Zialenski: Va Ukrainie pačynajecca prahrama adnaŭleńnia žylla. Što jana praduhledžvaje
Ułady Ukrainy pačynajuć maštabnuju prahramu adnaŭleńnia, jakaja praduhledžvaje zabieśpiačeńnie žyllom usich, chto maje ŭ im patrebu. Jana budzie prachodzić u niekalki etapaŭ i praciahniecca i paśla zaviaršeńnia vajny suprać Rasii.
Pra heta ŭ viečarovym zvarocie 16 krasavika paviedamiŭ prezident Ukrainy Uładzimir Zialenski.
«Ciapier histaryčny momant. Momant, kali my možam raz i nazaŭždy vyrašyć mnostva zastarełych prablem usiaho asiarodździa našaha žyćcia. Kali možam zrabić jakasnaje haradskoje płanavańnie tam, dzie jaho nie było. Možam uličyć realnyja transpartnyja patoki. Harantavać enierhaźbieražeńnie, ekałahičnaść materyjałaŭ, inkluziŭnaść», — skazaŭ jon.
Z ulikam vajny prahrama zabieśpiačeńnia žyllom, jakaja pačałasia jašče z 2021 hoda, budzie sumieščanaja z prahramaj enierhamadernizacyi žylla i praciahniecca ŭ niekalki etapaŭ. Na pieršym etapie časovym žyllom pavinny zabiaśpiečyć usich pierasialencaŭ, čyje budynki byli razburanyja.
«Na druhim etapie adnovim toje, što akupanty sprabavali źniščyć. Usie harady, jakija paciarpieli. A na trecim etapie zabiaśpiečym žyllom usich tych, chto abaraniaŭ abo abaraniaje ciapier dziaržavu, chto pracavaŭ abo pracuje ŭ intaresach hramadstva, a ŭłasnaha žylla nie maje», — dadaŭ Zialenski.
Pa słovach Zialenskaha, dla realizacyi prajekta Ukraina ŭžo pryciahvaje viadučych architektaraŭ, dziaržavy-partniory i mižnarodnych donaraŭ.
Akramia taho, dla fiksacyi padziej vajny Rasii suprać Ukrainy ŭłada raspracoŭvaje šerah inicyjatyŭ, u pryvatnaści «prajekt miemaryjalnaha kompleksu, jaki raskaža historyju razburanaha mosta ŭ Kijeŭskaj vobłaści, jaki złučaŭ Irpiń i Buču z Kijevam».
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii25
Kamientary