U pamiežnaj słužbie Ukrainy prakamientavali admovy va ŭjeździe biełarusam. Što skazali?
Apošnija niekalki dzion pastupaje infarmacyja, što na pamiežnych punktach propusku va Ukrainu detalova praviarajuć i dajuć zabaronu na ŭjezd hramadzianam Biełarusi. Asabliva heta tyčycca mužčyn pryzyŭnoha ŭzrostu, ale niamała vypadkaŭ, kali va ŭjeździe admaŭlali i žančynam. Takoje abmiežavańnie moža być źviazana ź biełaruska-rasijskimi vajskovymi vučeńniami.
Čytačka «Našaj Nivy» patelefanavała na haračuju liniju Dziaržaŭnaj pamiežnaj słužby, kab daviedacca, ci puściać u krainu jaje svajakoŭ niepryzyŭnoha ŭzrostu. Voś što joj adkazali:
«U adpaviednaści ź dziejnym zakanadaŭčym aktam, dzie było b ukazana, što hramadzianie Biełarusi nie mohuć ujazdžać va Ukrainu, niama. U zakonie Ukrainy dakładna paznačanyja pryčyny, pa jakich mohuć admović va ŭjeździe. Heta było zaŭsiody».
Nahadajem, što ŭčora va ŭjeździe va Ukrainu admovili viadomamu biełaruskamu žurnalistu i błohieru Mikitu Miełkazioravu. Pa aficyjnaj pryčynie, u jaho było «niedastatkovaje finanasavaje zabieśpiačeńnie na pieryjad zapłanavanaha prybyćcia».
Paradak admovy ŭ pierasiačeńni dziaržaŭnaj miažy zamiežnikami rehulujecca artykułam 14 Zakona Ukrainy «Ab pamiežnym kantroli».
Tak, dadzieny artykuł praduhledžvaje, što admova va ŭjeździe mahčymaja, kali zamiežniki nie adpaviadajuć adnamu abo niekalkim umovam pierasiačeńnia miažy.
Umovami ž pierasiačeńnia miažy ŭ adpaviednaści z dadzienym zakonam źjaŭlajucca:
- najaŭnaść u zamiežnika sapraŭdnaha pašpartnaha dakumienta;
- adsutnaść pa zamiežniku rašeńnia Słužby biaśpieki Ukrainy, Dziaržaŭnaj mihracyjnaj słužby Ukrainy, Dziaržpamiežsłužby Ukrainy ab zabaronie ŭjezdu va Ukrainu;
- najaŭnaść u zamiežnika ŭjaznoj vizy, kali inšaje nie praduhledžana zakanadaŭstvam Ukrainy;
- paćvierdžańnie mety zapłanavanaha znachodžańnia;
- najaŭnaść u zamiežnika dastatkovaha finansavaha zabieśpiačeńnia na pieryjad zapłanavanaha znachodžańnia i dla viartańnia ŭ dziaržavu pachodžańnia abo tranzitu ŭ treciuju dziaržavu abo najaŭnaści ŭ jaho mahčymaści atrymać dastatkovaje finansavaje zabieśpiačeńnie zakonnym sposabam na terytoryi Ukrainy.
Heta tyčycca hramadzian dziaržaŭ, uklučanych u pieralik dziaržaŭ, zaćvierdžanych Kabinietam Ministraŭ Ukrainy, i asob biez hramadzianstva, jakija pastajanna pražyvajuć u dziaržavie, uklučanaj u hety pieralik.
Kamientary