Fiekalii ŭ łožku, realnyja. Jak Džoni Dep vyjhraŭ sud z eks-žonkaj, jaki ŭskryŭ šmat niepryhožaha
1 červienia skončyłasia sudovaja epapieja, što patrapała karjery taho samaha Džeka Vierabja i jaho byłoj kachanaj. Zhodna z rašeńniem prysiažnych, eks-žonka akciora pavinna budzie vypłacić jamu 15 miljonaŭ dalaraŭ (a Dep joj — 2 miljony). Raskazvajem pra detali hetaha skandalnaha pracesu.
Z čaho ŭsio pačałosia
Akciory Džoni Dep i Embier Chiord pačali sustrakacca ŭ 2012 hodzie, u lutym 2015-ha jany pažanilisia. U mai nastupnaha hoda Chiord padała na razvod i raspaviała pra toje, što padčas adnosin z Depam zaŭsiody padviarhałasia psichałahičnamu i fizičnamu hvałtu ź jaho boku. Akcior nie pryznaŭ abvinavačvańniaŭ.
Tady byłyja sužency dasiahnuli miravoha pahadnieńnia, u ramkach urehulavańnia Dep zapłaciŭ byłoj žoncy 7 miljonaŭ dalaraŭ, jakija Embier abiacała achviaravać na dabračynnaść. Taksama baki padpisali pahadnieńnie, u jakim abaviazalisia nie raspaviadać publična pra svaje adnosiny.
U śniežni 2018 hoda ŭ haziecie The Washington Post vyjšaŭ materyjał «Embier Chiord: Ja vykazałasia suprać seksualnaha hvałtu, za što na mianie prahnievałasia naša kultura. Pryjšoŭ čas takoje źmianiać». Aktrysa, jakaja nibyta i napisała sama hety tekst, raspaviała ŭ im, što praz svoj apovied pra hvałt z boku Depa jana mieła prablemy ŭ karjery, a taksama zaklikała adnavić dziejańnie zakona ab hvałcie ŭ dačynieńni da žančyn, jaki byŭ prypynieny na miesiac praz try dni paśla vychadu artykuła.
Praz toje, što Chiord nazvała siabie ŭ materyjale achviaraj chatniaha hvałtu, Dep i vyrašyŭ ź joj sudzicca. Adznačym: kankretna na Depa Chiord u svaim artykule nie ŭkazvała. Akcior abvinavaciŭ byłuju žonku ŭ paklopie i zapatrabavaŭ ad jaje 50 miljonaŭ dalaraŭ kampiensacyi, Chiord ža padała sustrečny isk i zaprasiła 100 miljonaŭ dalaraŭ za paboi i psichałahičny hvałt.
Praces
Sudovyja pasiadžeńni pa spravie «Dep suprać Chiord» prachodzili ŭ akruhovym sudzie Ferfaksa (Virdžynija) z 11 krasavika da 1 červienia. Cikava, što heta była nie pieršaja sproba Depa abvierhnuć słovy Chiord pra hvałt. U 2020 hodzie akcior padaŭ pazoŭ suprać brytanskaj haziety The Sun, bo paličyŭ paklopam artykuł pra toje, što jon nibyta źbivaŭ Embier Chiord. Sama akciorka tady vystupiła ŭ jakaści śviedki, Dep prajhraŭ tuju spravu.
Sud dazvoliŭ tranślavać ciapierašni praces u režymie realnaha času, i tak jon pieratvaryŭsia ŭ sapraŭdnaje šou. Fanaty vystrojvalisia ŭ čerhi, kab trapić na sud, i pradavali miescy na pasiadžeńniach, pa sacsietkach raźlatalisia tysiačy miemaŭ i narezak z sudovaj zały.
I za ŭsim hetym adyšła na druhi płan sutnaść pracesu. Tym časam Chiord raspaviadała ŭ sudzie, što Dep zdradziŭ joj adrazu paśla viasiella i pastajanna ŭžyvaŭ hvałt u dačynieńni da jaje. U 2015 hodzie akcior, jaki byccam byŭ pad upłyvam narkotykaŭ, nibyta nakinuŭsia na žonku, udaryŭ jaje ab ścianu, raźbiŭ ab jaje butelku i sarvaŭ ź jaje načnuju saročku. Pamiž sužencami zdaryłasia bojka, paśla jakoj Dep nibyta zhvałciŭ žonku butelkaj. Akcior, pa słovach Chiord, taksama sprabavaŭ kantralavać jaje karjeru i prymušaŭ admaŭlacca ad rolaŭ u filmach, dzie jość paścielnyja sceny.
Byłyja achoŭniki Depa padtrymali jaho ŭ sudzie i raspaviali pra toje, što Chiord nibyta sama ŭžyvała hvałt u dačynieńni da eks-muža. Zhodna ich słovam, jany nibyta bačyli na tvary Džoni ślady pabojaŭ, u toj čas jak na Embier nikoli nie było nijakich siniakoŭ.
Padčas suda chapała zhadak i inšych sapraŭdy dzikich vypadkaŭ — naprykład, historyja ź fiekalijami ŭ łožku, jakija tam znajšoŭ Dep. Pieršapačatkova Chiord patłumačyła Depu najaŭnaść fiekalij tym, što ich tam nibyta pakinuli maleńkija jorkšyrskija terjery, što naležali pary — ale ž akcior paličyŭ ich zanadta vialikimi dla sabačych. Padčas suda ž aktrysa pryznałasia, što sama padkłała fiekalii ŭ łožak i nazvała hety vypadak «niaŭdałym rozyhryšam». A potym pieradumała i patłumačyła najaŭnaść fiekalij rasstrojstvam straŭnika ŭ adnaho z terjeraŭ.
Jašče adna jarkaja historyja — apovied pra palot pary z Bostana ŭ Łos-Andželes. Zhodna z aktrysaj, padčas jaho Dep prajaŭlaŭ reŭnaść da žonki ŭ suviazi z tym, što taja zdymałasia ŭ stužcy, dzie pavinna była całavać akciora Džejmsa Franka. Chiord śćviardžaje, što padčas taho palotu atrymała ad muža aplavuchu, potym Dep udaryŭ jaje nahoj pa śpinie i jana ŭpała, nichto na borcie nie zastupiŭsia za žančynu. Džoni ž admaŭlaje, što jon padčas palotu byŭ mocna pjany i što ŭžyvaŭ hvałt da Chiord, ale ŭ paviedamleńni siabru, jakoje jon adpraviŭ z samalota, Dep pisaŭ inšaje.
Nastupstvy
Jašče nie skončyŭsia sud, a hetaja historyja ŭžo mocna patrapała karjery byłych sužencaŭ. Naprykład, praz skandał Dep straciŭ rolu ŭ treciaj častcy franšyzy «Fantastyčnyja stvareńni», Chiord ža zamiest paŭnavartasnaj roli ŭ druhoj častcy «Akvamena» ledźvie vybiła sabie tam dziesiać ekrannych chvilin. U toj ža čas zharnuli franšyzu «Piraty Karybskaha mora», «Alisa ŭ Zalustroŭi» z udziełam Depa pravaliłasia ŭ prakacie.
Što da finansavaha boku, to prysiažnyja vyrašyli, što Chiord pavinna vypłacić Depu 10 miljonaŭ dalaraŭ kampiensacyi za škodu i 5 miljonaŭ dalaraŭ štrafnych sankcyj. Ź inšaha boku, prysiažnyja pabačyli paklop na adras aktrysy z boku adnaho z advakataŭ jaje eks-muža, i praz heta Dep vinavaty joj 2 miljony.
Viadoma, što bahaćcie i Chiord, i Depa značna paciarpieła padčas doŭhaha pracesu, ale ž u vypadku z Chiord ličba vypłat nasamreč moža akazacca dla jaje zanadta vialikaj. Šmat zaležyć ad taho, ci budzie byłaja zorka «Pirataŭ Karybskaha mora» nastojvać na vypłacie mienavita takoj sumy. U svaim kamientary paśla zakančeńnia pracesu Dep na heta nie ŭkazvaŭ — chutčej, pisaŭ pra toje, što metaj hetaj spravy było «vyjavić praŭdu».
Tym časam Chiord śćviardžaje, što za svaje śviedčańni pra seksualny hvałt jana apynułasia pad mocnym ckavańniem. Zhodna z aktrysaj, jana kožny dzień čuje pra toje, što jaje chočuć zabić, jaje dačcy taksama pahražajuć. Pra ckavańnie Chiord raspaviała aktrysa i muzyka Kortni Łaŭ, jakaja vykazała spačuvańnie na adras abaich zorak.
Hety praces — nie tolki historyja pra toje, u što sacsietki mohuć pieratvaryć sudovuju spravu ŭ šou (u pikavy momant tranślacyju z prysudam hladzieli na Youtube 3,5 miljona čałaviek). Kiejs «Dep suprać Chiord» jašče i demanstruje zakančeńnie epochi MeToo. Važna, kab, niahledziačy na niepryhožy finał historyi Chiord, žančyny, jakija sapraŭdy stanoviacca achviarami hvałtu, nie maŭčali.
Kamientary