Palitołah: «Dzień narodnaha adzinstva» prajšoŭ u farmacie dnia raspalvańnia varožaści
17 vieraśnia Alaksandr Łukašenka vystupiŭ na forumie «Heta naša historyja», prymierkavanym da aficyjnaha śviata — Dnia narodnaha adzinstva. U svajoj pramovie jon praciahnuŭ kampaniju raspalvańnia nianaviści da Polščy i da Zachadu ŭ cełym, piša ŭ svaim błohu na sajcie «Radyjo Svaboda» analityk Juryj Drakachrust.
«Znajšłosia ŭ joj miesca i naŭprostavamu tryźnieńniu kštałtu taho, što Polšča atrymała svaju niezaležnaść ad leninskaha Saŭnarkama, a polskija elity i siońnia nazyvajuć Zachodniuju Biełaruś «kresami ŭschodnimi».
Pavodle jaho «viartańnie» (nasamreč ustalavańnie) śviata 17 vieraśnia — heta «adkaz na novyja sproby Zachadu padzialić biełaruski narod pa žyvomu i razarvać na kavałki krainu». Kali heta Zachad chacieŭ mienavita padzialić Biełaruś, akramia jak u skryŭlenaj śviadomaści Łukašenki?
Jon u svajoj pramovie prapanavaŭ aryhinalnuju traktoŭku BNR. Pavodle jaho, zasnavalniki respubliki dumali tolki pra ŭładu, jak i ich naščadki ŭ 2020 hodzie. Vyhladaje, što heta psichałahičnaje prajecyravańnie svajoj ułasnaj niespatolnaj prahi ŭłady na inšych — na svaich sučasnych apanientaŭ i na ich papiarednikaŭ.
Całkam niedarečna prahučała i teza: «razvał Ukrainy ŭžo pačaŭsia». Heta — na ŭzroŭni pychlivych zajavaŭ napiaredadni vajny i ŭ jaje pieršyja dni pra «try dni», praź jakija Ukraina budzie razhromlenaja. Ukraina vystajała ŭ vajnie bolš čym paŭhoda.
Ciapier jana adzinaja, jak nikoli. Častka jaje akupavanaja ahresaram, ale heta ŭ lubym vypadku nie razvał. I da hetaj akupacyi, da dapamohi ahresaru Łukašenka maje naŭprostavaje dačynieńnie.
Asabliva nieadekvatnaj prahučała teza pra «razvał Ukrainy» na fonie rasijskaj parazy ŭ Charkaŭščynie.
Napeŭna, centralnaja teza ŭsioj pramovy Łukašenki: što tolki razam z uschodniesłavianskimi bratami biełarusy kvitnieli, a razam z Zachadam — hibieli. Dosyć prymityŭnaja traktoŭka składanaj biełaruskaj historyi, ale jana pavinna spadabacca ŭ Maskvie. Chacia tam jaje traktujuć jašče praściej: što Biełaruś — heta Rasija.
Pryhadvajučy ŭ svajoj pramovie praz słova suverenitet, Łukašenka nivodnaha razu nie pryhadaŭ, što z suverennaj biełaruskaj ziamli laciać rakiety adnaho ŭschodniesłavianskaha naroda na hałovy inšaha. I što albo ŭ jaho nichto na heta i nie pytajecca dazvołu, i tady jakaja havorka pra biełaruski suverenitet, albo jon uchvalaje hetuju ahresiju adnaho ŭschodniesłavianskaha naroda suprać inšaha, i tady jakaja havorka pra braterstva?
Napeŭna, impetu Łukašenku nadaŭ jaho ŭdzieł u samicie ŠAS, sustrečy z kiraŭnikami šerahu ŭpłyvovych krain śvietu, jakija ŭ bolšaj ci mienšaj stupieni nastrojenyja pa-antyzachodnicku. Łukašenka pryhadaŭ padčas pramovy svaje razmovy ŭ Samarkandzie jak dokaz złaviesnaj hłabalnaj roli Vašynhtona.
Nie vyklučana, što paŭpłyvała i pazicyja Zachadu, u pryvatnaści, Jeŭrasajuza. Dniami jana była vykładzienaja ŭ intervju DW pres-sakratarom Sajuza Pietaram Stana. Sutnaść hetaj pazicyi — što za rytoryku i navat za drobnyja kroki pa libieralizacyi ES iści na sastupki Łukašenku nie źbirajecca. Spadar Stana sfarmulavaŭ heta publična, napeŭna, niepublična hetaja pazicyja da biełaruskich uładaŭ była daniesienaja raniej».
Palitviazień pravioŭ paŭtara hoda ŭ SIZA — voś jak jon vyhladaŭ paśla hetaha11
Kamientary