Jašče niekalki tydniaŭ tamu ZŠA ŭviali sankcyi suprać bujnych rasijskich kampanij i blizkich da Kramla palitykaŭ i biznesmienaŭ. Ale ž zastajecca jašče adzin blizki da Pucina čałaviek, jaki pakul nie pad amierykanskimi sankcyjami.
Havorka pra Alinu Kabajevu, kolišniuju alimpijskuju čempijonku pa mastackaj himnastycy. Amierykanski ŭrad ličyć jaje kachankaj Pucina i maci jak minimum traich jaho dziaciej. Kabajevu padazrajuć u tym, što jana spryjaje ŭtojvańniu asabistaha bahaćcia Pucina za miažoj.
Byłaja himnastka ŭsio jašče maje šansy trapić pad sankcyi, ale pakul amierykanskija čynoŭniki aścierahajucca ŭklučać jaje ŭ śpisy. Jany chvalujucca, što ŭviadzieńnie sankcyj suprać Kabajevaj budzie nastolki mocnym asabistym udaram dla Pucina, što heta jašče bolš abvostryć i tak napružanyja adnosiny pamiž Rasijaj i ZŠA, piša Wall Street Journal.
Zhodna sa źviestkami amierykanskich žurnalistaŭ, zvyčajna ŭ ZŠA pakiety sankcyj razam vypracoŭvajuć amierykanskaje ministerstva finansaŭ i Dziarždepartamient, paśla čaho hetyja abmiežavańni jašče časta pavinna ŭchvalić i Rada nacyjanalnaj biaśpieki. Minfin padrychtavaŭ sankcyi suprać Kabajevaj, ale ŭ apošni momant Rada nacbiaśpieki vykraśliła imia byłoj himnastki z sankcyjnaha śpisu.
Krynicy ŭ amierykanskim uradzie śćviardžajuć, što jość šerah ludziej, jakija pakul nie pad sankcyjami, ale miery suprać ich užo padrychtavanyja. Takim čynam, amierykanskija čynoŭniki ciapier čakajuć momantu, kali ŭviadzieńnie sankcyj suprać hetych ludziej mieła b maksimalny efiekt, i ad sankcyj suprać Aliny Kabajevaj nichto nie admaŭlajecca.
Zachodnija čynoŭniki nie majuć dakładnaj infarmacyi pra toje, jakoje miesca Kabajeva zajmaje ŭ Kramli.
Ale šmat chto ź ich ličyć, što byłaja čempijonka moža być duža ŭpłyvovaj asobaj praz svaje blizkija adnosiny z Pucinym, jakija ni Kabajeva, ni Pucin nikoli nie pryznavali.
Ukrainski ŭrad užo vystupaŭ z zaklikami ŭvieści sankcyi suprać Kabajevaj. Naprykład, ukrainski parłamient nakiravaŭ list uładam Šviejcaryi, dzie, mierkavana, znachodzicca Kabajeva, z zaklikam departavać jaje z krainy i aryštavać jaje nieruchomaść. Šviejcarski ŭrad u adkazie paviedamiŭ, što nie maje dokazaŭ taho, što Kabajeva znachodzicca na terytoryi ich krainy.
Alina Kabajeva syšła z himnastyki prykładna ŭ 2008 hodzie. U pieryjad z 2007 pa 2014 hod jana źjaŭlałasia deputatkaj Dziarždumy ad praŭładnaj «Adzinaj Rasii», dzie atrymoŭvała zarobak prykładna ŭ 140 tysiač dalaraŭ.
Paźniej byłaja himnastka źmianiła kresła deputatki na pasadu kiraŭnicy chołdynha «Nacyjanalnaja Miedyja Hrupa», ale 6 krasavika, pierad abviaščeńniem čarhovaha pakieta sankcyj, danyja pra Kabajevu źnikli z sajta chołdynha.
U pieryjad z 2013 hoda Alina Kabajeva i jaje svajaki nabyli 6 kvater, 2 damy i vialikija nadzieły ziamli ŭ elitnych rasijskich rehijonach. Siarod ich byli raskošnyja kvatery ŭ Maskvie i Sočy, a taksama abjekt nieruchomaści ŭ Sankt-Pieciarburhu płoščaj bolš čym u 210 kvadratnych mietraŭ.
Čytajcie taksama:
«Lubimaja žonka šalonaha dyktatara». Kabajevu prosiać departavać sa Šviejcaryi. Ale ci tam jana, nieviadoma
2025 hod moža stać dla Biełarusi hodam pieramien, jakich biełarusy bajalisia30
Kamientary