Jak pierasiakać ukrainskuju miažu ŭ novych umovach? Parady ad Biełaruskaha doma va Ukrainie
Niekatorych biełarusaŭ dadatkova praviarajuć, niekatorych prosta nie prapuskajuć. Biełaruś upuściła na svaju terytoryju rasijskija vojski, tamu Ukraina ŭviała śpiecyjalny kantrol dla biełarusaŭ, što pryjazdžajuć u krainu. Kolki budzie dziejničać kantrol, nie paviedamlajecca. Biełaruski dom va Ukrainie tłumačyć, jak možna pavialičyć svaje šancy na pierasiačeńnie miažy.
«Dla luboha zamiežnika abaviazkovy PŁR-test albo siertyfikat ab vakcynacyi [rasijskaja vakcyna «Sputnik» nie pasuje — NN] i strachoŭka z pakryćciom vypadkaŭ zachvorvańnia na karanavirus», — rekamienduje Biełaruski dom.
Jość jašče śpis dadatkovych dakumientaŭ. Heta:
1. Dakumienty, jakija paćviardžajuć metu ŭjezdu (samaje asnoŭnaje).
2. Paćvierdžańnie najaŭnaści finansaŭ dla ździajśnieńnia pajezdki (najaŭnyja abo vypiska z banka).
3. Najaŭnaść zvarotnaha kvitka z Ukrainy.
«Akramia dakumientaŭ, važna być hatovym da adkazaŭ na pytańni pahraničnikaŭ. Važna pravilna zajavić metu ŭjezdu va Ukrainu, — havorycca ŭ rekamiendacyi. — Prykład: kali dla vyjezdu ź Biełarusi vy dekłaravali, što jedziecie ŭ sanatoryj, a na samaj spravie ŭciakajecie ad represij, to na ŭkrainskaj miažy treba kazać jak jość.
Ukraina zaraz znachodzicca ŭ pieradvajennym stanie. Kali vy jedziecie z krain ES albo płanujecie turystyčnuju pajezdku, raim ustrymacca ad vizitu da razradki situacyi na miažy z Rasijaj i Biełaruśsiu. U inšym vypadku patrebna padrychtavać maksimalny pakiet dakumientaŭ dla ŭjezdu i być maralna hatovymi da admovy.
Kali vy zajazdžajecie ź Biełarusi ci Rasii i vam pahražaje niebiaśpieka, to rekamiendujem ab płanavanym pierasiačeńni miažy paviedamić pravaabaroncam albo nam u bot: @bdu_infobot. Pry sabie pažadana mieć dakumienty, jakija paćviardžajuć represii z boku ŭładaŭ RB, i być maralna hatovymi paprasić palityčny prytułak u punkcie propusku. Pry mahčymaści, raim vybrać inšuju krainu dla chutkaha vyjezdu ź Biełarusi (naprykład, Hruzija ci krainy ES).
Kali vy ŭžo znachodziciesia na terytoryi Ukrainy, ale patrapili siudy nielehalna (u abychod punkta propusku) i płanujecie «zdavacca», to rabicie heta ŭ supravadžeńni pravaabaroncaŭ i paviedamiŭšy pradstaŭnikam biełaruskaj dyjaspary.
Sačycie za navinami i aceńvajcie ŭsie mahčymyja ryzyki pry płanavańni vizitaŭ».
Čytajcie jašče:
«Nie puścili mianie i dvuch rasijan». Biełarusaŭ stroha praviarajuć ukrainskija pamiežniki, niekatorym zabaraniajuć ujezd
Aŭtara YouTube-kanała «Žyćcio-Malina» Mikitu Miełkaziorava nie ŭpuścili va Ukrainu
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič26
Kamientary