 8 paŭlitrovych płastykavych butelek.
Mikrapłastyk škodzić dzikaj pryrodzie, ale jość rašeńnie. Engaget raskazvaje, što daśledčyki z Prynstana vykarystali jaječny białok dla stvareńnia lohkaha porystaha aerahielu, jaki moža vydalać mikrapłastyk i sol z marskoj vady.
Paśla suški i nahravańnia białka da vysokich tempieratur u bieskisłarodnaj prastory jaho struktura stvaraje sumieś nitak z vuhlarodnaha vałakna i listoŭ hrafiena, jakija mohuć vydalić 99% mikrapłastyku z vady i 98% soli.
Lohkadastupny arhaničny materyjał maje svaje pieravahi. Jon tanny, nie patrabuje šmat enierhii ci pieraraschodu vady. Aktyvavany vuhal taksama tanny, ale jon nie taki efiektyŭny ŭ baraćbie ź mikrapłastykam, jak hiel ź jaječnaha białka.
Aerahiel jašče nie hatovy da šyrokaha vykarystańnia. Navukoŭcy pavinny ŭdaskanalić vytvorčy praces, pierš čym stanie mahčymaj masavaja vytvorčaść.
Hiel taksama moža być karysnym dla zachoŭvańnia enierhii i izalacyi.
***
Jak zaścierahčy siabie ad mikrapłastyku. Praktyčnyja parady:
- Sartavać śmiećcie. Kali płastykavyja adchody buduć traplać u pierapracoŭku, a nie na palihony i adtul u navakolnaje asiarodździe, to jany nie stanuć krynicaj mikrapłastyku.
- Nie razahravać ježu ŭ płastykavaj tary ŭ mikrachvaloŭcy. Niekatoryja kantejniery pry nahravańni vydzialajuć chimičnyja rečyvy, i mikrapłastyk traplaje ŭ ježu.
- Admovicca ad kaśmietyčnych srodkaŭ, u sastaŭ jakich uvachodzić mikrapłastyk: naprykład, ad hlitara i niedarahich skrabaŭ.
- Zavarvać čaj u čajničku i nie vykarystoŭvać čajnyja pakieciki — časta ich robiać z papiery i płastyku.
- Nie pić vadu z płastykavych butelek. Pavodle daśledavańnia, u vadzie z płastykavych butelek u siarednim prykładna ŭdvaja bolš mikrapłastyku, čym u vadzie z-pad krana.
- Admovicca ad adnarazovych płastykavych vyrabaŭ: naprykład, ad trubačak i miašałak dla napojaŭ, płastykavych pakietaŭ i posudu.
- Rehularna pyłasosić doma — u pyle moža być mikrapłastyk, jaki vy ŭdychajecie kožny dzień.
- Addavać pieravahu adzieńniu z naturalnych tkanin: ilnu, šoŭku, arhaničnaj bavoŭnie, šerści i inš.
Taksama čytajcie sastaŭ kaśmietyki i bytavoj chimii. Treba vyklučać z užytku srodki z nastupnymi kampanientami:
- Acrylates/C10-30
- Acrylates Crosspolymer (ACS)
- Alkyl Acrylate Crosspolymer
- Carbomer
- Ethylen-Vinylacetat-Copolymere
- Nylon-6
- Nylon-12
- Polyacrylate
- Polymethyl Methacrylate
- Polyquaternium
- Polyquaternium-7
- Polyethylene (PE)
- Polypropylen (PP)
- Polyothylenteraphthalat (PET)
- Polyurethan (PUR)
- Polyurethan-2
- Polyurethan-14
- Polyurethan-35 i inš.
Zapomnić uvieś śpis ciažka, ale, na ščaście, nazvy mikrapłastyku adnastajnyja. Kali vy bačycie kampanient, jaki pačynajecca z Poly i Acry, to, vierahodniej za ŭsio, heta płastykavy parašok. Zastaniecca zapomnić jašče tolki Nylon, Carbomer i Ethylen.
![](http://d3kcf2pe5t7rrb.cloudfront.net/img/w732d4webp1/photos/z_2022_11/640-europe-bans-straws-and-plastic-tableware-because-of-microplastics-kkp0q.jpg.webp)
Kamientary
Soram.